ގޯލްޑް ކަޕްގައި އެންމެ ވިދުން ގަދައީ ފުވައްމުލައް

ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ، ގޯލްޑް ކަޕްގައި އެންމެ ވިދުން ގަދަ ޓީމުގެ ގޮތުގައި ފުވައްމުލައް ފާހަގަވެއްޖެ އެވެ.

ފަސް ޓީމު ހިމެނޭ ގުރޫޕުން ފުވައްމުލަކުން ކުޅުނު މެޗުތަކުގައި މޮޅުވެފައި ވަނީ ނިސްބަތުން ތަފާތު ބޮޑު ނަތީޖާތަކަކުންނެވެ.

ފަރެސްމާތޮޑާއާ ދެކޮޅަށް ރޭ ކުޅުނު މެޗު އެ ޓީމުން ކާމިޔާބު ކުރީ 5-0 ންނެވެ.

އެ ޓީމުގެ ގަނާގެ ފޯވާޑް ކޯފީ އޮއުސޫ ވަނީ ރޭގެ މެޗުގައި ވެސް ހެޓްރިކް ހަދައިފަ އެވެ. މުބާރާތުގައި އޭނާ ވަނީ ދެ މެޗުގައި ހެޓްރިކް ހަދައިފަ އެވެ. ޖުމުލަ ހަތް ގޯލް މިހާތަނަށް އޭނާ ޖެހި އެވެ.

އެއް ޓީމަކުން ދެ ކުޅުންތެރިޔަކު ހެޓްރިކް ހެދި ހަމައެކަނި ޓީމަކީ ވެސް ފުވައްމުލަކެވެ. އެ ޓީމުގެ އަލީ ޝަމާލް އަބްދުﷲ (ޝަންމު) ވަނީ ކުރން ކުޅުނު މެޗުގައި ދ. މީދުއާ ދެކޮޅަށް ހެޓްރިކް ހަދައިފަ އެވެ.

ރޭގެ މެޗުގައި އެ ޓީމުގެ އަނެއް ދެ ލަނޑު ޖެހީ އަހްމަދު ޝުއައިބާއި މުހައްމަދު އިޔާޝް އަހްމަދެވެ.

ފުވައްމުލަކަށް، ގުރޫޕް ސްޓޭޖްގައި އެ ރެކޯޑް ދެމެހެއްޓުނީ އެ ގުރޫޕްގެ އެހެން ޓީމުތަކުގައި އެންމެ މަތީ ފެންވަރު ނެތުމުން ކަމަށް ތަޖުރިބާކާރަކު ބުންޏެވެ. އެ ގުރޫޕްގައި ފުޓްބޯޅައިގެ އެންމެ މަޝްހޫރު ރަށްރަށުގެ ގޮތުގައޮ އޮތީ ދ. ކުޑަހުވަދޫ އަދި ގދ. ފަރެސްމާތޮޑާ އެވެ. ކުރިން ބޭއްވި މިނިވަން ޗެމްޕިއަންޝިޕްގެ ފައިނަލުގައި ވެސް ކުޅުނު މި ދެ ޓީމު، ގޯލްޑް ކަޕަށް ކުރިމަތިލީ ތަޖުރިބާ މަދު ކުޅުންތެރިންނާ އެކު އެވެ.

މިނިވަން ޗެމްޕިއަންޝިޕްގައި އެ ދެ ރަށުން ނެރުނުވަރުގެ ޓީމެއް ގޯލްޑް ކަޕަށް ނުނެރެވުނެވެ.

"ފުވައްމުލަކުގެ ތަފާތަކަށް ވޭ އެ ޓީމުން ދުރާލައި ތައްޔާރުވުމަށް ކުރި މަސައްކަތް. ރަނގަޅު މަސައްކަތްތަކެއް ޕްރީ ޓޯނަމަންޓްގައި ގޮތުގައި ފުވައްމުލަކުގެ ޓީމުން ކޮށްފައި އޮތީ،" ތަޖުރިބާކާރު ބުންޏެވެ.

"އެއީ ކަންނޭނގެ ފުވައްމުލަކުގެ ތަފާތަކަށް ވި ސަބަބަކީ."

އޭނާ ބުނީ އެކަމަކު ފުވައްމުލަކުގެ ޓީމުގެ އަސްލު ފެންވަރު ވަޒަންކޮށްލެވޭނީ ދެވަނަ ބުރުން ކަމަށެވެ. އެ ޓީމާ ޗެލެންޖް ކޮށްލެވޭނެ ވަރުގެ ޓީމެއް ގުރޫޕް ސްޓޭޖްގައި ނުފެނުނެވެ.