އަލިފުއްޓަށް އެއް ވަނަ، ކުއާޓާގައި ފުވައްމުލަކާ ދެކޮޅަށް

ނައިންޓީ ޕްލަސް ގޯލްޑް ކަޕުގެ ގުރޫޕް ސްޓޭޖުގެ ފަހު މެޗުގައި ރ. އަލިފުށިން ގަލޮޅު ދަނޑުގައި ފަހަތުން އަރައި 3-1 އިން މާލެ ސިޓީ ބަލިކޮށް، ގުރޫޕްގެ އެއް ވަނަ ޓީމުގެ ގޮތުގައި ކުއާޓާ ފައިނަލުގައި ފުވައްމުލައް ސިޓީއާ ވާދަކުރަން ޖެހިއްޖެ އެވެ.

އަލިފުށިން ގުރޫޕް ސްޓޭޖުގެ ދެ ވަނަ ބުރުގައި ވާދަކުރި ގުރޫޕްގެ ފުރަތަމަ މެޗުގައި ވަނީ ޅ. ކުރެންދޫ 1-0 އިން ބަލިކޮށްފަ އެވެ. އަދި މިދިޔަ ބުރާސްފަތި ދުވަހު މާލެ އަތުން ހަމަ މި ނަތީޖާއިން ކުރެންދޫ ބަލިވުމާ އެކު މާލެ އާއި އަލިފުއްޓަށް ވެސް ވަނީ ކުއާޓާގެ ޖާގަ ޔަގީން ވެފަ އެވެ.

އަލިފުއްޓާއި ފުވައްމުލައް ބައްދަލުކުރާ ކުއާޓާ ފައިނަލް މެޗު އަންނަ ބުރާސްފަތި ދުވަހުގެ ހަވީރު ކުޅޭނެ އެވެ. މާދަމާ ރޭ ކުޅޭ ކުއާޓާ ފައިނަލް މެޗުގައި މާލެ ނުކުންނާނީ، ފުވައްމުލައް ހިމެނުނު ގުރޫޕްގެ އެއް ވަނަ ހޯދި ކ. ގުރައިދުއާ ދެކޮޅަށެވެ.

މާލެ އަތުން ކުރެންދޫ ބަލިވި މެޗަށް ފަހު، ކުރެންދޫން ވަނީ މާލެ ޓީމުގައި ގަވާއިދާ ހިލާފަށް ރަށުން ބޭރުން ކުޅުންތެރިން ރަޖިސްޓަރީކުރި މައްސަލައެއް މުބާރާތް އިންތިޒާމްކުރާ ނައިންޓީ ޕްލަސް އަށް ހުށަހަޅައިފަ އެވެ. މި މެޗު އާދިއްތަ ދުވަހުގެ ހަވީރު ކުޅޭ ގޮތަށް ތާވަލް ކުރެވުނު ނަމަވެސް، މައްސަލައިގައި ގޮތެއް ނިންމަން މެޗު ފަސްކުރީ އެވެ.

މާލެ ކޮޅަށް މައްސަލަ ނިމުނު މި މެޗުގައި، މައްސަލަ އަމާޒުވި ދެ ކުޅުންތެރިންގެ ތެރެއިން އަހުމަދު ނާހިލް ރަޝީދު ވަނީ ދެ ވަނަ ހާފުގެ އަށްވަނަ މިނިޓުގައި ކުޅެން އަރައިފަ އެވެ. ނަމަވެސް ކާޑު ހަމަވެގެން ގައުމީ ޓީމަށް ވެސް ކުޅެމުން އަންނަ ޒުވާން ކުޅުންތެރިޔާ މުހައްމަދު މާއިޝް ރަޝީދު ހުރީ ރޭގެ މެޗަށް ސަސްޕެންޑް ވެފަ އެވެ.

އިއްޔެ ހަވީރު ކުޅުނު މެޗުގައި މާލޭން ވަނީ ދެ ވަނަ މިނިޓުގައި ލީޑު ނަގައިފަ އެވެ. ކޯނަރަކުން ހުރަސްވި ބޯޅަ ބޮލުން ޖަހައި ގޯލަށް ފޮނުވާލީ، 2018 ވަނަ އަހަރު އެއްވަނަ ޑިވިޝަން ކުޅުން ހުއްޓާލި ޑިފެންޑަރު އަލީ ޝަރީފް (އައްޔަ)، 46، އެވެ. މާލޭގެ ކެޕްޓަން ރިލްވާން ވަހީދު (ރިލޭ) ފުރަތަމަ 11 ގައި ނެތުމުން މި މެޗުގައި މާލޭގެ ކެޕްޓަންކަން ކުރީ، ވިކްޓަރީ އާއި ވެލެންސިއާ އަދި ޔުނައިޓެޑް ވިކްޓަރީ ވެސް ދަނޑުމަތީގައި ލީޑު ކުރި އައްޔަ އެވެ.

މާލޭގެ ގޯލަށް ފަހު ވެސް އަލިފުށިން މޮޅަށް ކުޅުނު މި މެޗުގައި އެޓީމުން އެއްވަރުކުރީ 42 ވަނަ މިނިޓުގަ އެވެ. އަހުމަދު ހުސާމް އޭރިއާ ތެރެއަށް ވަންނަނިކޮށް މާލޭގެ ހުސެއިން ފަޔާޒް ފައުލް ކުރުމުން ލިބުނު ހިލޭޖެހުން ކާމިޔާބު ކޮށްދިނީ ކެޕްޓަން މުހައްމަދު ރަޝީދު (ހޮކޭ) އެވެ.

މާލޭގެ އަލީ ޝިޔާހު (ޝިޔާ) އަށް ހޮކޭ ފައުލް ކޮށްގެން މާލެއަށް އަލުން ލީޑު ނަގަން ޕެނަލްޓީއެއް ވެސް ލިބުނެވެ. ނަމަވެސް އަލިފުށީގެ ގޯލްކީޕަރު އަބްދުއްސަދާދު އާދަމް ވަނީ މާލެ ޓީމުގެ މިސްރު މިޑްފީލްޑަރު ހަލީލް ޖަމާލް ފޮނުވާލި ޕެނަލްޓީ މަތަކޮށްފަ އެވެ.

ފަހު ހާފު ފެށިގެން ތިން މިނިޓު ތެރޭ ހުސެއިން ފަޔާޒް އަށް ދެ ވަނަ ރީނދޫ ކާޑަކާ އެކު ދެއްކި ރަތް ކާޑާ އެކު މާލޭން މި ހާފު ނިންމާލީ 10 ކުޅުންތެރިންނާ އެކު އެވެ.

އަލިފުށިން ލީޑު ނެގީ 57 ވަނަ މިނިޓުގަ އެވެ. ކުޅެން ނުކުތްތާ ދެ މިނިޓުތެރޭ އަލިފުއްޓަށް މި ގޯލު ޖަހައިދިނީ އިބްރާހިމް ސަލާމް އެވެ. އަދި ދެ މިނިޓު ފަހުން އެ ޓީމުގެ ތިން ވަނަ ލަނޑު ޖަހައިދިނީ ހުސާމް އެވެ. އޭނާ ވަނީ އަލިފުށިން ގުރޫޕް ސްޓޭޖުގައި ކުޅުނު ފަސް މެޗުގެ ތެރެއިން މޮޅުވި ހަތަރު މެޗުގައި ވެސް ގޯލު ޖަހައިފަ އެވެ.