ކުޑަހުވަދު އަށް ދެ ރަތް ކާޑު، އޭގެ ފައިދާއާ އެކު ފުވައްމުލައް ފަހު ވަގުތު މޮޅުވެއްޖެ

މެޗު ނިމެން 10 މިނިޓަށް ވެފައި ވަނިކޮށް، ކުޑަހުވަދޫ ޓީމުގެ ދެ ކުޅުންތެރިންނަށް ދެއްކި ރަތްކާޑުގެ ފައިދާ ނަގައި، ގޯލްޑް ކަޕްގެ ފުރަތަމަ މެޗު 3-1 އިން ފުވައްމުލައް ރޭ މޮޅުވެއްޖެ އެވެ.

ފުޓްބޯޅައިގެ ފޯރި އަލުން ގެނައުމަށް، ރަށްތަކާއި ސިޓީތަކަށް ހާއްސަކޮށް ނައިންޓީ ޕްލަސް އިން މުޅިން އަލަށް ބާއްވާ ގޯލްޑް ކަޕްގެ ފުރަތަމަ މެޗަށް ނުކުތް ދެ ޓީމުގައި ވެސް ފުރަތަމަ ޑިވިޝަނުގެ ތަޖުރިބާކާރު ކުޅުންތެރިން ހިމެނެ އެވެ.

ޓީސީގެ ކުރީގެ ކެޕްޓަން އަހްމަދު ރިލްވާން (ބެން) އާއި ކުރިން ގްރީން ސްޓްރީޓްސް އަށް ވެސް ކުޅުނު މުހައްމަދު ސާއިފް، ކުޑަހުވަދޫ ޓީމުގައި ހިމެނެ އެވެ.

ގައުމީ ޓީމުގެ ކުރީގެ ޑިފެންޑަރު ސޮބާހް މުހައްމަދު އިބްރާހިމްގެ ކޯޗުކަމުގެ ދަށުން ނުކުތް ފުވައްމުލައް ޓީމުގައި ޔުނައިޓެޑް ވިކްޓަރީ އާއި އީގަލްސް އަށް ވެސް ކުޅުނު މޫސާ އަޒީމް ހަސަން އާއި ޓީސީގެ މުހައްމަދު ސާދު (ނިޒާރު) ހިމެނެ އެވެ. އަދި ދެވަނަ ޑިވިޝަނުގައި ކުރިން ނިއު ރޭޑިއަންޓަށް ވެސް ކުޅުނު ގާނާގެ ފޯވާޑް އޮއުސޫ ކޯފީ ވެސް ފުވައްމުލައް ޓީމުގައި ހިމެނެ އެވެ.

މެޗުގެ ފުރަތަމަ ލަނޑު ފުވައްމުލަކަށް ޖަހައި ދިނީ ކޯފީ އެވެ.

ދެވަނަ ހާފުގައި ކުޑަހުވަދޫ ޓީމުން ދުރުން ފޮނުވާލާ ހަމަލާތަކުން ފުވައްމުލަކުގެ ފަހަތަށް ބާރު ބޮޑު ކުރި އެވެ. އެ ޓީމުން ނަތީޖާ ހަމަހަމަ ކުރި ލަނޑު އަހްމަދު މުއާދު ޖެހީ ހާފްގެ މެދެއްހާ ހިސާބުން ފޮނުވާލި ހަމަލާގަ އެވެ.

އެ ބޯޅަ ދިފާއު ކުރަން ފުވައްމުލަކުގެ ކީޕަރު މަސައްކަތް ކުރިނަމަވެސް ގޯލަށް ވުރެ ކުޑަތަންކޮޅެއް ކުރިއަށް ނުކުމެ ހުރުމުން އޭނާގެ އަތުގައި ބޯޅަ ލައްވާލާ ގޮތެއް ނުވި އެވެ. މަތިން އޮހިގެން އައިސް ބޯޅަ ވަނީ ގޯލްގެ ތެރެއަށެވެ.

މެޗުގެ 78 ވަނަ މިނެޓްގައި ބެން، ފުވައްމުލަކުގެ ކީޕަރަށް ކުރި ފައުލުގައި އޭނަ އަށް ދެވަނަ ރީނދޫކާޑް ދައްކައި ދަނޑުން ފޮނުވާލި އެވެ. އޭގެ މިނެޓެއް ނުވަނީސް ރެފްރީ ވަނީ ސާއިފް އަށް ވެސް ރަތް ކާޑް ދައްކައި ދަނޑުން ފޮނުވާލައިފަ އެވެ. އޭގެ ކުރިން އޭނާ އަށް ވެސް ރީނދޫ ކާޑެއް ދައްކާފައި ވެ އެވެ.

ފުވައްމުލަކުން ނަތީޖަ ބަދަލު ކުރީ ނުވަ ކުޅުންތެރިންނަށް ކުޑަހުވަދޫގެ ޓީމު ދަށްވި ފަހުންނެވެ.

އެ ޓީމަށް އަލުން ލީޑް ނަގައިދިން ލަނޑު އަލީ ޝަމާލް އަބްދުﷲ ޖެހީ89 ވަނަ މިނެޓްގަ އެވެ. އޭރިއާގެ ބޭރުން އޭނާ ލިބުނު ބޯޅަ ހިފައިގެން އޭރިއާ އަށް ވަންނަން އުޅެފައި ވެސް ބޯޅަ ކޮންޓްރޯލްކޮށް ގޯލްގެ މަތީ ކަނަށް އަމާޒުކޮށް ބޯޅަ ފޮނުވައިލި އެވެ.

އިތުރު ވަގުތުގައި އަޒީމް ވަނީ އޭރިއާގެ ކަނާ ދިމާލުން ވަދެ ގޯލްގެ ކަނަށް ބޯޅަ އޮޅާލައި ފުވައްމުލަކަށް ތިން ޕޮއިންޓް ކަށަވަރުކޮށް ދީފަ އެވެ.

މުބާރާތުގައި މިއަދު ހަވީރު ކުޅޭ މެޗުގައި ބައްދަލު ކުރާނީ ގދ. ފަރެސްމާތޮޑާ އާއި ދ. މީދޫ އެވެ.