ޒަމާންތަކަކަށް ފަހު ހުރަޔަށް އަލުން ފުޓްބޯޅައިގެ ބޮޑު ރޫހެއް!

ގޯލްޑް ކަޕުން ކ. ހުރާ އަލްވަދާއުކިޔަން ޖެހުނަސް، މި މުބާރާތުގައި ވާދަކޮށްގެން ހުރާގެ ފުޓްބޯޅަ އަށް އަނެއްކާވެސް އާ ރޫހެއް އަތުވެއްޖެ އެވެ.

އެ ރަށަށް ނިސްބަތްވާ ހުއްރިއްޔާ ސްޕޯޓްސް ކަލްބަކީ ރާއްޖޭގެ މައި ލީގުގެ ކުރީގެ ޗެމްޕިއަނެކެވެ. އެރަށުން އުފެއްދި ގިނަ ކުޅުންތެރިންތަކެއް ގައުމީ ޓީމަށް ކުޅެފައި ވެ އެވެ. ރާއްޖޭގެ ޑޮމެސްޓިކް ފުޓްބޯޅައިގައި އޭރު އެ ކްލަބުން ހޯދި ކާމިޔާބުގެ ފަހަތުގައި ތިބީ ހުރާގެ ރައްޔިތުންނެވެ.

ގޯލްޑް ކަޕްގައި ހުރާގެ ޓީމަށް އިރުޝާދު ދިން ކޯޗު އަދި ހުރިއްޔާގެ ލެޖެންޑް، މައުސޫމް އަބްދުލް ޣަފޫރު (މާސޭ) ބުނީ، އެ ޓީމަށް ދެވަނަ ބުރަށް ނުދެވުނު ނަމަވެސް، ފުޓްބޯޅައިގެ ބޮޑު ރޫހެއް އަނެއްކާވެސް އެ ރަށަށް އަތުވެއްޖެ ކަމަށެވެ.

"މިހާ ޒުވާން ޓީމެއް މިހާ ރަނގަޅަށް ކުޅެވޭނެކަމަކަށް ރަށު މީހުން ހީއެއް ނުކުރޭ. ތެދެއް އަހަރެމެންނަށް ދެވަނަ ބުރަކަށް ނުދެވުނު. އެކަމަކު މި ޓީމަށް ތައްޔާރުވާން އޮތް ހާލަތާއި މިހުރިހާ ކަމަކަށްބަލާއިރު ރަނގަޅު ގޭމެއް ކުޅެފި. އޭގެ ސަބަބުން ރަށު ތެރޭގައި ވެސް ވަރަށް ބޮޑު ފޯރިއެއް މިހާރު އެބައޮތް،" އޭނާ ބުންޏެވެ.

އޭނާ ބުނީ މުބާރާތަށް ތައްޔާރުވާން ހުރައިން ނެރުނީ ޒުވާން ޓީމެއް ކަމަށެވެ. ގަވާއިދުން ޕްރެކްޓިސް ކުރިއަކަށް ނުގެންދެ އެވެ. ރިސޯޓްތަކުގައި ވަޒީފާ އަދާކުރަމުން ބައެއް ކުޅުންތެރިން އަންނަނީ މެޗަށެވެ.

ގުރޫޕް ސްޓޭޖު އެ ޓީމުން ނިންމާލީ ތިން ޕޮއިންޓާ އެކު އެވެ. މައުސޫމް ބުނީ ބަލިވި ދެ މެޗުގައި ވެސް ރަނގަޅު ފުޓްބޯޅައެއް ކުޅެން ހުރާގެ ޓީމުން މަސައްކަތް ކުރި ކަމަށެވެ.

އޭއެފްސީ ކޯޗިން ސީ ލައިސެންސް ހާސިލުކޮށްފައިވާ މައުސޫމް ބުނީ ޓީމަށް ދިމާވި އެންމެ ބޮޑު މައްސަލައަކީ ސްޓައިކަރެއް ނެތުން ކަމަށެވެ. އަންނަ އަހަރު ވެސް ގޯލްޑް ކަޕް ބާއްވާނަމަ، ބޭރު ކުޅުންތެރިން ގެނެސް މުބާރާތަށް ރަނގަޅަށް ތައްޔާރުވުމުގެ ވިސްނުން ގެންގުޅޭ ކަމަށް އޭނާ ބުންޏެވެ.

"ޒަމާންތަކަކަށް ފަހު މި ރަށުތެރޭގައި މިހާ ބޮޑަށް ފޯރިއެއް މިއައީ. އެންމެވެސް ދައްކަނީ އެ ވާހަކަ،" އޭނާ ބުންޏެވެ.

"ފުޓްބޯޅައިގައި އަނެއްކާވެސް ހުރާ ބޭއްވަން މިހާރު އެންމެވެސް ބޭނުންވެއްޖެ. އެކަން ފެނިގެން ހިނގައްޖެ. އަންނަ އަހަރުވެސް މި މުބާރާތް ބާއްވަންޏާ ވާދަކުރާނެ. ބޭރުން ރަނގަޅު ސްޓައިކަރަކާއި ދެން ބަލި އެހެން ޑިޕާޓްމެންޓަށް ބިދޭސި ކުޅުންތެރިން ގެނެސްގެން ވާދަކުރުމުގެ ވިސްނުންތަކެއް އެބަހުރި. އެ ވާހަކަ ދެކެވިފަ މިއޮތީ."

އައްޑުއާ ދެކޮޅަށް ކުޅުނު މެޗަށް ހުރާގެ ސަޕޯޓަރުން ދަނޑަށް ވަދެ ޓީމަށް ތަރުހީބު ދިނެވެ. މާސޭ ބުނީ ފުޓްބޯޅައިގައި އަލުން ކުރިއަށްދާން އެކަމުގެ ސަބަބުން ބޮޑު ހިތްވަރަކަށް ވެއްޖެ ކަމަށެވެ.

ހުރަޔަކޮންމެ އަހަރަކުވެސް ގޯލްޑް ކަޕް ބޭއްވުމުގެ ވާހަކަތައް ނައިންޓީ ޕްލަސްއިން ވަނީ ކުރިން ވެސް ދައްކައިފަ އެވެ. އިތުރު އާ ބަދަލުތަކާ އެކު އަންނަ އަހަރު މުބާރާތްވެސް ކުރިއަށްގެންދާނެ ކަމަށް ނައިންޓީ ޕްލަސްއިން ބުނެފައި ވެއެވެ.