މުޅި ދަނޑު ގުގުމާލައި އަލިފުށިން ދެވަނަ ބުރު ޔަގީންކޮށްފި

ސަޕޯޓަރުންގެ ފޯރިއާ އެކު މިރޭ 2-0 އިން ޅ. ނައިފަރު ބަލިކޮށް ރ. އަލިފުށިން، ނައިންޓީ ޕްލަސް ގޯލްޑް ކަޕްގެ ގުރޫޕް ސްޓޭޖްގެ ދެވަނަ ބުރުން ޖާގަ ޔަގީން ކޮށްފި އެވެ.

އަލިފުށިން ވަނީ ގުރޫޕް ޑީގެ ފުރަތަމަ ދެ މެޗް ކާމިޔާބު ކޮށް ހަ ޕޮއިންޓް ހޯދައިފަ އެވެ. ނައިފަރަށް ދެ މެޗުން ތިން ޕޮއިންޓް ލިބިފައި ވާއިރު، މި ގުރޫޕްގައި ހިމެނޭ ކ. މާފުއްޓާއި ބ. ކެންދޫ ވެސް ވަނީ ފުރަތަމަ މެޗުން ބަލިވެފަ އެވެ.

ގުރޫޕް ސްޓޭޖުގެ ދެވަނަ ބުރަށް ދާނީ ކޮންމެ ގުރޫޕަކުން ވެސް އެންމެ ނަތީޖާ ރަނގަޅު ތިން ޓީމެވެ.

އަލިފުށީގެ ސަޕޯޓަރުންގެ ފޯރި ދައްކާލި މިރޭގެ މެޗުގެ ފުރަތަމަ ހާފު ނިމެން ދެ މިނިޓަށް ވެފައި ވަނިކޮށް އަލިފުއްޓަށް ލީޑު ނަގައިދިނީ ޒުވާން ފޯވާޑް އަހުމަދު ހުސާމް (ހުސާންކޮ) އެވެ. އޭނާ ވަނީ އޭރިއާ ބޭރުން އާދަމް އިމްރާން (އިންނަ) ދިން ބޯޅަ ހޯދައި ކުރިމަތީ ހުރި ޑިފެންޑަރު ކައިރިން ނައްޓާލުމަށް ފަހު ގޯލުގެ ތިރީ ކަނަށް އަމާޒު ކޮށްލައިފަ އެވެ.

އެޓީމުގެ ދެވަނަ ލަނޑު، މެޗުގެ 82 ވަނަ މިނިޓުގައި ޖަހައިދިނީ އިމްރާން އެވެ. އޭނާ މި ގޯލު ޖެހީ، ކެޕްޓަން މުހައްމަދު ރަޝީދު (ހޮކޭ) ފޮނުވާލި ބޯޅަ ބޮލުން ގޯލަށް ފޮނުވާލައިގެންނެވެ.

ކުރިން ކްލަބް އީގަލްސް އާއި ކްލަބް ގްރީން ސްޓްރީޓްސް އަށް ވެސް ކުޅުމަށް ފަހު މިހާރު އެ ރަށުގެ ކައުންސިލްގެ ރައީސްގެ މަގާމުގައި ހުރި އިމްރާން ވަނީ، އަލިފުށި ކުޅުނު ފުރަތަމަ މެޗުގައި ބ. ކެންދޫ ކޮޅަށް ދެ ގޯލު ޖަހައިފަ އެވެ.

މުބާރާތުގައި ދެން މެޗެއް ކުޅޭނީ ހޮނިހިރު ދުވަހު އެވެ. އެ ދުވަހު ހަވީރު، މި ގުރޫޕްގައި ހިމެނޭ ކެންދުއާއި މާފުށި ބައްދަލު ކުރާއިރު، ރޭގަނޑު ބައްދަލުކުރާނީ ގުރޫޕް އޭގެ ފުވައްމުލައް ސިޓީ އާއި ދ. މީދޫ އެވެ.