ގޯލްޑް ކަޕް: ކުޑަހީނާ އަލިފުއްޓަށް، ޑުންގާ މާފުއްޓަށް، ސޮބާ ފުވައްމުލަކަށް

އަންނަ މަހު ބާއްވާ ގޯލްޑް ކަޕް ފުޓްބޯޅަ މުބާރާތުގައި ވާދަކުރާ ރ. އަލިފުށި ޓީމުގެ ކޯޗަކަށް ތަޖުރިބާކާރު ކޯޗު އިސްމާއީލް އާސިފް (ކުޑަހީނާ) ހަމަޖައްސައިފި އެވެ.

އެ މުބާރާތުގައި 22 ޓީމަކުން ވާދަ ކުރެ އެވެ. ބައެއް އެހެން ރަށްރަށުން ވެސް ވަނީ މަޝްހޫރު ކޯޗުން އެ ޓީމުތަކުގެ ކޯޗުގެ ގޮތުގައި ހަމަޖައްސައިފަ އެވެ.

ކ. މާފުށީގެ ކޯޗުކަމަށް ހަމަޖައްސާފައި ވަނީ ގައުމީ އަންހެން ޓީމުގެ ކުރީގެ ކޯޗު އަހްމަދު ޝަރީފް (ޑުންގާ) އެވެ. އެފްއޭއެމްގެ ޓެކްނިކަލް ޑައިރެކްޓަރުގެ މަގާމު ވެސް ކުރިން އަދާކުރި ޑުންގާ އަލުން ފުޓްބޯޅައިގެ މަސައްކަތަށް އެ ނުކުތީ މެދުކެނޑުމަކަށް ފަހު އެވެ. މި އަހަރު ބޭއްވި މަޖިލިސް އިންތިހާބުގައި ވާދަކުރި ޑުންގާ އެ ވަގުތަށް ފުޓްބޯޅައިގެ މަސައްކަތުން ދުރަށްޖެހިލި އެވެ.

ފުވައްމުލަކު ޓީމުގެ ކޯޗުކަމަށް ހަމަޖައްސާފައި ވަނީ ގައުމީ ޓީމުގެ ކުރީގެ ޑިފެންޑަރު ސޮބާހް މުހައްމަދު އިބްރާހިމް (ސޮބާ) އެވެ. އެންމެ ފަހުގެ ދެ ވަނަ ޑިވިޝަން މުބާރާތުގެ ފައިނަލަށް ވިކްޓަރީ ސްޕޯޓްސް ކްލަބް ގެންގޮސްދީ އެ ކްލަބް އަލުން އެއް ވަނަ ޑިވިޝަނަށް ޕްރޮމޯޓްކޮށް ދިން ސޮބާ ވަނީ މީގެ ކުރިން އެކަޑަމީތަކުގައި ވެސް ކޯޗުކޮށް ދީފަ އެވެ.

ފުވައްމުލަކު ޓީމާ ރަސްމީކޮށް ހަވާލުވާން ސޮބާ މިރޭ އެ ރަށަށް ދާނެ އެވެ.

އަލިފުށީގެ ކޯޗު ކުޑަ ހީނާ ބުނީ، އެ ރަށަކީ ފުޓްބޯޅައިގައި އޭނާ އަށް ހާއްސަ ރަށެއް ކަމަށެވެ.

"ގައުމީ މުބާރާތް މި ރަށުގައި އަހަރެމެން [ވެލެންސިއާ އިން] ނެގީމަ އެ ކާމިޔާބުގެ ހަނދާން އާ ކޮށްލަން އައިސް މިހުރީ. އެކަމަކު އެއަށްވުރެ ބޮޑަށް ފުޓްބޯޅައިގެ މަސައްކަތެއްގައި އަނެއްކާވެސް މިރަށަށް އެހީވާން އައިސް މިހުރީ،" އަލިފުށީގައި މި ވަގުތު ހުރި ހީނާ ބުންޏެވެ.

ނައިންޓީ ޕްލަސްއިން ބާއްވާ ގޯލްޑް ކަޕު ހާއްސަ ކުރަނީ 24 ޓީމަށެވެ. ނައިންޓީ ޕްލަސްގެ ކޯ ފައުންޑަރު އަދި ތަޖުރިބާކަރު ކޯޗު މުހައްމަދު ޝާޒްލީ ބުނީ ފުރަތަމަ މުބާރާތުގައި 22 ޓީމު ބައިވެރިވުމަކީ ވެސް ރަނގަޅު ކާމިޔާބެއް ކަމަށެވެ.

އޭނާ ބުނީ ފުޓްބޯޅައިގެ ފޯރި ގެއްލިފައިވާ ވަގުތު ބާއްވާ ގޯލްޑް ކަޕުން، އަލުން އެ ފޯރި ގެނެސްދެވޭނެ ކަމަށެވެ.