36 އަހަރަށް ފަހު ހުރާ ބަލިކޮށް ގުރައިދޫން ތާރީހު ބަދަލުކޮށްފި

ގޯލްޑް ކަޕްގެ ގުރޫޕް ސީގައި މިއަދު ހަވީރު ކ. ހުރާ 3-1 ން ބަލިކޮށް 36 އަހަރުވީ ތާރީހަށް ގުރައިދޫން ނިމުން ގެނެސްފި އެވެ.

މިއީ 36 އަހަރަށް ފަހު ހުރާގެ މައްޗަށް ގުރައިދޫން ހޯދި ފުރަތަމަ މޮޅެވެ. މީގެ ކުރިން، ގުރައިދުއަށް ހުރާ ބެލިކުރެވިފައި ވަނީ 1988 ގެ ރާއްޖެތެރޭ ފުޓްބޯޅަ މުބާރާތުގަ އެވެ. އަމިއްލަ ރަށުގައި ކުޅުނު މެޗު 2-1 ން ކާމިޔާބުކޮށް ޒޯން މުބާރާތަށް ގުރައިދޫ ކޮލިފައިވި އެވެ.

ގުރައިދޫގެ ކުރީގެ ކުޅުންތެރިން ބުނާ ގޮތުގައި އޭގެ ފަހުން މިއަދާ ހަމައަށް، ގުރައިދޫ އަށް ހުރާ ބަލިކުރެވިފައެއް ނުވެ އެވެ. ހުރައަށް ނިސްބަތްވާ ހުއްރިއްޔާ ސްޕޯޓްސް ކްލަބާއި ގުރައިދުއަށް ނިސްބަތްވާ ގުރައިދޫ ޒުވާނުންގެ ކަމިއްޔާ ވެސް ފުރަތަމަ ޑިވިޝަނުގައި މާލޭގައި އަހަރުތަކެއް ވަންދެން ކުޅުނު އިރު ވެސް ހުރާގެ އެ ކްލަބްގެ މައްޗަށް ގުރައިދޫ ޓީމަށް މޮޅެއް ހޯދިފައެއް ނުވެ އެވެ. ގުރައިދޫގެ އެ ޓީމުން ވަނީ ހަތަރު އަހަރު ފުރަތަމަ ޑިވިޝަނުގައި ކުޅެފަ އެވެ.

ގުރައިދޫގެ ފުރަތަމަ ދެ ލަނޑު އެ ޓީމުން ޖެހީ މެޗުގެ ފުރަތަމަ ހާފުގެ ފަހު ފަސް މިނެޓް ތެރޭގަ އެވެ. އެ ޓީމުގެ ފުރަތަމަ ލަނޑު އިމްއާދު އަބްދުލް ގައްޔޫމް ޖެހީ ނާއިޝް އާދަމް ތަނަވަސްކޮށް ދިން ފުރުސަތަކުންނެވެ.

އިމްއާދު ވަނީ ދެ ލަނޑު ޖަހައިފަ އެވެ. ގުރައިދޫގެ ދެ ވަނަ ލަނޑު އިޝްއާފް މުހައްމަދު ފިރާގް ޖެހީ 45 ވަނަ މިނެޓްގަ އެވެ.

ދެވަނަ ހާފްގެ ކުރީކޮޅުގައި އިމްއާދު ވަނީ އޭނާގެ ދެވަނަ ލަނޑު ޖަހައިފަ އެވެ. ހުރާގެ ލަނޑު 73 ވަނަ މިނެޓްގައި ޖެހީ މުހައްމަދު ތަޝްމީން (ތައްތި) އެވެ.