އެފްއެސްއެމްގެ މެނޭޖިން ޑިރެކްޓަރަކަށް އާޝާން

ފިއުލް ސަޕްލައި މޯލްޑިވްސް (އެފްއެސްއެމް)ގެ މެނޭޖިން ޑިރެކްޓަރަކަށް އެސްޓީއޯގެ ސީނިއާ ޖެނެރަލް މެނޭޖަރުގެ މަގާމު ފުރުއްވި ފާތިމަތު އާޝާން މިއަދު އައްޔަންކޮށްފި އެވެ.

އެސްޓީއޯ އިން ބުނީ އެ ކުންފުނީގެ ދަށުން ހިންގާ ސަރުކާރުގެ ތެޔޮ ކުންފުނި އެފްއެސްއެމްގެ މެނޭޖިން ޑިރެކްޓަރަކަށް އާޝާން މިއަދު އައްޔަންކޮށްފައިވާ ކަމަށެވެ.

މިއީ އެސްޓީއޯ ގުރޫޕްގެ ދަށުން ހިންގާ ކުންފުންޏެއްގެ މެނޭޖިން ޑިރެކްޓަރަކަށް އަންހެން ބޭފުޅަކު އައްޔަންކުރި ފުރަތަމަ ފަހަރެވެ.

އާޝާން ވަނީ ކުރިން އެސްޓީއޯގެ ސީނިއާ ޖެނެރަލް މެނޭޖަރުކަން ވެސް ކުރައްވައިފަ އެވެ. މިފްކޯގެ ޑެޕިއުޓީ ސީއީއޯގެ މަގާމު ވެސް އޭނާ އަދާކުރެއްވި އެވެ.

އާޝާން އަކީ 1994 ވަނަ އަހަރު އޮސްޓްރޭލިއާގެ ހޯބާޓް އިންސްޓިޓިއުޓް އޮފް ޓެކްނިކަލް އެންޑް ފާދާ އެޑިއުކޭޝަން އިން ބިޒްނަސް (އިންފޮމޭޝަން ޓެކްނޮލޮޖީ) ޑިޕްލޮމާ ހާސިލް ކުރައްވާފައިވާ ބޭފުޅެކެވެ. އޭނާ ވަނީ މެލޭޝިއާގެ ކޭޑީޔޫ ކޮލެޖުން 2003 ވަނަ އަހަރު ބިޒްނަސް އެޑްމިނިސްޓްރޭޝަން އިން މާސްޓާސް ހާސިލް ކުރައްވައިފަ އެވެ. އެ ކޯސްތަކުގައި އާޝާން ހޯއްދެވި ކާމިޔާބީއަށް 1995 ވަނަ އަހަރާއި 2004 ވަނަ އަހަރު ދައުލަތުން ދޭ ހާއްސަ އިނާމު ވެސް ލިބިފައިވެ އެވެ.

އެފްއެސްއެމްގެ މެނޭޖިން ޑިރެކްޓަރަކަށް އާޝާން އައްޔަންކުރީ، އެ މަގާމުގައި ކުރިން ހުންނެވި އިސްމާއިލް ސުހައިލް މިދިޔަ މަހު 26 ގައި އިސްތިއުފާ ދެއްވުމުންނެވެ. އެ މަގާމަށް ސުހައިލް އައްޔަންކުރީ މިދިޔަ އަހަރު ޑިސެމްބަރު ފަހެއްގަ އެވެ.

އެފްއެސްއެމްގެ އެމްޑީގެ މަގާމުން ސުހައިލް އިސްތިއުފާ ދެއްވިއިރު، އެ ކުންފުނީގެ މުވައްޒަފުންތަކެއް އެފްއެސްއެމްގެ ތެލުން ވައްކަންކޮށް، އެ ތެޔޮ ވިއްކައިގެން ލިބުނު ފައިސާ ލޯންޑާކުރި ކަމަށް ޝައްކު ކުރެވޭ މައްސަލައެއް ފުލުހުން އަންނަނީ ތަހުގީގު ކުރަމުންނެވެ.