ކުރެންދޫ ކަޓުވާލުމަށްފަހު މާލޭން އަލިފުށި ގޮވައިގެން ކުއާޓާއަށް

ޅ. ކުރެންދޫ 1-0 އިން ބަލިކޮށް، މާލެ ސިޓީން ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުން ޖާގަ ހޯދައިފި އެވެ.

މި ނަތީޖާއާ އެކު، ގުރޫޕް ސްޓޭޖްގެ ދެވަނަ ބުރުގެ ގުރޫޕް އެޗް އިން ކުއާޓާއަށް ދަ ދެ ޓީމު ވަނީ ޔަގީން ވެފަ އެވެ. މާލޭން ތިން ޕޮއިންޓް ހޯދާފައި ވާއިރު، މި ގުރޫޕްގެ ފުރަތަމަ މެޗުގައި ރ. އަލިފުށިން ވެސް ވަނީ ހަމަ މި ނަތީޖާއިން ކުރެންދޫ ބަލިކޮށް ތިން ޕޮއިންޓް ހޯދައިފަ އެވެ.

މި ގުރޫޕްގެ ފަހު މެޗުގައި އާދިއްތަ ދުވަހުގެ ހަވީރު މާލެ އާއި އަލިފުށި ބައްދަލުކުރާނެ އެވެ. އެ މެޗު ވާނީ ގުރޫޕްގެ އެއްވަނަ ކަނޑައަޅާ މެޗަށެވެ.

މާލޭން މިރޭ ޖެހި ހަމައެކަނި ގޯލު 53 ވަނަ މިނިޓުގައި ޖަހައިދިނީ މުހައްމަދު ޔަޒްދާން ހުސެއިން އެވެ. އަހުމަދު މާއިޝް ރަޝީދު ހުރަސް ކޮށްލި ބޯޅަ، ޔަޒްދާން ފޮނުވާލުމުން ގޯލަށް ވަނީ ކުރެންދޫގެ ކީޕަރު ސުޖަން ޕެރޭރާގެ އަތުގައި ޖައްސާލާފައި ގޯލު އަރިމަތީ ދަނޑީގައި ޖެހިފަ އެވެ. އޭގެ ކުރިން ހަލީލް ޖަމާލް ހުރަސްކޮށްލި ބޯޅަ މުޅިން ހުސްކޮށް ހުރެ، މި މެޗުގެ ކެޕްޓަން އަބްދުﷲ މުއާޒް (އޮޓޯ) ބޮލުން ފޮނުވާލުމުން އަމާޒުވީ އަރިމަތީ ދަނޑިއަށެވެ.

މާލޭގެ ގޯލަށް ފަހު ކުރެންދޫ އިން ތަނަވަސްކުރި ފުރުސަތުތަކުގައި އަބްދުލް ވާހިދު އިބްރާހިމް (ވާޑު) އާއި އަލީ އިބްރާހިމް ފޮނުވާލި ހަމަލާތައް ގޯލާ އަމާޒުކޮށް ނުލެވުނެވެ. އަދި އެޓީމުގެ އަބްދުއްރަހްމާން ސަމާއު މުހައްމަދު ހުސްކޮށް އަރައި ފޮނުވާލި ބޯޅަ ދިފާއު ކުރީ މާލޭގެ ކީޕަރު ތޮލާލް ހަސަން (ޓޮޕްލަކް) އެވެ.

ޓޮޕްލަކް ވަނީ ފުރަތަމަ ހާފުގައި ބަދަލު ކުޅުންތެރިއެއް ގޮތުގައި އެރި ކުރެންދޫގެ އަހުމަދު މާހިރު މުހައްމަދު ހުސްކޮށް ހުރެ ފޮނުވާލި ހަމަލާއެއް ވެސް ދިފާއު ކޮށްފަ އެވެ.

މިއީ ޓޮޕްލަކް މުބާރާތުގައި ކުޅޭ ފުރަތަމަ މެޗެވެ. ފުރަތަމަ ބުރުގެ ތިން މެޗުގައި ވެސް މާލޭގެ ގޯލް ބެލެހެއްޓީ ކީޕަރު އާތިފް މުހައްމަދެވެ. ފުރަތަމަ ބުރުގެ ފަހު މެޗުގެ އިތުރު ވަގުތުގައި އޭނާ އަށް އަނިޔާވެގެން އެ މެޗުގައި ޓީމުގެ ބަދަލުތައް ހަމަވެފައި ވުމާ ގުޅިގެން ގޯލަށް އެރީ ކެޕްޓަން ރިލްވާން ވަހީދު (ރިލޭ) އެވެ. ނަމަވެސް ދެ ރީނދޫ ކާޑު ހަމަވުމާ ގުޅިގެން މި މެޗަށް ރިލްވާން ހުރީ ސަސްޕެންޝަނުގަ އެވެ.

ކުރެންދޫގެ ކީޕަރު، ލަންކާ ގައުމީ ޓީމްގެ ކެޕްޓަން ސުޖަން ވަނީ މާލޭން ފުރަތަމަ ހާފުގައި ލީޑު ނެގިޔަ ނުދޭން މުހިއްމު ސޭވްތަކެއް ކޮށްފަ އެވެ. އެގޮތުން އަލީ ޝިޔާހް (ޝިޔާ) ފޮނުވާލި ދެ ހަމަލާ މަތަކުރި އިރު މުއާޒް ފޮނުވާލި ހަމަލާއެއް ވެސް ދިފާއު ކުރި އެވެ. މި މެޗުގައި މާލޭ ޓީމަށް ކުޅޭ ހަލީލް ޖަމާލް ފޮނުވާލި ހަމަލާތައް ގޯލާ އަމާޒެއް ނުވި އެވެ.