އދ. އަތޮޅުގައި އާރްޓީއެލް ފެރީގެ ހިދުމަތް ފަށަނީ

މުޅި ރާއްޖެ ހައި ސްޕީޑް ފެރީން ގުޅައިލުމަށް ސަރުކާރުން ފަށާފައިވާ އާރްޓީއެލް ފެރީގެ ހިދުމަތް އދ. އަތޮޅުގައި ފަށަން ނިންމައިފި އެވެ.

މިހާރު އާރުޓީއެލް ހިދުމަތް ދެމުން އަންނަނީ ހއ. ހދ. ށ. ނ. ޅ. ގއ. ގދ އަދި ސ. އަތޮޅުގަ އެވެ. އެ ހިދުމަތް ދިނުމަށް 25 އަށް ވުރެ ގިނަ އުޅަނދު ބޭނުންކުރެ އެވެ.

އދ. އަތޮޅުގައި އާރްޓީއެލްގެ ހިދުމަތް ފަށާނެކަން އިއުލާން ކުރެއްވީ އެ އަތޮޅުގެ ތިން ރަށަކަށް ރައީސް ޑރ. މުހައްމަދު މުއިއްޒު ކުރެއްވި ދަތުރުފުޅުގައި އެ އަތޮޅު ކައުންސިލާ މިއަދު ބައްދަލުކުރައްވައި ދެއްކެވި ވާހަކަފުޅުގަ އެވެ.

މިއަދު ހެނދުނު އެ އަތޮޅުގެ އަތޮޅު ކައުންސިލާ އެކު ކުރިއަށް ގެންދިޔަ ބައްދަލުވުމުގައި ކައުންސިލުން ވަނީ އެ އަތޮޅުގައި ދަތުރުފަތުރުގެ ނިޒާމު ހަރުދަނާ ކުރުމަށާއި ޓޫރިޒަމް ފުޅާކުރުމަށް ބޭނުންވާ ކަމަށް ރައީސަށް ދަންނަވައިފަ އެވެ.

ރައީސް މުއިއްޒު ވިދާޅުވީ، ދަތުރުފަތުރުގެ ހިދުމަތް ފުޅާކުރުމަށް އާރްޓީއެލްގެ ހިދުމަތް ކުރިއަށް ގެންދިއުމަށް މަސައްކަތް ކުރައްވާ ކަމަށެވެ.

ކައުންސިލުން ވަނީ ސްކޫލުގައި ސޯލާ ހަރުކުރުމާއި ސިއްހީ ހިދުމަތް ތަރައްގީ ކޮށްދިނުމަށް ވެސް ރައީސްގެ އަރިހުގައި އެދިފަ އެވެ. އަތޮޅު ކައުންސިލަށް އާމްދަނީ ހޯދުމަށް މަގުފަހިވާނެ ގޮތަކަށް އދ. ލޮނުބޯ ބޭނުންކުރެވޭނެ ގޮތް ހައްދަވައި ދެއްވުމަށް ވެސް ކައުންސިލުން އެދުނެވެ.

ކައުންސިލުން ދެން އެެދުނީ އދ. އަތޮޅުގައި ޕިކްނިކް ދާނެ ރަށްތައް މަދުވުމުން އެ ކަމަށް ސަރުކާރުން ހައްލެއް ހޯދައި ދޭށެވެ.