އެމް-ފައިސާގެ ހިދުމަތް ދޭ ޓެކްފިން ކުންފުނީގެ ހިއްސާ އޯއެފްޓީއަށް ބަދަލުކުރަން ފާސްކޮށްފި

އުރީދޫ މޯލްޑިވްސްގެ އެމް-ފައިސާގެ ހިދުމަތްތައް ދިނުމަށް އުފެއްދި ސަބްސިޑަރީ ކުންފުނި، ޓެކްފިން މޯލްޑިވްސް ޕްރައިވެޓް ލިމިޓެޑުގެ ހިއްސާ އޯއެފްޓީ އިންޓަނޭޝަނަލަށް ވިއްކައި، ބަދަލުކުރުމަށް އެ ކުންފުނިން ނިންމައިފި އެވެ.

ޓެކްފިން މޯލްޑިވްސްގެ 100 ޕަސެންޓު ހިއްސާ ބަދަލުކުރަން ނިންމައި އެ ކުންފުނީގެ ހިއްސާދާރުން އެކަން ފާސްކުރީ އުރީދޫ މޯލްޑިވްސްއިން ބޭއްވި އެކްސްޓްރާއޯޑިނަރީ ޖެނެރަލް މީޓިން (އީޖީއެމް)ގަ އެވެ. ޓެކްފިން މޯލްޑިވްސްގެ ހިއްސާ ބަދަލުކުރި އޯއެފްޓީ އަކީ އުރީދޫ ގްރޫޕުގެ ދަށުން ހިންގާ ކުންފުންޏެކެވެ.

އުރީދޫން ބުނީ އޯއެފްޓީ އަކީ ފައިނޭންޝަލް ޓެކްނޮލަޖީގެ ގިނަ ތަޖުރިބާ އާއި ވަސީލަތްތައް ހުރި ކުންފުންޏަކަށް ވާތީ، މިއީ ޓެކްފިން ހިދުމަތްތައް ދިނުމަށް އުރީދޫ ގްރޫޕުގެ ކުންފުނިތަކުން އުފައްދާފައިވާ ސަބްސިޑަރީ ކުންފުނިތަކަށް ވެސް އެންމެ ފައިދާވާނެ ގޮތް ކަމަށެވެ.

އުރީދޫ މޯލްޑިވްސްގެ ސަބްސިޑަރީ ކުންފުންޏެއް ކަމަށްވާ ޓެކްފިން މޯލްޑިވްސް ޕްރައިވެޓް ލިމިޓެޑަށް ޕޭމަންޓް ސާވިސް ޕްރޮވައިޑާ (ޕީއެސްޕީ) ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކުރީ މިދިޔަ ސެޕްޓެމްބަރު މަހު އެވެ.