ލުބްނާން ވެސް ޣައްޒާ އެކޭ އެއްގޮތަށް ސުންނާފަތިކޮށްލާނެ ކަމުގެ އިންޒާރު ނަތަންޔާހޫ ދީފި

އީރާނުގެ މަދަދު ލިބޭ، ލުބްނާނުގެ ހިޒްބުﷲ ޖަމާއަތާ ދެކޮޅަށް އިޒްރޭލުގެ ހަމަލާތައް ވަރުގަދަކޮށްފައި ވާއިރު، ފަލަސްތީނުގެ ޣައްޒާއެކޭ އެއްގޮތަށް ލުބްނާނު ވެސް ސުންނާފަތިކޮށްލާނެ ކަމުގެ އިންޒާރު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދީފި އެވެ.

މި އިންޒާރު ނަތަންޔާހޫ ދީފައިވަނީ، ހިޒްބުﷲ ޖަމާއަތް ބަލިކަށިކޮށްލުމުގެ ނަމުގައި، ލުބްނާނުގެ ދެކުނުން އިޒްރޭލު ސިފައިން ވަދެގަނެ، ދެމުންދާ ހަމަލާތައް ވަރުގަދަކޮށްފައިވަނިކޮށެވެ.

"ދިގުދެމިގެންދާ ހަނގުރާމައަކަށް ވެއްޓި، ޣައްޒާ ސުންނާފަތި ވެފައިވާ ފަދަ ހާލަތެއް މެދުވެރިވުމުގެ ކުރިން، ލުބްނާނު ސަލާމަތް ކުރުމުގެ ފުރުސަތު އަދިވެސް އެބައޮތް،" ލުބްނާނުގެ ރައްޔިތުންނާ މުހާތަބުކޮށް، ނަތަންޔާހޫ އާންމުކުރި ވީޑީއޯގައި ބުންޏެވެ.

"ލުބްނާނުގެ ރައްޔިތުންނަށް އަހަރެން ބުނަން ބޭނުންވަނީ، ހިޒްބުﷲގެ ކިބައިން ލުބްނާނު ސަލާމަތްކޮށް، މި ހަނގުރާމަ ހުއްޓުވާށޭ."

ހިޒްބުﷲ އަށް އަމާޒުކޮށް ކަމަށް ބުނެ އިޒްރޭލުން ލުބްނާނުގެ ދެކުނަށް މިދިޔަ މަހުގެ ފަހު ކޮޅު ދޭން ފެށި ހަމަލާތަކުގައި މިހާތަނަށް 1،100 އަށް ވުރެ ގިނަ މީހުން މަރުވެ، މިލިއަނަކަށް ވުރެ ގިނަ މީހުންގެ ގެދޮރު ވަނީ ގެއްލިފަ އެވެ.

އެކަމަކު ޣައްޒާގައި އިޒްރޭލާ ދެކޮޅަށް ހަރަކާތްތެރިވާ ހަމާސް ޖަމާއަތަކޭ އެއްފަދައިން، ހިޒްބުﷲ އިން ވެސް ވަނީ އިޒްރޭލާ ދެކޮޅަށް ކުރަމުންދާ ހަނގުރާމާގައި ފަހަތަށް ނުޖެހޭނެ ކަމަށް ބުނެފަ އެވެ.

އިޒްރޭލުން ހުއްޓުމެއްނެތި ދެމުންދާ މިސައިލް ހަމަލާތަކުގައި، ލުބްނާންގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އާއި ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ ވަނީ އަވަހާރަވެފަ އެވެ.

މިދިޔަ ހަފްތާގައި އިޒްރޭލަށް ދިން މިސައިލް ހަމަލާއަކީ، އީރާންގެ މަދަދު ލިބޭ، ލުބްނާންގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އާއި ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އަވަހާރަކޮށްލުމުގެ ބަދަލުގައި ދިން ހަމަލާއެއް ކަމަށް އިރާނުގެ އަސްކަރިއްޔާއިން ވަނީ ބުނެފަ އެވެ.

އިރާނަށް ހަމަލާދިނުމަށް އިޒްރޭލުން ރާވަމުންދާކަމުގެ ރިޕޯޓުތައް ވެސް ދަނީ ލިބެމުންނެވެ. އެކަމަކު އިރާނުގެ ތެޔޮ ކާރުހަނާތަކަށް ހަމަލާ ނުދިނުމަށް އެމެރިކާ އިން އިޒްރޭލަށް ވަނީ އިލްތިމާސްކޮށްފަ އެވެ.