ދ. ގެ ކުރިމަތިލުން؛ ކުޑަހުވަދޫ ކަޓުވާލުމަށް ފަހު މީދޫން، ދިއްދޫ ގޮވައިގެން ދެވަނަ ބުރަށް

ގޯލްޑް ކަޕްގެ ގުރޫޕް އޭ ގައި ދ. ކުޑަހުވަދޫގެ މައްޗަށް 2-1 މޮޅުވެ، ދ. މީދޫން ދެވަނަ ބުރަށް ދަތުރުކޮށްފި އެވެ.

މިއަދު ހަވީރުގެ މެޗުން މީދޫ މޮޅުވުމުން، ހއ. ދިއްދޫ ވެސް ވަނީ ދެވަނަ ބުރުން ޖާގަ ލިބިފަ އެވެ. އެއާ އެކު ދެވަނަ ބުރުގެ ހުރިހާ ޖާގަތަކެއް މިހާރު ވަނީ ފައިނަލު ވެފަ އެވެ.

މީދޫ މޮޅުވުމުން، ދިއްދުއަށް ވެސް ދެވަނަ ބުރުގެ ޖާގަ ކަށަވަރުވީ، ކުޑަހުވަދުއަށް ތިން ޕޮއިންޓާ އެކު މުބާރާތް ނިންމާލަން ޖެހުމުންނެވެ. ދިއްދޫ މިހާރު ވެސް އޮތީ ހަތަރު ޕޮއިންޓާ އެކު އެވެ.

ކުޑަހުވަދުއަށް ދެވަނަ ބުރުގެ ޖާގަ ލިބެން އޮތް ހަމައެކަނި ގޮތަކީ މެޗުން މޮޅުވުމެވެ.

މިއަދުގެ މެޗުގެ ތިން ލަނޑު ވެސް ފެނިގެން ދިޔައީ ދެވަނަ ހާފުގަ އެވެ. ފުރަތަމަ ލީޑް ނެގީ ވެސް މީދޫންނެވެ. އެ ޓީމަށް ލިބުނު ޕެނަލްޓީއެއް ވައްދާލައިގެން، މުޒުދާން ހަސަން މީދޫގެ ފުރަތަމަ ލަނޑު ޖެހި އެވެ.

އެ ޓީމުގެ ދެވަނަ ލަނޑު 82 ވަނަ މިނެޓްގައި ޖެހީ އިބްރާހިމް އިމްރާނެވެ. މިދިޔަ ބުރާސްފަތި ދުވަހުގެ ރޭ، ދިއްދުއާ ދެކޮޅަށް ކުޅުނު މެޗުގައި އޭނާ ދެ ލަނޑު ޖެހި އެވެ.

ކުޑަހުވަދުއަށް ސުން ކަނޑުވާލަ ދިނީ މުހައްމަދު ޔާމީންގެ ލަނޑުންނެވެ. އޭނާ ލަނޑު ޖެހީ 90 ވަނަ މިނެޓްގަ އެވެ.

މިރޭ ދިއްދޫ ނުކުންނާނީ ގދ. ފަރެސްމާތޮޑާއާ ދެކޮޅަށެވެ. އެ މެޗުގައި ދެ ލަނޑު ޖަހައި ބައިކޮޅަށް ލަނޑެއް ނުވަދެ ނިންމާލައިފިނަމަ ދިއްދުއަށް ދެވަނަ ކަށަވަރު ކުރެވޭނެ އެވެ. މި ވަގުތު އެ ޓީމަށް ފައިދާ އަދި ގެއްލުން ގޯލެއް ވެސް ނެތެވެ. ކުޑަހުވަދުއަށް ފައިދާ އެއް ގޯލް އެބައޮތެވެ.