މާލެ ޓީމުގެ ދެ ކުޅުންތެރިޔަކު ރަށްވެހިކަން ބަދަލުކުރި މައްސަލަ ފެންމަތިވެ، މެޗު ފަސްކޮށްފި

ގޯލްޑް ކަޕްގައި ކަނޑައަޅާފައިވާ އަދަދަށް ވުރެ އިތުރަށް ރަށުން ބޭރު ކުޅުންތެރިން ހިމަނައިގެން މާލެ އިން ކުޅުވި މައްސަލަ ފެންމަތިވެ، އަލިފުއްޓާ ދެކޮޅަށް ކުޅެން ހަމަޖައްސާފައިވާ މެޗު ފަސްކޮށްފި އެވެ.

އެ މައްސަލަ ފެންމަތި ކުރީ ޅ. ކުރެންދޫ ޓީމުންނެވެ.

މުބާރާތުގެ ދެ ވަނަ ބުރުގައި މިދިޔަ ބުރާސްފަތި ދުވަހުގެ ރޭ، މާލެ ޓީމު އަތުން ކުރެންދޫ ބަލިވި މެޗަށް ފަހު، އެ ރަށު ކައުންސިލުން ވަނީ ނައިންޓީ ޕްލަސް އަށް ފޮނުވި ސިޓީއަކުން އެ މައްސަލަ ހުށަހަޅައިފަ އެވެ.

ރަށުން ބޭރު ދެ ކުޅުންތެރިން ޖެހުމުގެ ހުއްދަ މުބާރާތުގެ ގަވާއިދުން ކޮންމެ ޓީމަކަށް ވެސް ލިބެ އެވެ. އެ ޖާގަ އަށް މާލެ އިން ރަޖިސްޓަރީ ކުރި ދެ ކުޅުންތެރިންނަކީ ރާއްޖޭގެ ފުރަތަމަ ޑިވިޝަނުގައި ވެސް ކުޅެމުން އަންނަ މިސްރުގެ މިޑްފީލްޑަރު ހަލީލް ޖަމާލާއި އަލީ މުނާޒެވެ.

އެކަމަކު ކުރެންދޫން ހުށަހެޅި މައްސަލައިގައި ބުނީ، މާލެ ޓީމުގެ އަހްމަދު މާއިޝް ރަޝީދާއި އަހްމަދު ނާހިލް އިބްރާހިމަކީ ދ. ހުޅުދެލީގެ ރަޖިސްޓަރީގައި އޮތް ދެ ކުޅުންތެރިން ކަމަށެވެ.

ސިޓީއާ އެކު، ކުރެންދޫން ހުށަހެޅި އައިޑީކާޑުތަކުގެ ފޮޓޯގައި ބުނެފައިވާ ގޮތުން އެ ދެ ކުޅުންތެރިން ނިސްބަތްވަނީ ހުޅުދެލީ އިރުވާގެއަށެވެ.

ކުރެންދުއާ ދެކޮޅަށް ކުޅުނު މެޗުގައި، އެ ދެ ކުޅުންތެރިން ވެސް ވަނީ ފުރަތަމަ 11 ގައި ހިމެނިގެން ކުޅެފަ އެވެ.

ނަމަވެސް އުސޫލާ ހިލާފަށް ރަށުން ބޭރު ކުޅުންތެރިން ހިމަނާފައިވާކަމަށް ކުރާ ތުހުމަތު މާލެ ޓީމުން ދޮގު ކުރި އެވެ.

މާލެ ޓީމުން ހުށަހެޅި އައިޑީކާޑުން އެނގޭ ގޮތުން އެ ދެ ކުޅުންތެރިން ރަޖިސްޓަރީކޮށްފައި ވަނީ ހެންވޭރު ހޮސްޓޮކް ގެއަށެވެ. މާލެ ޓީމުން ވަނީ އެ ދެ ކުޅުންތެރިންގެ އުފަންދުވަހުގެ ސެޓްފިކެޓްތަކުގެ ފޮޓޯ ވެސް ހުށަހަޅައިފަ އެވެ. އޭގައިވާ ގޮތުން މާއިޝްގެ ބައްޕަ އިބްރާހިމް ރަޝީދު ނިސްބަތް ވަނީ ވެސް ހޮސްޓޮކް ގެއަށެވެ. ނާހިލްގެ މަންމަ ފާތިމަތު ނަޒިއްޔާ ވެސް ނިސްބަތް ވަނީ އެ ގެއަށެވެ.

ކުރެންދޫން ނައިންޓީ ޕްލަސް އަށް ފޮނުވި ސިޓީގައި ބުނީ، މެޗު ނިމުމާ ހަމައަށް އެ ކުޅުންތެރިންގެ މައުލޫމާތު ފެންނަން ހުރި ގޮތުގެ ސްކްރީން ޝޮޓެއް ވެސް ހުށަހަޅާފައިވާނެ ކަމަށެވެ. އެ ފޮޓޯގައިވާ ގޮތުން މާއިޝް އާއި ނާހިލްގެ ރަޖިސްޓަރީ އޮތީ ދ. ހުޅުދެލީގަ އެވެ. އެހެންވެ، އެ މައްސަލަ ބަލައި މާލެ ޓީމާ މެދު ފިޔަވަޅު އަޅައި ދިނުމަށް ކުރެންދޫން އެދިފައި ވެ އެވެ.

ނައިންޓީ ޕްލަސްއިން ބުނީ އެ މައްސަލަ ލިބިފައިވާ ކަމަށާއި ޑިސިޕްލިނަރީ ކޮމިޓީން ބަލާނެ ކަމަށެވެ.