ނަތަންޔާހޫ ހައްޔަރުކުރަން ބައިނަލްއަގުވާމީ ޖިނާއީ ކޯޓުން އަމުރު ނެރެފި

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު ޔޯވް ގަލަންޓް އަދި ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރުކުރަން އިންޓަނޭޝަނަލް ކްރިމިނަލް ކޯޓް (އައިސީސީ) އިން މިއަދު އަމުރު ނެރެފި އެވެ.

"އިންސާނިއްޔަތާ ހިލާފް ޖަރީމާތައް ހިންގުމާއި ހަނގުރާމައިގެ ކުށްތައް 8 އޮކްޓޫބަރު 2023 އިން، މި މީހުން ހައްޔަރުކުރުމުގެ އަމުރަށް އެދި ޕްރޮސިކިއުޓަރުން މައްސަލަ ހުށަހެޅި ތާރީހު ކަމަށްވާ 20 މެއި 2024 އަށް ހިންގާފައި ވާތީ ބެންޖަމިން ނަތަންޔާހޫ އާއި ޔޯވް ގަލަންޓާއި ދެ މީހުން ހައްޔަރުކުރުމަށް އަމުރު ނެރެން،" ދަ ހޭގްގައި ހުންނަ އައިސީސީން ނެރުނު ބަޔާނުގައި ބުންޏެވެ.

މި ދެ މީހުންގެ އިތުރުން ހަމާސްގެ އަސްކަރީ ވެރިޔާ ޟައީފްގެ މައްޗަށް ވެސް މިފަދަ މައްސަލަތަކުގައި ވަނީ ހައްޔަރުކުރުމުގެ އަމުރު ނެރެފަ އެވެ.

ނަތަންޔާހޫ އާއި ގަލަންޓް ހައްޔަރުުކުރުމުގެ އަމުރަކަށް މިދިޔަ މެއި މަހު އެދުނީ އައިސީސީގެ ޕްރޮސެކިޔުޓާ ކަރީމް ޚާން އެވެ. އެއީ ފަލަސްތީނުގައި ހިންގަމުންދާ ބަނޑައްޖެއްސުމާއި، މީހުން މެރުމާއި ނަސްލު ނައްތާލުމުގެ ޖަރީމާތަކާ ގުޅިގެންނެވެ.

ނަތަންޔާހޫ ވަނީ މި މަހުގެ ކުރީކޮޅު ގަލަންޓް ޑިފެންސް މިނިސްޓަރުކަމުގެ މަގާމުން ވަކިކޮށްފަ އެވެ.

އައިސީސީގެ މެންބަރު ގައުމުތަކުގެ އަދަދު 124 އަށް އަރާއިރު އެއިން ގައުމަކަށް މި އަމުރު ރައްދުވާ މީހަކު ހިނގައްޖެ ނަމަ ހައްޔަރުކުރަން ލާޒިމުވާނެ އެވެ. އެކަމަކު އެފަދަ އަމުރުތައް ތަންފީޒު ކުރުމުގެ ބާރު އައިސީސީއަކަށް ނޯވެ އެވެ.

އެމެރިކާ އާއި އިޒްރޭލަކީ ވެސް އައިސީސީގެ މެންބަރުންނެއް ނޫނެވެ. އެކަމަކު ފަލަސްތީނުން 2015 ވަނަ އަހަރު ވަނީ އައިސީސީ ބަލައިގެންފަ އެވެ.

ނަތަންޔާހޫ އާއި ގަލަންޓް ހައްޔަރުކުރަން އައިސީސީން ނެރުނު އަމުރަށް އިޒްރޭލުގެ ބައެއް އޮފިޝަލުން ވަނީ ރައްދު ދީފަ އެވެ. އިޒްރޭލުގެ އިދިކޮޅު ލީޑަރު ޔައިރް ލަޕިޑް އެކްސްގައި ކުރި ޕޯސްޓެއްގައި ވަނީ ކޯޓުގެ ނިންމުން ކުށްވެރިކުރާ ކަމަށާއި، އިޒްރޭލުން ޣައްޒާގައި ކުރަމުންދާ ހަނގުރާމައަކީ އިޒްރޭލުގެ ދެމިއޮތުމަށް "ޓެރަރިސްޓުންނާ ދެކޮޅަށް" ކުރާ ހަނގުރާމައެއް ކަމަށެވެ.

އިޒްރޭލުގެ ކުރީގެ ޑިފެންސް މިނިސްޓަރު އަވިގްޑޯ ލިބަމަން ބުނީ މިއީ ބައިނަލްއަގުވާމީ މުޖުތަމައުގެ "ދެފުށް ދެގޮތްކަން" ހާމަވާ އަމުރެއް ކަމަށެވެ.

އެމެރިކާއިން ވަނީ އައިސީސީން އިޒްރޭލުގެ މައްސަލަ ތަހުގީގުކުރަން އުޅޭތީ މީގެ ކުރިން ކަންބޮޑުވުން ފާޅުކޮށްފަ އެވެ. އަދި ބުނެފައި ވަނީ އެ މައްސަލަ ބެލުމުގެ އިހްތިސާސް އައިސީސީ އަށް ނޯންނާނެ ކަމަށެވެ. އެކަމަކު އައިސީސީގެ ޗީފް ޕްރޮސިކިއުޓަރު ކަރީމް ޚާން މިދިޔަ އޮކްޓޫބަރު މަހު ވިދާޅުވެފައިވާ ގޮތުގައި ހަމާސް އާއި އިޒްރޭލާއި އިޒްރޭލުގެ ސިފައިން ހަނގުރާމައިގެ އެއްވެސް ޖަރީމާއެއް ޣައްޒާގައި ހިންގާ ނަމަ އެކަމެއް ބެލުމުގެ އިހްތިސާސް އެ ކޯޓަށް ލިބިގެންވެ އެވެ. އެކަމަކު ރަޝިޔާގެ ރައީސް ލަޑީމިއާ ޕުޓިން ހައްޔަރުކުރަން މީގެ ކުރިން އައިސީސީން އަމުރު ނެރުމުން އެމެރިކާއިން އެކަމަށް މަރުހަބާ ކިޔާފައިވެ އެވެ.

ހަނގުރާމައިގެ ޖަރީމާތަކާއި އިންސާނިއްޔަތާ ދެކޮޅަށް ހިންގާ ޖަރީމާތަކާއި ނަސްލު ނައްތާލުމުގެ ތުހުމަތުތަކުގައި ވަކިވަކި ފަރުދުންގެ ޝަރީއަތް ހިންގާ އައިސީސީގައި ކުރިއަށްދާ ތަހުގީގަކީ ހޭގްގައި ވެސް ހުންނަ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި އިޒްރޭލާ ދެކޮޅަށް ފެށި ނަސްލު ނައްތާލުމުގެ މައްސަލައާ ވަކި ތަހުގީގެކެވެ. ދުނިޔޭގެ ކޯޓުގެ ގޮތުގައި ބަލަމުން އަންނަ އައިސީޖޭ އަކީ ދައުލަތްތަކުގެ މެދުގައި އުފެދޭ މައްސަލަތައް ބެލުމަށް އދ. އިން ގާއިމުކޮށްފައިވާ ކޯޓެކެވެ.