އައިސީސީއަށް ގޮންޖަހަން ހަންގޭރީއަށް ނަތަންޔާހޫ ގެންދަނީ

ޣައްޒާގައި ހިންގާފައިވާ ޖަރީމާތަކުގެ މައްސަލައިގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރަން އިންޓަނޭޝަނަލް ކްރިމިނަލް ކޯޓް (އައިސީސީ) އިން ނެރުނު އަމުރަށް ގޮންޖެހުމަށް ހަންގޭރީއަށް ނަތަންޔާހޫ ގެންދާނެ ކަމަށް އެ ގައުމުގެ ބޮޑުވަޒީރު ވިކްޓަ އޯބަން ވިދާޅުވެއްޖެ އެވެ.

ނަތަންޔާހޫ އާއި އިޒްރޭލުގެ ކުރީގެ ޑިފެންސް މިނިސްޓަރު ޔޯވް ގަލަންޓްގެ އިތުރުން ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރުކުރުމަށް މިދިޔަ ބުރާސްފަތި ދުވަހު އައިސީސީން އަމުރު ނެރުނީ "އިންސާނިއްޔަތާ ހިލާފު ޖަރީމާތަކާއި ހަނގުރާމައިގެ ޖަރީމާތައް ހިންގާފައިވާ" މައްސަލައިގަ އެވެ.

އައިސީސީގެ އަމުރަކީ އެކަށީގެންނުވާ ބާރެއްގެ ބޭނުންކުރުން ކަމަށާއި މިއީ "ތަންދޮރު ނުބަލައި" ވަކި ބައެއްގެ މަސްލަހަތަށް ނިންމާފައިވާ އަދި ހިނގަމުންދާ ހަނގުރާމައެއްގެ ތެރެއަށް ވަދެގަތުމަށް "ގާނޫނީ ނިންމުމެއްގެ ހެދުން އަޅައިގެން" ސިޔާސީ މަގްސަދެއްގައި ނެރުނު އަމުރެއް ކަމަށް ވެސް، އީޔޫގެ ރިޔާސަތު މި ވަގުތު ބަލަހައްޓާ އޯބަން ވިދާޅުވި އެވެ.

"މި ހާލަތުގައި، އެ އަމުރަށް ގޮންޖެހުން ފިޔަވައި އިތުރު އިހުތިޔާރެއް ނެތް،" ދައުލަތުގެ ރޭޑިއޯއަށް ދެއްވި ހަފްތާގެ ބަޔާނުގައި އޯބަން ވިދާޅުވި އެވެ.

"އަޅުގަނޑު އިޒްރޭލުގެ ބޮޑުވަޒީރު ނަތަންޔާހޫއަށް ހަންގޭރީއަށް ވަޑައިގަތުމަށް ދައުވަތު އަރުވާނަން. ވަޑައިގެންފި ނަމަ، އިންޓަނޭޝަނަލް ކްރިމިނަލް ކޯޓުގެ އަމުރުގެ އެއްވެސް އަސަރެއް ހަންގޭރީގައި ނުކުރާނެ ކަމުގެ ޔަގީންކަން އަރުވާނަން. އަދި އޭގެ ޝަރުތުތަކަށް ތަބާ ނުވާނެ ކަމުގެ ޔަގީންކަން އަރުވަން،" އޭނާ ވިދާޅުވި އެވެ.

އޯބަން މިހެން ވިދާޅުވި އިރު ހަންގޭރީން ވަނީ އައިސީސީ އުފެއްދި ބައިނަލްއަގްވާމީ މުއާހަދާ ކަމަށްވާ ރޯމް ސްޓެޓިއުޓްގައި 1999 ވަނަ އަހަރު ސޮއިކޮށް އޭގެ ދެ އަހަރު ފަހުން އޯބަންގެ ވެރިކަމުގެ ފުރަތަމަ ދައުރުގައި އެ މުއާހަދާ ތަސްދީގު ވެސް ކޮށްފަ އެވެ.

ނަމަވެސް އައިސީސީ އުފެއްދުމާ ގުޅޭ މުއާހަދާއާ ގުޅުން ހުރި އެހެން މުއާހަދާތަކުގައި ގާނޫނީ ސަބަބުތަކާ ހެދި ހަންގޭރީން ބައިވެރިނުވާ ކަމަށާއި އެހެންވެ އައިސީސީގެ އަމުރުތަކަށް އެ ގައުމުން ތަބާވާން ނުޖެހޭނެ ކަމަށް ހަންގޭރީން ބުނެ އެވެ.

ރަޝިޔާގެ ރައީސް ލަޑީމިއާ ޕުޓިން ހައްޔަރުކުރުމަށް އައިސީސީން ނެރުނު އަމުރު ވެސް ތަންފީޒު ނުކުރާނެ ކަމަށް ހަންގޭރީން ކުރިން ބުނެފައިވެ އެވެ. އޯބަން އަކީ ރަޝިޔާއިން ޔުކްރެއިން ހިފަން ހަނގުރާމަ ފެށުމާ އެކު ޔޫރަޕުން ރަޝިޔާ އެކަހެރިކޮށްފައި ވިޔަސް ޕުޓިންއާ އެކު ގާތް ގުޅުމެއް ބާއްވާ ޔޫރަޕްގެ ހަމައެކަނި ލީޑަރެވެ. -- އޭއެފްޕީ