ގުރައިދޫން މާލެއާ ދެކޮޅަށް ނުކުންނަނީ އަތޮޅުތެރޭގެ ފުޓްބޯޅައަށްޓަކައި!

ފުޓްބޯޅައިގެ ވަސީލަތްތަކާއި ފުރުސަތުތައް ވެސް އޮތީ މާލެއަށް ޖަމާކޮށް ތޮއްޖައްސައިފަ އެވެ. ފުޓްބޯޅައިގެ ފޯރި ގެއްލި ރާއްޖޭގެ މުޅި ފުޓްބޯޅަ އަށް އޭގެ އަސަރު ކުރި އެވެ. ދިވެހިން އެންމެ ގިނައިން ކުޅޭ އަދި އެންމެ ގިނައިން ބަލާ ކުޅިވަރު އަޑިއަޅާލައިގެން ދިޔަ ސަބަބުތަކުގެ ތެރެއިން އެއް އެއް ސަބަބަކަށް އެކަން ވާނެ އެވެ.

ރާއްޖޭގެ މައި ލީގަކީ ހަމައެކަނި މާލޭގެ 10 ކްލަބަށް އެކަނި ބައިވެރިވެވޭ އެއްޗަށް އޮތް އޮތުން ބަދަލު ނުކުރި އެވެ. އަތޮޅުތަކުގެ ޓީމުތަކަށް ހާއްސަކޮށް ބޭއްވި ޒޯން ޗެމްޕިއަންސް ލީގާއި މިނިވަން ޗެމްޕިއަންޝިޕް ވެސް އެފްއޭއެމުން ހުއްޓާލި އެވެ. އެފްއޭއެމުން ހޯމް އެންޑް އަވޭ އުސޫލުން ބާއްވަން އިއުލާން ކުރި ލީގު ވެސް ވީ ފްލޮޕަކަށެވެ. އެތަށް ރަށެއް ފުޓްބޯޅަ މަތިން ފޫހިވެ މާޔޫސްވި އެވެ. އޭގެ ތެރެއިން އެއް ރަށަކީ ކ. ގުރައިދޫ އެވެ.

ކުރިން ރާއްޖޭގެ މައި ލީގުގައި ވާދަކުރި ރަށުން އޮތީ ފުޓްބޯޅައިގައި އެ ރަށުގެ ނަން ދިރުވޭނެ ފުރުސަތަކަށް ބަލަބަލަ އެވެ. ސިޓީތަކާއި ރަށްތަކަށް ހުޅުވާލައިގެން މިހާރު ކުރިއަށްދާ ނައިންޓީ ޕްލަސް ގޯލްޑް ކަޕްގައި ވެސް ވާދަކުރަން އެންމެ ފުރަތަމަ ޝައުގުވެރިކަން ފާޅު ކުރި ރަށްތަކުގެ ލިސްޓްގައި ގުރައިދޫ ހިމެނެ އެވެ.

ކުއާޓާ ފައިނަލުގައި މާލެއާ ދެކޮޅަށް މިރޭ ކުޅޭ މެޗަށް ގުރައިދޫ ނުކުންނަނީ އެ ރަށުން ވާހަކަ ދެއްކި މީހަކު ބުނި ގޮތުގައި އަތޮޅުތެރޭގެ ފުޓްބޯޅައަށްޓަކަ އެވެ.

"ރާއްޖޭގެ އަތޮޅު ފުޓްބޯޅައަށްޓަކައި ގުރައިދޫ ނުކުންނަން ވީ. އަތޮޅުތަކަށް ފުޓްބޯޅައިން ފުރުސަތު ދިނުން ލާޒިމުކަން ހާމަކޮށްދޭން ލިބޭ ފުރުސަތަކަށް މިކަން ވާނެ،" އޭނާ ބުންޏެވެ.

"ފުޓްބޯޅައިގައި ދިރުން އޮތީ އަތޮޅު ފުޓްބޯޅައިގައިކަން ސާބިތުކޮށް ދިނުން ގުރައިދުއަށް އޮތީ. އަޅުގަނޑު ގަބޫލު ކުރަނީ އެ ކުދިން މިރޭ އެކަން ކުރާނެކަމަށް."

މުބާރާތުގައި ވާދަކުރި 17 ޓީމުގެ ތެރެއިން ސަޕޯޓަރުންގެ ފޯރި އެންމެ ދަށްކޮށް ފެނުނު އެއް ޓީމަކީ މާލެ އެވެ. ސަޕޯޓަރުންގެ ފޯރި އެންމެ ރަނގަޅަށް ފެނުނު ޓީމުތަކުގެ ތެރޭގައި ގުރައިދޫ ހިމެނެ އެވެ. ދެ ވަނަ ބުރުގައި އެ ޓީމު ކުޅުނު ފަހު މެޗު ބަލަން ދެ ދޯނީގައި އެ ރަށުން މީހުން މާލެ އަށް ދަތުރު ކުރި އެވެ.

މާލެއާ ދެކޮޅަށް ނުކުންނައިރު ގުރައިދުއަށް އޮތް އެންމެ ބޮޑު އެޑްވާންޓޭޖަކީ ވެސް އެ ޓީމުގެ ފަހަތުގައި ތިބި އެ ރަށުގެ ސަޕޯޓަރުން ކަމަށް އެ ރަށުން ވާހަކަ ދެއްކި އޮފިޝަލް ބުންޏެވެ.

މިރޭ ވެސް އެ ރަށުގެ ސަޕޯޓަރުން މާލެ އަށް ދަތުރު ކުރާނެ އެވެ. ކުރީގެ މެޗަށް ވުރެ ގިނަ މީހުން މާލެ އަށް ދަތުރުކުރަން ލިސްޓްކޮށްފައިވާ ކަމަށް އެ ޓީމުގެ އޮފިޝަލަކު ބުންޏެވެ.