އޭދަފުއްޓާއި އައްޑޫގެ ކުރިމަތިލުން: 36 އަހަރުގެ ކުރީގެ ހަނދާނެއް

ގޯލްޑް ކަޕުގެ ފައިނަލުގައި މިރޭ ބ. އޭދަފުއްޓާއި އައްޑޫ ސިޓީ ބައްދަލުކުރާ މެޗަކީ، އައްޑޫގެ ފުޓްބޯޅައިގެ ތަޖުރިބާކާރު އަހުމަދު ޝަރީފް (ޑުންގާ) ބުނި ގޮތުގައި އޭނާ އަށް މީގެ 36 އަހަރު ކުރީގެ ހަނދާންތަކެއް އާވާ މެޗެކެވެ.

މިރޭގެ މެޗާ ގުޅުވައި ސޯޝަލް މީޑިއާގައި ޑުންގާ ހިއްސާ ކުރި ފޮޓޯ އިން ފެންނަނީ 1988 ވަނަ އަހަރުގެ ރާއްޖެތެރޭ ފުޓްބޯޅަ މުބާރާތުގައި ސ. ފޭދު އާއި އޭދަފުށި ކުޅުނު މެޗަށް ނުކުތް ފޭދޫ ޓީމެވެ.

ގަލޮޅު ދަނޑުގައި ކުޅުނު އެ މެޗުގައި ވާދަކުރި ފޭދޫ ޓީމުގައި ޑުންގާ ވެސް ހިމެނުނެވެ. އެ މެޗުގެ ފޮޓޯއާ އެކު ދެން އޭނާ ހިއްސާ ކުރީ ގޯލްޑް ކަޕުގައި މިހާރު ވާދަކުރާ އައްޑޫ ޓީމުގެ ގުރޫޕް ފޮޓޯއެކެވެ.

އެފްއޭއެމްގެ ޓެކްނިކަލް ޑައިރެކްޓަރުގެ މަގާމު ވެސް ކުރިން އަދާކުރި ޑުންގާ ބުނީ ފޭދޫގެ އެ ޓީމުގެ ކުރިމަތިލުމަށް ފަހު ފުޓްބޯޅައިގެ ބޮޑު މުބާރާތެއްގައި އައްޑޫގެ އެއްވެސް ޓީމަކުން އޭދަފުއްޓާއި ދެކޮޅަށް ކުޅެފައި ނުވާ ކަމަށެވެ. އެހެންވެ އައްޑޫގެ ޓީމެއް އޭދަފުއްޓާ ދެކޮޅަށް ކުޅެން މި ނުކުންނަނީ 36 އަހަރަށް ފަހު އެވެ.

އެ މެޗުގައި އައްޑޫ ޓީމުގެ ގޯލް ބެލެހެއްޓީ ފޭދޫ ދާއިރާގެ މިހާރުގެ މެންބަރު އިބްރާހިމް ދީދީ (އައިބީ) އެވެ.

"އޭގެ ފަހުން އައްޑޫގެ ޓީމުން އޭދަފުއްޓާ ދެކޮޅަށް ބޮޑު މުބާރާތެއްގައި ކުޅެފައެއް ނެތް،" އައްޑޫ ޓީމުގެ މިހާރު ޓީމުގައި ހިމެނޭ ކުޅުންތެރިންގެ އުމުރުން ހަގު އިރު އެ ކުޅުންތެރިންނަށް ކޯޗުކޮށް ދިން ޑުންގާ ބުންޏެވެ.

"މިނިވަން ޗެމްޕިއަންޝިޕް ފޭދޫން [2015 ގައި] ކާމިޔާބު ކުރި އިރު ވެސް އެ މުބާރާތުގެ އެއްވެސް ހިސާބަކުން އޭދަފުށްޓާ ލައްވައެއް ނުލާ. އަނެއްކާ އޭދަފުށިން 2016 ގައި މުބާރާތް ކާމިޔާބު ކުރި އިރު ވެސް އައްޑޫގެ ޓީމަކަށް ފައިނަލު ބުރާ ހަމައިން ވެސް (ކުޅެން) ޖެހިފައެއް ނުވޭ."

މި ދެ ޓީމު 36 ގައި ބައްދަލުކުރި މެޗުގައި އޭދަފުށީގެ ލެޖެންޑް އަބްދުލް ވާހިދު (ވާޑޭ) ވެސް ކުޅުނެވެ. އެ މެޗުގައި ވިދާލި އަނެއް ކުޅުންތެރިޔަކީ އޭދަފުށީގެ އޭރުގެ އެއްވަނަ ފޯވާޑް އަބްދުލްއަޒީޒު އަހުމަދު (ވާތްތެރި އަޒީ) އެވެ. އެ ދެ ކުޅުންތެރިންނަކީ އޭދަފުށީ ޒުވާނުންގެ ޖަމިއްޔާ އިން 1986-1992 އަށް ފުރަތަމަ ޑިވިޝަނުގައި ވާދަކުރިއިރު އެ ޓީމަށް ކުޅުނު ދެ ކުޅުންތެރިން ވެސް މެ އެވެ.

އެ މެޗު އޭދަފުށިން ކާމިޔާބު ކުރީ 2-0 ންނެވެ.

މިރޭގެ ފައިނަލަކީ ދެ ރަށުގެ ފުޓްބޯޅައިގެ އާ ޖީލުގެ ކުރިމަތިލުމެކެވެ. އެކަމަކު މި މެޗާ އެކު އާ ވަނީ މީގެ 36 އަހަރުގެ ކުރީގެ ހަނދާންތަކެވެ.