ކޮރަޕްޝަންގެ މައްސަލައިގައި ނަތަންޔާހޫ ކޯޓަށް

އިޒްރޭލުގެ ބޮޑުވަޒީރަކު މަގާމުގައި ހުއްޓާ، ޖިނާއީ ދައުވާ ލިބޭ ފުރަތަމަ މީހާގެ ގޮތުގައި މިހާރުގެ ބޮޑުވަޒީރު ބިންޔާމިން ނަތަންޔާހޫ އިއްޔެ ކޯޓަށް ހާޒިރުކޮށްފި އެވެ.

އިޒްރޭލުގެ މީޑިއާތަކުން ސިފަކުރާ ގޮތުގައި، ގައުމު ހަނގުރާމައިގެ ތެރޭގައި އޮއްވައި ނަތަންޔާހޫ އަށް ރިޝްވަތު ހިފުމާއި މަކަރާއި ހީލަތް ހެދުމުގެ ދައުވާ އާއި އިތުބާރު ގެއްލޭ ފަދަ އަމަލެއް ކުރުމުގެ ދައުވާ އުފުލައި ކޯޓުގެ އަޑުއެހުންތައް ފެށުމަކީ ތާރީހީ ކަމެކެވެ.

ނަމަވެސް ނަތަންޔާހޫ ވަނީ އެ ތުހުމަތުތަކަށް އިންކާރުކޮށްފަ އެވެ. އޭނާ ކޯޓުގައި ބުނީ ކޮރަޕްޝަނެއް، އޮޅުވާލުމެއް ނެތް" ކަމަށާއި އެއީ "ތާކުންތާކު ނުޖެހޭ ވާހަކަތަކެއް" ކަމަށެވެ.

މުޅި ދުވަހުގެ ހެކިބަސް ނެގުމުގެ މަރުހަލާ ކުރިއަށް ދިޔަ އިރު ނަތަންޔާހޫ ވަނީ މީޑިއާތަކަށް ވަރަށް ބޮޑަށް ފާޑުކިޔައިފަ އެވެ. އޭނާ ބުނީ އިޒްރޭލުގެ ގިނަ ރައްޔިތުންނަކީ ކަނާތު ފިޔައިގެ މީހުން ކަމަށާއި ނަމަވެސް މީޑިއާ އޮތީ "98 ޕަސެންޓަށް އަނެއް ކޮޅަށް" ކަމަށެވެ.

ނަތަންޔާހޫއާ ދެކޮޅަށް ހެކިބަސް ދިން އޭނާގެ ކުރީގެ އެހީތެރިން ހިމެނޭ ގޮތަށް އެކި މީހުންގެ ހެކި ބަސް ނަގައި އަޑުއެހުމެއް މިހާރު ވަނީ ކުރިއަށް ގެންގޮސްފަ އެވެ.

އެ ދައުވާތަކުގެ ސަބަބުން ކިހާ ވަރެއްގެ ނުތަނަވަސްކަމެއް ކުރިމަތިވިތޯ ނަތަންޔާހޫއާ ސުވާލުކުރުމުން ބުނީ "ކަނޑަށް ވައްޓާލާ ފެންތިއްކެއް ވަރަށް" ކަމަށް ބުނެފި ނަމަ އެއީ ވެސް "މާބޮޑު ވަރު" ކަމަށެވެ.

"ދުނިޔެއަށް މުހިންމު އެހެން ކަންކަމުގައި މި އުޅެނީ އެޔަށްވުރެ ބުރަކޮށް،" ނަތަންޔާހޫ ބުންޏެވެ.

ޕްރެސް ކޮންފަރެންސެއްގައި ނަތަންޔާހޫ ބުނީ އޭނާއާ މެދު ކޮރަޕްޝަންގެ ތުހުމަތުކުރާތާ އަށް އަހަރުވީ ކަމަށާއި އެހެންވެ މައްސަލައިގެ އަޑުއެހުންތައް ފެށޭނެ ދުވަހެއްގެ އިންތިޒާރުގައި ހުންނަތާ އެތައް ދުވަހެއް ކަމަށެވެ. ނަތަންޔާހޫ ބުނީ އޭނާގެ ފަރާތުން ވާހަކަ ދެއްކޭނީ އަދި ކިރިޔާ ކަމަށެވެ.

ފުރަތަމަ މައްސަލާގައި ނަތަންޔާހޫ އާއި އޭނާގެ އަންހެނުން ސާރާގެ މައްޗަށް ތުހުމަތު ކުރަނީ ސިޔާސީ މަންފާގެ ބަދަލުގައި ބިލިއަނަރުންގެ އަތުން 260،000 ޑޮލަރަށް ވުރެ އަގުހުރި ލަގްޒަރީ ސާމާނު ގަބޫލުކުރުމެވެ. އޭގެ ތެރޭގައި ސުއްޓާ އާއި ގަހަނާ އަދި ޝެމްޕޭން ހިމެނެ އެވެ.

މި ހަދިޔާ ދިން މީހުންގެ ތެރޭގައި އިޒްރޭލަށް އުފަން ހޮލީވުޑްގެ ޕްރޮޑިއުސަރު އާނޮން މިލްޗާން އާއި އޮސްޓްރޭލިއާގެ ބިޒްނަސް އެގްޒެކެޓިވް ޖޭމްސް ޕެކާ ހިމެނެ އެވެ.

އަނެއް ދެ މައްސަލައަކީ ނަތަންޔާހޫ އިޒްރޭލުގެ ދެ މީޑިއާއެއްގައި "ރަނގަޅު ކަވަރޭޖެއް" ގެނައުމަށް މަސައްކަތްކުރި ކަމަށް ތުހުމަތު ކުރެވޭ މައްސަލައެކެވެ.

އެއް ކަމަކީ ވާދަވެރި ދުވަހު ނޫހެއް "ބަލިކަށިކުރުމަށް" އެއްބަސްވެ، އިޒްރޭލުގެ މަޝްހޫރު ނޫހެއް ކަމަށްވާ ޔެޑިއޯތު އަހްރޯނޯތުގެ ޕަބްލިޝަރު އާނޮން މޮޒޭސްއާ އެކު އެއްބަސްވުމަކަށް އައުމަށް ބޮޑުވަޒީރު މަސައްކަތްކުރި ކަމަށް ތުހުމަތު ކުރެވޭ މައްސަލަ އެވެ.

އެހެން މީހަކު ތުހުމަތުކޮށްފައިވާ ގޮތުގައި ނަތަންޔާހޫއަށް އޭނާގެ ގާތް ރަހުމަތްތެރިޔާ ޝައުލް އެލޮވިޗްގެ ހިއްސާ އޮންނަ މަޝްހޫރު ނިއުސް ވެބްސައިޓް ވާލާގައި ރަނގަޅު ކަވަރޭޖެއް ލިބުނީ އެލޮވިޗް ބޭނުންވި ގޮތަށް ޓެލެކޮމް ކުންފުނިތަކެއް އެއްކޮށްލުމަށް މަގު ފަހިކޮށްދިނުމުގެ ބަދަލުގަ އެވެ.

ނަތަންޔާހޫ 2022 ވަނަ އަހަރުގެ ފަހުކޮޅު ވެރިކަމަށް އައުމަށްފަހު އޭނާ ކޯލިޝަން ސަރުކާރުން ވަނީ އެގައުމުގެ ޖުޑީޝަރީ އާއި ގާނޫނު ތަންފީޒުކުރާ އޮފިޝަލުންނާ ކުރިމަތިލައި ކޯޓުތައް ބަލިކަށިވާނެ ފަދަ ގާނޫނެއް ހަދަން އުޅެފަ އެވެ. އެކަމާ ގުޅިގެން ބޮޑެތި މުޒާހަރާތައް ވެސް ކުރި އެވެ.