ހިޒްބުﷲގެ ޕޭޖަރުތައް ގޮއްވާލަން ހުއްދަ ދިން ކަމަށް ނަތަންޔާހޫ އެއްބަސްވެއްޖެ

ލުބުނާނުގައި ސެޕްޓެމްބަރު މަހު ހިޒްބުﷲގެ މުއާސަލާތީ ވަސީލަތްތައް ގޮއްވާލުމަކީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހުއްދަ ދިނުމުން ހިންގި އޮޕަރޭޝަނެއް ކަމަށް އޭނާ ފުރަތަމަ ފަހަރަށް އެއްބަސްވެއްޖެ އެވެ.

ހިޒްބުﷲގެ މެންބަރުން ގެންގުޅުނު ޕޭޖަރުތަކާއި ވޯކީޓޯކީތައް ގޮވައި ސާޅީހަކަށް މީހުން މަރުވެ 3000 މީހަކު ޒަހަމްވި ހާދިސާ އަކީ އިޒްރޭލުގެ އަަމަލެއް ކަމަށް އެންމެ ފުރަތަމަ ވެސް ހިޒްބުﷲ އިން ބުނެފައިވެ އެވެ. ހިޒްބުﷲ އަށް ވަރަށް ބޮޑު ގެއްލުމަކަށްވި މި ހަމަލާގެ ތުހުމަތު އިޒްރޭލަށް ކުރި ނަމަވެސް މިހާތަނަށް އިޒްރޭލު ސަރުކާރުން ޖަވާބެއް ނުދެ އެވެ.

ނަތަންޔާހޫގެ ތަރުޖަމާނު އުމޭރު ޑޮސްޓްރީ އޭއެފްޕީއަށް ދިން އިންޓަވިއުއެއްގައި ބުނީ ލުބްނާނުގައި ޕޭޖަރުތައް ގޮއްވުމުގެ އޮޕަރޭޝަނަށް ފެހި ސިގްނަލް ދިން ކަމަށް ނަތަންޔާހޫ ބުނެފައިވާ ކަމަށެވެ.

ހިޒްބުﷲ ގެ މެންބަރުން ބޭނުންކުރި ޑިވައިސްތައް ޖެހިޖެހިގެން ދެ ދުވަހު ގޮއްވި އެވެ. މި ގޮވުންތައް ސުޕަމާކެޓްތަކާއި މަގުތަކާއި ޖަނާޒާތަކުގައި ގޮއްވާލީ ސެޕްޓެމްބަރު މަހުގެ މެދުތެރޭގަ އެވެ.

މިދިޔަ ސެޕްޓެމްބަރު މަހުގެ ފަހުކޮޅު ލުބުނާނުގައި އިޒްރޭލުން ހަމަލާދޭން ފެށި ފަހުން ހަމަލާތައް ވަނީ ވަރުގަދަކޮށްފަ އެވެ. އިޒްރޭލުން ވަނީ ހިޒްބުﷲ އާ ދެކޮޅަށް ވައިގެ ހަމަލާތައް ވަރުގަދަކޮށް، ފަހުން ދެކުނު ލުބްނާނަށް އެއްގަމު ސިފައިން ފޮނުވައިފަ އެވެ.