ބޭފެންސީ ރެޒިޑެންސް ހެދުމަށް ޕައިލް ފައުންޑޭޝަން ހަދަނީ

ބޭފެންސީއިން މިހާރު މަސައްކަތް ކުރަމުންދާ ރެޒިޑެންޝަލް ޕްރޮޖެކްޓުގެ މަސައްކަތަކީ އެންމެ މަތީ ފެންވަރަށް ހަދާ އިމާރާތެއްކަން ކަށަވަރު ކުރުމުގެ ގޮތުން މި އިމާރާތް އަޅާނީ ޕައިލް ފައުންޑޭޝަން ކޮންސްޓްރަކްޝަން ހަދައިގެން ކަމަށް އެ ކުންފުނިން ބުނެފި އެވެ.

އެ ކުންފުނިން ބުނީ އެ ރެޒިޑެންޝަލް ޕްރޮޖެކްޓުގައި އަޅާ އިމާރާތަކީ ދިގު މުއްދަތަކަށް ގެއްލުން ނުލިބި ހުންނާނެ ތަނެއްކަން ކަށަވަރު ކުރުމަށް އެ ކުންފުނިން ޖިއޮލޮޖިކަލް ދިރާސާތަކާއި ފައުންޑޭޝަން އެޅުމުގައި ގެންގުޅޭ އެކި ޕްރެކްޓިސްތައް ބެލުމަށްފަހު, އެ އިމާރާތް އެޅުމަށް އެންމެ އެކަށީގެން ވަނީ ޕައިލް ފައުންޑޭޝަންކަން ނިންމާފައިވާ ކަމަށެވެ. އަދި މިއީ އެ ކުންފުނިން އަޅާ ލަގްޒަރީ އިމާރާތުގައި ދިރިއުޅެން ބޭނުންވާ ފަރާތްތަކަށް, އިމާރާތަށް ގެއްލުން ނުލިބި ގިނަ ދުވަހު ހުންނާނެ ކަމުގެ ޔަގީންކަން ލިބޭނެ ކަމެއްގެ ގޮތުގައި އެ ކުންފުނިން ސިފަކުރެ އެވެ.

ބޭފެންސީ ރެޒިޑެންސް ހެދުމަށް ބިމުގެ 15 މީޓަރު އަޑީގައި 372 ޕައިލްސް އަޅާ, ޕައިލް ފައުންޑޭޝަން ކޮންސްޓްރަކްޝަން ހެދުމަށް ވަނީ ހަމަޖެހިފަ އެވެ.

ބޭފެންސީއިން ބުނީ ބޮޑު ގަހެއްގެ މޫގަނޑުން ގަހަށް ސަޕޯޓް ފޯރުކޮށްދޭ ފަދައިން، އިމާރާތަށް ބޭނުންވާ ސަޕޯޓު ޕައިލް ފައުންޑޭޝަނުން ލިބޭނެ ކަމަށެވެ.

ޕައިލް ފަންޑޭޝަނަކީ ޑީޕް ފައުންޑޭޝަނުގެ ވައްތަރެކެވެ. މިކަން ކުރުމަށް ދިގު ކޮލަމްތަކެއް ހިމެނޭ ގޮތަށް ޕައިލްތައް އަތުރާ, ބިންގަނޑަށް މި ޕައިލްތައް ޖަހާ ހަރުކުރެ އެވެ. މިކަން ކުރަނީ އިމާރާތުގެ ބަރުދަން ބިމުގެ އެންމެ ސްޓޭބަލް ހިސާބުގައި ބެހެއްޓުމަށެވެ. މިއީ އާއްމުކޮށް ފަސްގަނޑު ބަލިކަމުން އިމާރާތުގެ ބަރުދަނަށް ބޭނުންވާ ސަޕޯޓު ނުލިބޭ ހާލަތްތަކާއި ޖިއޮލޮޖިކަލް ގޮތުން ކުރިމަތިވާ ބައެއް ހާލަތްތަކާ ގުޅިގެން އިމާރާތަށް ބޭނުންވާ ސަޕޯޓު ފޯރުކޮށްދިނުމުގެ ގޮތުން ކުރާ ކަމެކެވެ.

ޕައިލް ފައުންޑޭޝަން ހެދުމުން އިމާރާތުގެ ބަރުދަން ފަސްގަނޑުގެ އެންމެ އަޑިއަށް ހަމަހަމަކޮށް ބެހިގެންދެ އެވެ. މީގެ ސަބަބުން އިމާރާތް އަރިއަޅާލުން ފަދަ ކަންތައްތަކުން ދުރުހެލިކޮށްދެ އެވެ. މިއީ ބިންހެލުންތައް އާއްމުކޮށް އަންނަ ހިސާބުތަކުގައި އިމާރާތަށް ބޭނުންވާ ސަޕޯޓު ފޯރުކޮށްދީ، ސައިޒްމެކް ވޭވް އިން އިމާރާތް ރައްކާތެރިކޮށްދޭ ޕްރޮސެސެކެވެ. މިއީ ފަސްގަނޑު މަޑު ތަންތަނާއި ހައި ވޯޓާ ޓޭބަލްސް ހުންނަ ތަންތަނުގައި އިމާރާތުގެ ބަރުދަން ރަނގަޅަށް ހިފަހައްޓައިދީ, އިމާރާތުގެ ސްޓެބިލިޓީ ޔަގީން ކޮށްދޭނެ ޕްރޮސެސެކެވެ. ޕައިލް ފައުންޑޭޝަންގެ ސަބަބުން، ފައުންޑޭޝަން މައްސަލަތަކާ ގުޅިގެން އިމާރާތަށް ލިބޭ ގެއްލުންތަކުން ރައްކާތެރި ކޮށްދެ އެވެ. މީގެ ސަބަބުން ދިގު މުއްދަތަކަށް އިމާރާތަށް ރައްކާތެރިކަން ލިބެ އެވެ.

ބޭފެންސީ ރެޒިޑެންސްގެ މަސައްކަތްތައް ކުރަމުންދާ ސަރަހައްދުގައި އެޗްޑީސީއިން ވަނީ އެ ކުންފުންޏަށް ބޭނުންވާ ހެލްތު އެންޑް ސޭފްޓީއާ ގުޅޭ މައުލޫމާތުތައް ވެސް މި ހަފްތާގައި ވަނީ ފޯރުކޮށްދީފަ އެވެ.

ބޭފެންސީ އަކީ ސިންގަޕޫރުގެ ރިއަލްއެސްޓޭޓް ޑިވެލޮޕްމަންޓް ކުންފުންޏެކެވެ. މި ކުންފުނިން ރާއްޖޭގައި މަސައްކަތް ކުރަނީ ރާއްޖޭގައި ރީ-ރަޖިސްޓަރީކޮށްގެންނެވެ. މި ކުންފުނިން ލަގްޒަރީ ރެޒިޑެންސް ކޮމްޕްލެކްސްއެއް އަޅަނީ ހުޅުމާލޭގަ އެވެ.