އޭދަފުށީގެ ދުވަހެއް، ދިއްދޫ ކަޓުވާލުމަށް ފަހު މާފުށި ގޮވައިގެން އެއްވަނައިގައި ކުއާޓާއަށް

ހއ. ދިއްދޫ 4-1 ން ބަލިކޮށް، ގުރޫޕްގެ އެއްވަނައިގައި ބ. އޭދަފުށިން ކުއާޓާ ފައިނަލަށް ދަތުރުކޮށްފި އެވެ.

މި ނަތީޖާއާ އެކު، އެ ގުރޫޕުން ދެވަނައިގައި ކުއާޓާގެ ޖާގަ ލިބުނީ ކ. މާފުއްޓަށެވެ. ދިއްދޫ ކަޓައި އެ ޓީމަށް ވަނީ މުބާރާތް ނިމިފަ އެވެ.

އޭދަފުށި މެޗަށް ނުކުތީ، ކުރިން ކުޅުނު ހަތަރު މެޗުގައި ވެސް ކުޅުމުގެ ފުރުސަތު ނުލިބުނު ނިޝާމް މުހައްމަދު ރަޝީދު (ޕޮގް) ހިމަނައިގެންނެވެ. އޭނާ އަށް އޭރު ކުޅުމުގެ ފުރުސަތު ނުލިބުނީ އޭނާ ކުޅޭ ކްލަބް، އީގަލްސްއިން ރިލީޒް ނުދޭތީ އެވެ. އެނގިފައިވާ ގޮތުގައި އޭނާގެ ރިލީޒް ފީ އަށް އޭދަފުށިން ވަނީ އީގަލްސް އަށް 75،000ރ. ދީފަ އެވެ.

މެޗުގެ 21 ވަނަ މިނެޓްގައި އޭދަފުއްޓަށް ލީޑް ނަގައި ދިނީ އަލީ ނަސީމް (ދިއްލި) އެވެ. އިޝާން އިބްރާހިމް (ސައްޓު) ހާފުގެ މެދެއްހާ ހިސާބުގައި ހުރެފައި ފޮނުވާލި ބޯޅަ، ދިއްދޫގެ ޑިފެންސް ފުރޭނިގެން ގޮސް ތަނަވަސްވީ އޭރިއާ ތެރެއަށެވެ. އޭރު އައްޔަ އޭރިއާ ތެރެއަށް ވަންނަނީ އެވެ. އެ ބޯޅަ އަށް ދިއްދޫގެ ކުޅުންތެރިންނަށް އެއްވެސް ފުރުސަތެއް ނުދީ ބޯޅަ ގޯލްގެ ތެރެއަށް ވައްދާލި އެވެ.

އެންމެ މަދުވެގެން 3-0 ގެ ނަތީޖާ އަކުން މޮޅުވުން މަޖުބޫރު އޭދަފުށި، އެ ލަނޑަށް ފަހު އުފާފާޅުކުރަން ވަގުތު ހޭދަނުކޮށް، މެދު ރޮނގުގެ ބޮޅު މައްޗަށް ބޯޅަ ގެނެސް އަވަހަށް ކުޅެން ފަށަން ފުރުސަތު ދިނެވެ.

އޭދަފުށީގެ ދެވަނަ ލަނޑުގައި ވެސް ހިއްސާވި ކުޅުންތެރިޔަކީ އިޝާން އެވެ. ދިއްދޫގެ އޭރިއާގެ އަރިމަތިން ވަދެ އޭނާ ބޯޅަ ނަގައި ދިނީ ގޯލްގެ ކުރިމައްޗަށެވެ. އެ ބޯޅަ ދިއްދޫގެ ޑިފެންޑަރަށް، ރަނގަޅަށް ދިފާއު ނުކުރެވުމުން ބޯޅަ އޭނާގެ އަތުން ދޫވެ ކުރިއަށް ނުކުތުމުން ދުވެފައި އައިސް އޭދަފުށީގެ ޖައުޝަން މުހައްމަދު ގޯލްގެ ތެރެއަށް ވައްދާލި އެވެ.އެ ލަނޑު ޖެހީ މެޗުގެ 65 ވަނަ މިނެޓްގަ އެވެ.

އޭދަފުށިން، މުޅި ދަނޑު ކައްކާލީ އެ ޓީމުގެ މުހައްމަދު ފާސިރު (ފާއްޓޭ) ޖެހި ތިންވަނަ ލަނޑާ އެކު އެވެ. ފުރަތަމަ ދެ ލަނޑުގައި އުފާފާޅު ނުކުރިނަމަވެސް، އެ ލަނޑާ އެކު އޭދަފުށީގެ ކުޅުންތެރިން އުފާފާޅު ކުރި އެވެ. މެޗުގެ އިތުރު ވަގުތުގެ ގޮތުގައި ދެއްކި ނުވަ މިނެޓްގެ ތެރެއިން ހަތަރުވަނަ މިނެޓްގައި ފާސިރު ވަނީ އޭދަފުއްޓަށް ހަތަރުވަނަ ލަނޑުވެސް ޖަހައި ދިފަ އެވެ.

މެޗުގެ އިތުރު ވަގުތުގައި ކުޅުން ވަގުތުކޮޅަކަށް މެދުކެނޑުނީ ރެފްރީގެ ނިންމުމާ މެދު ހިތްހަމަނުޖެހިގެން ދެ ޓީމުގެ ބެންޗުން ދަނޑަށް އެރި އެވެ. ރެފްރީ ވަނީ އޭދަފުށީގެ ކުޅުންތެރިޔާ އިބްރާހިމް ޝަރީފާއި ދިއްދޫގެ އޮފިޝަލް މުހައްމަދު ޒާހިރަށް ރަތް ކާޑު ދައްކައިފަ އެވެ. ރެފްރީގެ ދިއްދޫގެ ބެންޗުގައި ތިބި ބައެއް އޮފިޝަލުން ރެފްރީއާ ދިމާލަށް ވެސް ދިޔަ އެވެ. އެކަމަކު އެ ޓީމުގެ ބައެއް ކުޅުންތެރިން އޮފިޝަލް ހިފަހައްޓައި ހުއްޓުވި އެވެ. މެޗު ކުރިއަށް ގެންދެވުނީ ހަ އެއްކަ މިނެޓް ފަހުންނެވެ.

އަލުން ކުޅެން ފަށައި ދިއްދޫން ލަނޑު ޖެހި އެވެ. އެ ލަނޑު ޖެހީ ހުސައިން ޒިމްޔާން އެވެ.