ކޯފީގެ ހެޓްރިކުން ފުވައްމުލަކުން ގޯލްޑް ކަޕް ޑޮމިނޭޓް ކުރަނީ

ކޯފީ އޮއޫސޫގެ ހެޓްރިކުން 7-3 ގެ ނަތީޖާ އަކުން ހއ. ދިއްދޫ ބަލިކޮށް ފުވައްމުލަކުން ގޯލްޑް ކަޕްގައި ޑޮމިނޭޝަން ދަމަހައްޓައިފި އެވެ.

މުބާރާތުގެ ފުރަތަމަ މެޗު ކާމިޔާބުކޮށް، މިއަދުގެ މެޗަށް ފުވައްމުލައް ނުކުތީ ތިން ޕޮއިންޓާ އެކު އެވެ. މިއަދުގެ މެޗަކީ މުބާރާތުގައި ދިއްދޫން ކުޅުނު ފުރަތަމަ މެޗެވެ.

ފުވައްމުލައްގެ އަލީ ޝަމާލް އަބްދުﷲ ވަނީ މެޗު ގެ ކުރީކޮޅު އެ ޓީމަށް ލީޑްނަގައި ދީފަ އެވެ. އޭނާ ވަނީ ދެ ލަނޑު ޖަހައިފަ އެވެ. ޓީމުގެ ލީޑް ފުޅާކޮށް ދިނީ ވެސް އޭނާ އެވެ. އޭނާގެ ފުރަތަމަ ލަނޑު ޖެހިތާ 20 މިނެޓް ފަހުން ދެވަނަ ލަނޑު ޖެހި އެވެ.

ދިއްދޫ މުބާރާތުގައި ކުޅޭނީ އެއްވެސް ޕްރެކްޓިހެއް ނެތި އެވެ. ރިސޯޓްތަކުގައި ވަޒީފާ އަދާކުރާ ގިނަ ކުޅުންތެރިން ހިމަނައިގެން ނުކުތް ޓީމު އެކުގައި ހަމަވާނީ ހަމައެކަނި މެޗަށް ކަމަށް އެ ޓީމުގެ މެނޭޖަރު އަބްދޫ ރަޝީދު ބުންޏެވެ.

އެކަމަކު ގަލޮޅު ދަނޑަށް އާ ވިޔަސް ކުޅުމުގައި މާ ބޮޑަށް އެތަނެއް ނުދައްކަ އެވެ. އެ ޓީމުގެ ފުރަތަމަ ލަނޑު، މެޗުގެ 33 ވަނަ މިނެޓްގައި ޖެހީ އާދަމް އާޒިމެވެ.

ކޯފީގެ ފުރަތަމަ ލަނޑު އޭނާ ޖެހީ މެޗުގެ 42 ވަނަ މިނެޓްގަ އެވެ. ފުރަތަމަ ހާފް ނިމުމުގެ ކުރިން ހުސައިން ޝިފާހު ދިއްދު އަށް ދެވަނަ ލަނޑު ޖަހައި ދިނެވެ.

ދެވަނަ ޑިވިޝަނުގައި ނިއު ރޭޑިއަންޓަށް ކުރިން ކުޅުނު ކޯފީ ވަނީ ދެވަނަ ހާފުގެ ކުރީ ކޮޅު ފުވައްމުލަކުގެ ހަތަރުވަނަ ލަނޑު ކަހައިފަ އެވެ.

ރަނގަޅު ފޯމުގައި އޮތް ފުވައްމުލަކުގެ އަނެއް ތިން ލަނޑު ޖެހީ މެޗުގެ ފަހު 15 މިނެޓްގަ އެވެ. އެ ޓީމުގެ ފަސްވަނަ ލަނޑު 81 ވަނަ މިނެޓްގައި ޖަހައި ކޯފީ ހެޓްރިކް ފުރިހަމަ ކުރި އެވެ. އެގެ ހަތަރު މިނެޓް ފަހުން މުހައްމަދު އިޔާސް އަހްމަދު އެ ޓީމުގެ ހަވަނަ ލަނޑު ޖެހި އެވެ.

ޝިފާހް ވަނީ 89 ވަނަ މިނެޓްގައި ލިބުނު ޕެނަލްޓީއަކުން ދިއްދޫގެ ތިންވަނަ ލަނޑު ޖަހައިފަ އެވެ. ފުވައްމުލަކުގެ ހަތްވަނަ ލަނޑު ހުސައިން ޝަރީފް މުހައްމަދު ޖެހީ މެޗުގެ އިތުރު ވަގުތުގެ ފަސްވަނަ މިނެޓްގަ އެވެ.

މުބާރާތުގައި މިރޭ ކުޅޭ މެޗުގައި ވާދަކުރާނީ ގުރޫޕް ޑީގެ ރ. އަލިފުއްޓާއި ބ. ކެންދޫ އެވެ.