ކުޅުންތެރިންގެ ރަށްވެހިކަމުގެ މައްސަލަ ނިމުނީ މާލޭގެ ކޮޅަށް، ފަސްކުރި މެޗު މިއަދު ހަވީރު

ގޯލްޑް ކަޕުގައި ވާދަކުރާ މާލެ ޓީމުގައި ގަވާއިދާ ހިލާފަށް ރަށުން ބޭރު ކުޅުންތެރިން ރަޖިސްޓަރީކުރި މައްސަލަ މާލެ ކޮޅަށް ނިމިއްޖެ އެވެ.

މުބާރާތުގެ ދެ ވަނަ ބުރުގައި މިދިޔަ ބުރާސްފަތި ދުވަހުގެ ރޭ، މާލެ ޓީމު އަތުން ކުރެންދޫ 1-0 އިން ބަލިވި މެޗަށް ފަހު، އެ ރަށު ކައުންސިލުން ވަނީ ނައިންޓީ ޕްލަސް އަށް ފޮނުވި ސިޓީއަކުން އެ މައްސަލަ ހުށަހަޅައިފަ އެވެ.

ކުރެންދޫން ހުށަހެޅި މައްސަލަ ބެލުމަށް މަގުފަހި ކުރުމުގެ ގޮތުން، ރ. އަލިފުއްޓާ ދެކޮޅަށް މާލެއިން އިއްޔެ ކުޅެން ހަމަޖެހިފައިވާ މެޗު ފަސް ކުރި އެވެ. ރަށުން ބޭރު ދެ ކުޅުންތެރިން ޖެހުމުގެ ހުއްދަ މުބާރާތުގެ ގަވާއިދުން ކޮންމެ ޓީމަކަށް ވެސް ލިބެ އެވެ. އެ ޖާގަ އަށް މާލެ އިން ރަޖިސްޓަރީ ކުރި ދެ ކުޅުންތެރިންނަކީ ރާއްޖޭގެ ފުރަތަމަ ޑިވިޝަނުގައި ވެސް ކުޅެމުން އަންނަ މިސްރުގެ މިޑްފީލްޑަރު ހަލީލް ޖަމާލާއި އަލީ މުނާޒެވެ.

އެކަމަކު ކުރެންދޫން ހުށަހެޅި މައްސަލައިގައި ބުނީ، މާލެ ޓީމުގެ އަހްމަދު މާއިޝް ރަޝީދާއި އަހްމަދު ނާހިލް އިބްރާހިމަކީ ދ. ހުޅުދެލީގެ ރަޖިސްޓަރީގައި އޮތް ދެ ކުޅުންތެރިން ކަމަށެވެ.

ސިޓީއާ އެކު، ކުރެންދޫން ހުށަހެޅި އައިޑީކާޑުތަކުގެ ފޮޓޯގައި ބުނެފައިވާ ގޮތުން އެ ދެ ކުޅުންތެރިން ނިސްބަތްވަނީ ހުޅުދެލީ އިރުވާގެ އަށް ކަމަށެވެ. ކުރެންދުއާ ދެކޮޅަށް ކުޅުނު މެޗުގައި، އެ ދެ ކުޅުންތެރިން ވެސް ވަނީ ފުރަތަމަ 11 ގައި ހިމެނިގެން ކުޅެފަ އެވެ.

ނަމަވެސް އުސޫލާ ހިލާފަށް ރަށުން ބޭރު ކުޅުންތެރިން ހިމަނާފައިވާކަމަށް ކުރާ ތުހުމަތު މާލެ ޓީމުން ދޮގު ކުރި އެވެ.

މާލެ ޓީމުން ހުށަހެޅި އައިޑީކާޑުން އެނގޭ ގޮތުން އެ ދެ ކުޅުންތެރިން ރަޖިސްޓަރީކޮށްފައި ވަނީ ހެންވޭރު ހޮސްޓޮކް ގެއަށެވެ. މާލެ ޓީމުން ވަނީ އެ ދެ ކުޅުންތެރިންގެ އުފަންދުވަހުގެ ސެޓްފިކެޓްތަކުގެ ފޮޓޯ ވެސް ހުށަހަޅައިފަ އެވެ. އޭގައިވާ ގޮތުން މާއިޝްގެ ބައްޕަ އިބްރާހިމް ރަޝީދު ނިސްބަތް ވަނީ ވެސް ހޮސްޓޮކް ގެއަށެވެ. ނާހިލްގެ މަންމަ ފާތިމަތު ނަޒިއްޔާ ވެސް ނިސްބަތް ވަނީ އެ ގެ އަށެވެ.

ގޯލްޑް ކަޕް، އިންތިޒާމުކުރާ ނައިންޓީ ޕްލަސްގެ ކޮމިޓީން ބުނީ ހުށަހެޅިފައިވާ ރަސްމީ ލިޔެކިޔުންތަކަށް ބެލުމަށް ފަހު، އެ ކުޅުންތެރިންނަކީ މާލޭގެ ރަށްވެހިކަން އެނގެން އޮތް ކަމަށެވެ.

އެހެންވެ އެ ދެ ކުޅުންތެރިން މާލެ ޓީމަށް ކުޅުމުގައި މައްސަލައެއް އޮތް ކަމަށް ނުފެންނަކަމަށް، ކުރެންދޫ ކައުންސިލަށް ނައިންޓީ ޕްލަސްއިން ފޮނުވި ސިޓީގައި ބުނެފައިވެ އެވެ. އަދި ފަސް ކުރި މެޗު މިއަދު ހަވީރު ކުޅެން ހަމަޖައްސާފައިވާކަން، މާލެ ޓީމަށާއި އަލިފުށީގެ ޓީމަށް ވެސް ނައިންޓީ ޕްލަސްއިން ވަނީ އަންގައިފަ އެވެ.