އައްޑުއަކީ ބަލިވާން އައި ޓީމެއް ނޫން، މާފުށި ކަޓުވާލުމަށް ފަހު އެ ދިޔައީ ސެމީ އަށް

ކ. މާފުށި އަތުން 3-0 އިން މޮޅުވެ، ނައިންޓީ ޕްލަސް ގޯލްޑް ކަޕްގެ ސެމީ ފައިނަލަށް މިރޭ އައްޑޫ ދަތުރު ކޮށްފި އެވެ.

އައްޑޫއަކީ މިރޭގެ މެޗަށް ނުކުތް އިރު، އެ މުބާރާތުގައި މެޗަކުން ބަލި ނުވެ އޮތް ހަމައެކަނި ޓީމެވެ. ސެމީ ފައިނަލްގައި އައްޑޫ ނުކުންނާނީ މުބާރާތުގައި މިހާތަނަށް ހަމައެކަނި މާފުށި އަތުން ބަލިވެފައިވާ ރ. އަލިފުއްޓާ ދެކޮޅަށެވެ.

ގުރޫޕް ސްޓޭޖުގެ ފަހު ބުރުގައި ކުޅުނު ދެ މެޗުން ޖުމްލަ 10 ގޯލް ޖެހި އައްޑޫން މިރޭ ޖެހި ފުރަތަމަ ދެ ގޯލު ކާމިޔާބު ކުރީ ސެޓް ޕީސްތަކުންނެވެ.

ފުރަތަމަ ގޯލް 71 ވަނަ މިނިޓުގައި ލިބުނު ހިލޭ ޖެހުމަކުން ކާމިޔާބު ކޮށްދިނީ އިސްމާއިލް އީސާ (މެސީ) އެވެ. އޭގެ ފަސްވަރަކަށް މިނިޓު ފަހުން ލިބުނު ކޯނަރުތަކުން ލީޑު ފުޅާ ކޮށްދިނީ މުހައްމަދު ހާޒިމް ރިއްފަތެވެ. އިބްރާހިމް ވަހީދު ހުސެއިން (އިއްބެ) ކޯނަރުން ނެގި ބޯޅަ އަރިމަތީ ދަނޑީގައި ޖެހިފައި ނުކުތް ވަގުތު ކައިރީ ހުރި ހާޒިމް ވަނީ ގޯލަށް ބޯޅަ ފޮނުވާލައިފަ އެވެ.

އިބްރާހިމް މަހުދީ ހުސެއިން (ފޭދޫ އިއްބެ) ތަނަވަސް ކޮށްދިން ފުރުސަތަކުން، މެޗުގެ އިތުރު ވަގުތުގައި އައްޑޫގެ ފަހު ގޯލު ޖަހައިދިނީ އިއްބެ އެވެ.

މިރޭގެ މެޗުން ބަލިވި ނަމަވެސް މާފުށިން ވަނީ އައްޑުއާ ދެކޮޅަށް މޮޅު ކުޅުމެއް ދައްކައިފަ އެވެ. ފުރަތަމަ ހާފުގައި އެންމެ ނުރައްކާތެރި ހަމަލާއެއް ފޮނުވާލީ ވެސް މާފުށިންނެވެ. އިސްމާއިލް މަފާޒް އިބްރާހިމް ޖައްސާލި ބޯޅަ ހުސްކޮށް، އިބްރާހިމް އަތީގް ހަސަން ފޮނުވާލި ބާރު ހަމަލާ އަމާޒުވީ ހުރަސް ދަނޑިއަށެވެ.

މާފުށި ޓީމުގެ އަހުމަދު ޝަމާލް ފިޔަވައި އެ ޓީމުގައި މުޅިންހެން ހިމެނެނީ ޕްރިމިއާ ލީގުގައި ދަ ގްރާންޑޭ ސްޕޯޓްސް ކްލަބަށް އެކުގައި ކުޅުނު ކުޅުންތެރިންނެވެ. އަދި އެޓީމުގައި ހިމަނާފައިވާ ރަށުން ބޭރު ދެ ކުޅުންތެރިން ކަމަށްވާ އަތީގް އާއި މުހައްމަދު ނިޒާމް (ޕީކޭ) ވެސް ވަނީ ޕްރިމިއާ ލީގުގައި ދަ ގްރާންޑޭ އަށް ކުޅެފަ އެވެ.

ޕްރިމިއާ ލީގުގައި ތިން ސީޒަން ކުޅުމަށް ފަހު ގްރާންޑޭ ރެލިގޭޓްވީ 2022 ވަނަ އަހަރު، މުޅިން ވެސް މާފުށީ ކުޅުންތެރިން ހިމެނޭ ސްކޮޑެއް އޮއްވަ އެވެ. އެއަށް ފަހު މި އަހަރުގެ ދެވަނަ ޑިވިޝަންގައި ވެސް އެޓީމަށް އެންމެ އެދެވޭ ކުޅުމެއް ނުދެއްކުނެވެ.

ގޯލްޑް ކަޕްގެ ފެށުން ވެސް މާފުއްޓަށް އެންމެ ރަނގަޅަށް ނުދިޔަ ނަމަވެސް، އެ ޓީމުން ވަނީ ކުރިއެރުން ހޯދައި، ގުރޫޕް ސްޓޭޖުގެ ފުރަތަމަ ބުރުގެ ފަހު މެޗުގައި 1-0 އިން އަލިފުށި ބަލިކޮށް ދެވަނަ ބުރުން ޖާގަ ހޯދައިފަ އެވެ. މާފުށީގެ ކޯޗަކަށް ހުރި އަހުމަދު ޝަރީފް (ޑުންގާ) ވަނީ ފުރަތަމަ ދެ މެޗަށް ފަހު އެ ޓީމުން އަމިއްލަ އަށް އިސްތިއުފާ ދީފަ އެވެ.

ޑުންގާ އިސްތިއުފާ ދިނުމުން އަހުމަދު ޝަރީފްގެ ކޯޗުކަމުގައި މާފުށިން ވަނީ އަލިފުށި ބަލިކުރުމަށް ފަހު، ދެވަނަ ބުރުގައި ވަރުގަދަ އޭދަފުށި ވެސް ބަލިކޮށްފަ އެވެ. މާފުށިން އޭދަފުށި ބަލިކުރީ 2-0 އިންނެވެ.