އަލީ ޝިހާމް މިހާރު ބޭނުންވަނީ ކޯޗިން ދަސްކުރަން

ރާއްޖޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ އަލީ ޝިހާމް (ހުރާ އައްޔަ) ކޯޗިންގައި އިތުރަށް ކުރިއަށް ދިއުމަށްޓަކައި އޭއެފްސީ ސީ ލައިސަންސް ނެގުމުގެ މަސައްކަތް ފަށައިފި އެވެ.

އައްޔަ ބައިވެރިވެފައިވަނީ އެފްއޭއެމް އާއި ޔުނައިޓެޑް ވިކްޓްރީ ގުޅިގެން އިއްޔެ މާލޭގައި ފެށި އޭއެފްސީ ސީ ލައިސަންސް ކޯހުގަ އެވެ.

އަނިޔާގެ ސަބަބުން 2004 ވަނަ އަހަރު ފުޓްބޯޅަ ކުޅުން ހުއްޓާލި އައްޔަ އޭގެ ފަހުން މަސައްކަތްކުރަމުން އައީ ޓޫރިޒަމް އިންޑަސްޓްރީގަ އެވެ. އެކަމަކު މިދިޔަ އަހަރު އުފަން ރަށް ކ. ހުރައަށް ބަދަލުވެ މިހާރު މަސައްކަތްކުރަނީ އެ ރަށުގައި ހުންނަ ޔޫތު މިނިސްޓްރީގެ އެސޯސިއޭޓަކަށެވެ.

ރަށަށް ބަދަލުވި ފަހުން އައްޔަ އަންނަނީ އެ ރަށުގެ ފުޓްބޯޅަ އެކަޑަމީގައި ވެސް ކޮންމެވެސް ވަރަކަށް ކޯޗުކޮށްދެމުންނެވެ. އަދި ރަށްރަށާއި، ރިޒޯޓްތަކުގައި ބާއްވާ ފުޓްސަލް މުބާރާތްތަކުގައި އޭނާ ކޯޗުކޮށްދެ އެވެ.

އައްޔަ "މިހާރު" އަށް ބުނީ އޭނާ ބޭނުންވަނީ ކޯޗިން ރަނގަޅަށް ދަސްކޮށްގެން އެ މަސައްކަތުގައި އުޅެން ކަމަށެވެ.

"ކުޅުމާއި، ކޯޗުކޮށްދިނުމަކީ މުޅިން ތަފާތު ދެ ކަމެއް،" އައްޔަ ބުންޏެވެ.

"ކިތަންމެ މޮޅަށް ކުޅެފައި ހުއްޓަސް ކޯޗުކަމެއް އަދި ނުކުރެވިދާނެ. މިއީ ދަސްކޮށްގެން ކުރަން ޖެހޭ ކަމެއް."

ނުރަސްމީ ބައެއް ކޯޗިން ޓްރެއިނިންތަކުގައި ބައިވެރިވެފައިވާ އައްޔަ ބުނީ ސީ ލައިސަންސް ކޯހުން މިހާރު ވެސް ވަރަށް ގިނަ ކަންކަން ދަސްވެއްޖެ ކަމަށާއި، އޭނާ ބޭނުންވަނީ މިކަމުން ދެވޭ އެންމެ ކުރިއަކަށް ދިއުމަށް ކަމަށެވެ.

"ވަރަށް ޝައުގުވެރިކަމެއް މިއީ. އިރާދަކުރެއްވިއްޔާ ބީ ލައިސަންސް އާއި ސީ ލައިސަންސް ވެސް ނަގާނަން. އުއްމީދަކީ ކޯޗިންގައި ނެގެން އޮތް އެންމެ މަތީ ލައިސަންސަކާ ހަމަޔަށް ދިއުން،" އައްޔަ ބުންޏެވެ.

މި ކޯހުގައި ކިޔަވައިދެނީ އޭއެފްސީ ޕްރޯ ލައިސަންސް ހާސިލްކޮށްފައިވާ މުހައްމަދު ޝާޒްލީ (ޝާޒް) އާއި ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އަހުމަދު ޝާކިރު (ޝާކިއްޓޭ) އެވެ.

ކޯޗިން ލައިސަންސް ނެގިޔަސް، ޕްރޮފެޝަނަލް ކޯޗަކަށް ވުމުގެ ވިސްނުމެއް އައްޔަގެ ނެތެވެ. ފުރަތަމަ ޑިވިޝަނުން ވެސް އޭނާ ނުފެންނާނެ އެވެ. އައްޔަ ބޮޑަށް ބޭނުންވަނީ ޅަ ކުޅުންތެރިންނަށް ތަމްރީންދީ، ހުނަރުވެރި ކުޅުންތެރިން އުފެއްދުމަށެވެ.

"ބޮޑަށް އެކަޑަމީގައި އުޅޭނީ. އެކަމަކު ކުދިކުދި ފުޓްބޯޅަ މުބާރާތްތަކާއި ފުޓްސަލް މުބާރާތްތަކުން ފެންނާނެ ކޯޗެއްގެ ގޮތުގައި. އަންނަ އަހަރަށް ވެސް އެބަހުރި އޮފާތަކެއް ލިބިފައި،" އައްޔަ ބުންޏެވެ.

ހުރާގެ މަޝްހޫރު ހުއްރިއްޔާ ސްޕޯޓްސް ކްލަބުން ވިދާލި އައްޔަ އަކީ އެ ޓީމުން 1999 އާއި 2000 ވަނަ އަހަރުގެ ޕޮމިސް ކަޕް ކާމިޔާބުކުރިއިރު މުހިއްމު ދައުރެއް އަދާކުރި ކުޅުންތެރިއެކެވެ. އޭގެ ފަހުން 2001 ގައި ވެލެންސިއާ އަށް ބަދަލުވެ އަލީ އަޝްފާގް (ދަގަނޑޭ) އާއި އަލީ އުމަރާ އެކު ވަރުގަދަ ފޯވާޑް ލައިން ޕާޓްނާޝިޕެއް އުފައްދައި ގިނަ ގޯލުތަކެއް ޖެހި އެވެ. އޭނާ ކުޅުން ހުއްޓާލީ 2003 ގައި ނިއު ރޭޑިއަންޓަށް ކުޅެ އެ ޓީމާ އެކު އެ އަހަރުގެ އެފްއޭ ކަޕް ކާމިޔާބުކުރުމަށް ފަހު އެވެ.

ހަވީރު ސްޕޯޓްސް އެވޯޑްސްގައި ދޭ އަހަރުގެ މޮޅު ކުޅުންތެރިޔާގެ މަގާމު 1999 ގައި އަދި ރަންބޫޓު 2001 އާއި 2000 ގައި އައްޔަ ވަނީ 1997-2003 އަށް ގައުމީ ޓީމަށް ވެސް ކުޅެފަ އެވެ. ރާއްޖޭން 2000 ވަނަ އަހަރުގެ ގޯލްޑަން ޖުބިލީ މުބާރާތާއި، 2003 ގެ ސާފް ޗެމްޕިއަންޝިޕުގެ ފައިނަލަށް ދަތުރުކުރުމުގައި އައްޔަގެ ހިއްސާ ބޮޑެވެ. އޭނާ 2003 ގެ ސާފް ޗެމްޕިއަންޝިޕުގައި ބޫޓާން އަތުން 6-0 އިން ރާއްޖެ މޮޅުވި މެޗުގައި ހެދި ހެޓްރިކަކީ ގައުމީ ޓީމަށް ކުޅުންތެރިޔަކު ހެދި ފުރަތަމަ ހެޓްރިކެވެ.