މީދުއާ ދެކޮޅަށް ނައިފަރު ދެއްކީ ހިތްވަރު، ކުއާޓާއިން ޖާގަ ކަށަވަރުކޮށްފި

ދ. މީދޫގެ މައްޗަށް 2-0 ގެ ނަތީޖާއަކުން ކާމިޔާބު ހޯދައި ގޯލްޑް ކަޕްގެ ކުއާޓާ ފައިނަލުން ހިތްވަރުގަދަ ނައިފަރު ޖާގަ ހޯދައިފި އެވެ.

ހޯމަ ދުވަހު، އައްޑުއާ ދެކޮޅަށް ރަނގަޅު ކުޅުމެއް ދެއްކި، މީދުއަށް މިއަދު ނައިފަރުގެ ކައިރީގައި އެކަށީގެންވާ ކުޅުމެއް ނުދެއްކުނެވެ.

އެ މެޗުގައި އައްޑޫން ދެ ފަހަރު ލީޑް ނެގުމުން ވެސް މީދޫން އެ ދެ ފަހަރު ވެސް ނަތީޖާ ހަމަހަމަ ކުރި އެވެ. އެކަމަކު މިއަދު ނައިފަރުން މީދުއަށް އެ ފުރުސަތެއް ނުދިނެވެ.

ފުރަތަމަ ހާފު ނިމުމުގެ ކުރިން ނައިފަރުން ލީޑް ނެގި އެވެ. އެ ޓީމުން ނެގި ކޯނަރު، މުހައްމަދު އިޒާން އަލީ ބޮލުން ފޮނުވާލި ބޯޅަ މީދޫގެ ގޯލަށް ވަނީ އެ ޓީމުގެ ހައްމާމް ރަޝީދު އަތުން ބައިކޮޅަށެވެ. އިޒާން ފޮނުވާލި ބޯޅަ، ދިފާއުކުރުމުގެ ގޮތުން ހައްމާމް މަސައްކަތް ކުރީ ބޮލުން ބޯޅަ ދިފާއު ކުރާށެވެ. ނަމަވެސް އޭނާގެ ބޮލުގައި ޖެހިފައި ބޯޅަ ވަނީ ބައިކޮޅަށެވެ.

ނައިފަރުގެ ދެވަނަ ލަނޑު ޖެހީ މެޗުގެ 55 ވަނަ މިނެޓްގަ އެވެ. އިމްރާން މުހައްމަދު ހާފުގެ މެދެއްހާހިސާބުން ބޯޅަ ދިނީ މުހައްމަދު ނަދީމަށެވެ.

އޭނާ ވަނީ މީދޫގެ ޑިފެންޑަރު ވެސް ނައްޓާލުމަށް ފަހު ގޯލްގެ ތިރީ ކަނަށް ބޯޅަ ފޮނުވާލައިފަ އެވެ.

ދެވަނަ ހާފުގެ ބޮޑުބައެއް ނައިފަރުން ކުޅުނީ އެއް ކުޅުންތެރިޔަކު މަދުކޮށެވެ. އެ ޓީމުގެ އިބްރާހިމް ޝަރީފް މުހައްމަދަށް 60 ވަނަ މިނެޓްގައި ދެވަނަ ރީނދޫ ކާޑާ އެކު ރަތް ކާޑް ދެއްކި އެވެ.

ނައިފަރަށް ދެން އޮތީ އައްޑުއާ ދެކޮޅަށް ކުޅޭ މެޗެވެ. އެ މެޗު އެއްވަރުކޮށްލިޔަސް އައްޑޫ ކުއާޓާ ފައިނަލަށް ދަތުރު ކުރާނެ އެވެ.