އިޒްރޭލުން ލުބްނާނަށް ހަމަލާ ދިނުން ހުއްޓާލައިފި

ލުބުނާނުގެ ހިޒްބުﷲ އަށް އިޒްރޭލުން ދެމުން ދިޔަ ހަމަލާތައް ހުއްޓާލައި ހަމާސް އަށް ކުރާ ޕްރެޝަރު ވަރުގަދަކުރާނެކަން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިއުލާނުކޮށްފި އެވެ.

ނަތަންޔާހޫގެ މި ވާހަކައަށް ފަހު އެމެރިކާގެ ރައީސް ޖޯ ބައިޑެން ވިދާޅުވީ އެއްބަސްވުމާ އެއްގޮތަށް އިޒްރޭލުން އަމަލުކުރާނެކަން އަންގާފައިވާ ކަމަށެވެ.

އިޒްރޭލުގެ ސެކިއުރިޓީ ކެބިނެޓުން ހުއްދަ ދީފައިވަނީ އެ ތަނުގެ ގަޑިން ފަތިހު 4:00 (ރާއްޖޭ ގަޑިން މިއަދު ހެނދުނު 7:00) އިން ފެށިގެން ހަމަލާތައް ހުއްޓާލުމަށެވެ. އެ ކެބިނެޓުގެ ވަޒީރުންގެ ތެރެއިން 10 ވަޒީރަކު ވަނީ ހަމަލާތައް ހުއްޓާލުމަށް ތާއީދުކޮށްފަ އެވެ. ދެކޮޅަށް ވޯޓު ދިނީ އެންމެ ވަޒީރެކެވެ.

އިޒްރޭލަށް އަސްކަރީ ގޮތުން އެހެން ހުރިހާ ގޮތަކުން ވެސް މަދަދު ދީ ހިމާޔަތްކުރަމުން އަންނަ އެމެރިކާގެ ރައީސް ބައިޑެން ވިދާޅުވީ މިއީ ހޯދުނު ބޮޑު ކުރިއެރުމެއް ކަމަށާއި މިއީ ސަރަހައްދުގައި ހަމަޖެހުން ގާއިމުކުރުމުގެ ފެށުމެއް ކަމަށެވެ.

ކެބިނެޓުން މި ނިންމުން ފާސްކުރުމުގެ ކުރިން ނަތަންޔާހޫ ވަނީ އެކަމާ ބެހޭ ގޮތުން ވާހަކަ ދައްކައިފަ އެވެ. އޭނާ ބުނީ ލުބްނާނަށް ހަމަލާ ދިނުން ހުއްޓާލުމާ އެކު ފަލަސްތީނުގެ ހަމާސް އަށް ދޭ ހަމަލާތައް ވަރުގަދަކުރާނެ ކަމަށެވެ.

"ހިޒްބުﷲ މަންޒަރުން ބޭރުވީމާ ހަމާސް އޮތީ ހަނގުރާމައިގައި އެކަނި. އެކަމަށް އަހަރެމެން ޕްރެޝަރު އިތުރުކުރާނަން،" ނަތަންޔާހޫ ބުންޏެވެ. "ހަނގުރާމަ ހުއްޓާލުމުން އީރާނުގެ ނުރައްކަލަށް ފޯކަސް ކުރެވޭނެ."

އިޒްރޭލާއި އެމެރިކާގެ އޮފިޝަލުން ބުނެފައިވާ ގޮތުގައި 60 ދުވަހަށް ހަމަލާތައް މެދުކަނޑާލާނެ އެވެ.

ނަތަންޔާހޫ ޓީވީ މެދުވެރިކޮށް ބުނީ ކެބިނެޓްގެ ރުހުން ދެނީ ހަނގުރާމަ ހުއްޓާލުމުގެ އައުޓްލައިނަކަށް ކަމަށެވެ. ހަނގުރާމަ ހުއްޓާލުމުގެ މުއްދަތު ބިނާވެފައި ވަނީ ލުބުނާނުގައި ހިނގާ ކަންތައްތަކުގެ މައްޗަށް ކަމަށް ވެސް ބުންޏެވެ.

އިޒްރޭލާއި ހިޒްބުﷲގެ މި ހަމަނުޖެހުންތައް ފެށުނީ މިދިޔަ އަހަރުގެ އޮކްޓޯބަރު މަހުގެ 8 ވަނަ ދުވަހު ފަލަސްތީނުގެ ޣައްޒާއަށް އިޒްރޭލުން ދޭން ފެށި ހަމަލާތަކާ އެކު ހިޒްބުﷲ އިން އިޒްރޭލަށް ހަމަލާ ދޭން ފެށުމުންނެވެ. ލުބުނާނުގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް 3،750 އަށް ވުރެ ގިނަ މީހުން ހަމަލާތަކުގައި މަރުވެ، 15،600 އަށް ވުރެ ގިނަ މީހުން ޒަހަމްވެފައިވާ އިރު، އެއް މިލިއަނަށް ވުރެ ގިނަ މީހުން ވަނީ ގެދޮރު ދޫކޮށް ދާން މަޖުބޫރުވެފަ އެވެ.