ތިމަރަފުށީގެ ބާރު ކަނޑުވާލުމަށް ފަހު ގުރައިދޫން ކުއާޓާ ފައިނަލަށް

ތ. ތިމަރަފުށި 1-0 ން ބަލިކޮށް، ގޯލްޑް ކަޕްގެ ކުއާޓާ ފައިނަލަށް ކ. ގުރައިދޫ ދަތުރުކޮށްފި އެވެ.

ދެވަނަ ބުރުގައި ތިމަރަފުށީގެ ދެ މެޗުން އެ ޓީމަށް ލިބުނީ އެންމެ ޕޮއިންޓެކެވެ. ފުވައްމުލަކާ ކުޅެ ތިމަރަފުށިން އެއްވަރު ކުރި އެވެ. މިއަދުގެ މެޗަށް ފަހު އެ ޓީމަށް ވަނީ ދެވަނަ ބުރު ނިމިފަ އެވެ. އަމިއްލަ ބާރެއް މިހާރަކު ނެތެވެ.

ތިމަރަފުއްޓަށް ދެން ޖެހޭނީ ގުރައިދުއާއި ފުވައްމުލަކު ކުޅޭ މެޗަށް އިންތިޒާރު ކުރާށެވެ. އެ މެޗުން ތަފާތު ބޮޑުކޮށް ފުވައްމުލައް ބަލިވެއްޖެނަމަ، ލަނޑުގެ ތަފާތަށް ބަލައި ތިމަރަފުއްޓަށް ކުއާޓާގެ ޖާގަ ލިބޭނެ އެވެ.

އެ ގުރޫޕްގައި ދެން ބާކީ އޮތީ ވެސް ފުވައްމުލަކާއި ގުރައިދޫގެ މެޗު އެކަންޏެވެ. މެޗުން ގުރައިދޫ މޮޅުވުމުން ކުއާޓާ ފައިނަލުގެ ޖާގަ ކަށަވަރު ކުރި ފުރަތަމަ ޓީމަކަށް ވީ ވެސް އެ ޓީމެވެ.

ދެވަނަ ބުރަށް ގުރައިދޫ ނުކުތީ ފުރަތަމަ ބުރުގައި އެ ޓީމުން ނުފެނުނު މުހައްމަދު ނާއިމް ހިމަނައިގެންނެވެ. ގައުމީ ޓީމުގެ ކުރީގެ މިޑްފީލްޑަރު ވަނީ ގުރައިދޫ މެޗުން މޮޅުކޮށް ދިނުމުގައި މުހިންމު ދައުރެއް އަދާކޮށްފަ އެވެ.

މެޗުގެ 14 ވަނަ މިނެޓްގައި އެ ޓީމުގެ ލަނޑު މިސްރުގެ ފޯވާޑް އަހްމަދު އިބްރާހިމް އަލް ހަޝަޝް، ޖެހީ ނާއިމް ދިން ހިތްގައިމު ބޯޅަ އަކުންނެވެ. ގުރައިދޫން އުފެއްދި ހަމަލާގައި ނާއިމް އަށް ހާފުގެ ތެރެއިން ލިބުނު ބޯޅަ ހިފައިގެން ގޮސް އޭރިއާގެ ބޭރުން އަހްމަދު އިބްރާހިމަށް އެބޯޅަ ދިނުމުން އޭރިއާ ތެރެއަށް ވަދެ އޭނާ އެ ބޯޅަ ފޮނުވާލީ ގޯލްގެ ތިރީ ކަނަށެވެ.

މެޗުގެ މޮޅު ކުޅުންތެރިޔަކަށް ހޮވުނީ ގުރައިދޫގެ ޑިފެންޑަރު އަހްމަދު ނޫމާން (ހެލްމެޓް) އެވެ.