އަލިފުށީގެ ފަހަތަށް މުޅި ރ. އަތޮޅު، މިރެއަށް ތައްޔާރު!

އަލިފުށީގައި އޮތް ފުޓްބޯޅައިގެ ފޯރި މިދިޔަ ހޯމަ ދުވަހުގެ ރޭ ގަލޮޅު ދަނޑަށް އެކަނި ބަލާލިޔަސް ފެންނާނެ އެވެ. ގޯލްޑް ކަޕްގައި އެ ޓީމު ކުޅުނު ފުރަތަމަ މެޗުގައި، މެޗު ފެށިގެން ނިމެންދެން މެދުނުކެނޑި އެ ޓީމުގެ ސަޕޯޓަރުންގެ ބެރު ދުންމާރީގެ އަޑު ދަނޑުގައި ގުގުމާލަގުގުމާލަ ހުއްޓެވެ. ކަންދިމާވި ގޮތުން އެ މެޗުގެ ދެ ވަނަ ހާފުގެ ދަނޑުގެ ލައިޓްތައް ނިވުނެވެ. މައްސަލަ ހައްލުނުވެ ގިނައިރުތަކެއް ވެގެންދިޔައި އިރު ވެސް ސަޕޯޓަރުންގެ ފޯރީގެ އަޑެއް ނުކެނޑުނެވެ.

އެ ޓީމަށް ސަޕޯޓްކުރަން އެ ރޭ ގަލޮޅު ދަނޑަށް ވަނީ ހަމައެކަނި އަލިފުށީގެ ރައްޔިތުން ނޫން ކަމަށް، ޓީމުގެ މެނޭޖަރު އަލީ އަޒްމީން ބުންޏެވެ. ރ. ދުވާފަރު މީހުންނާއި އަތޮޅުގެ އެހެން ރަށްރަށުގެ މީހުން ވެސް، ބ. ކެންދުއާ ދެކޮޅަށް ކުޅުނު އެ މެޗުގައި އަލިފުށީގެ ޓީމަށް ތަރުހީބު ދޭން ދަނޑަށް ވަން ކަމަށް އޭނާ ބުންޏެވެ.

މުބާރާތުގައި މިރޭ އެ ޓީމުން ނުކުންނާނީ، ޅ. ނައިފަރާ ދެކޮޅަށެވެ. ކުރީގެ މެޗަށް ވުރެ ގަދަ އަށް މިރޭ މެޗަށް އަލިފުށިން ތައްޔާރުވާމުން އަންނަ ކަމަށް އަޒްމީން ބުންޏެވެ.

"ކުރިއަށް އޮތީ ވީކެންޑް ވީމާ މިއަދު އޮފީސް ނިންމާފަ އެހެން ރަށްރަށުން ވެސް މީހުން މެޗު ބަލަން މާލެ އަންނާނެކަން އެނގިފަ އޮތީ،" އަޒްމީން ބުންޏެވެ.

އޭނާ ބުނީ އަލިފުށި މުބާރާތުގައި ވާދަކުރަނީ، ރ. އަތޮޅުގެ އެހެން ރަށްރަށުގެ ވެސް ބޮޑު އެހީތެރިކަމެއް ލިބިގެން ކަމަށެވެ. އޭނާ މިސާލަކަށް ދެއްކީ ރ. އަތޮޅު ފުޓްސަލް ޗެލެންޖްގައި އަލިފުށި ބައިވެރިވެވޭ ގޮތް ނުވުމުން ވެސް އެހެން ރަށްރަށުން ވެސް އެކަން ބަލައިގަންނަން ނިންމައި ދިން އެއްބާރުލުމެވެ.

"ކޮންމެ އަހަރަކު ބާއްވާ މުބާރާތެއް [ރ. އަތޮޅު ފުޓްސަލް ޗެލެންޖް] އެއީ. ފުޓްސަލް މުބާރާތް ވެސް އޮންނަ ދުވަސްވަރާ ގޯލްޑް ކަޕް މި ދިމާވީ. އެ މުބާރާތުގައި އަޅުގަނޑުމެން ބައިވެރިވެފަ އޮތީމަ، މި އަތޮޅު ފުޓްސަލް ޗެލެންޖުގައި މިފަހަރު ބައިވެރިވާން އުނދަގޫތަކެއް ހުރި ކަމަށް އަޅުގަނޑުމެން ދެންނެވީ،" އަޒްމީން ބުންޏެވެ.

"އެކަން އަތޮޅުގެ އެހެން ރަށްރަށުން ވެސް ބަލައިގަތް. އެހެން ރަށްރަށުން ވެސް ބުނި އަލިފުށި މުބާރާތުގައި ނެތުމަކީ ދެރައެކޭ. އެކަމަކު ގޯލްޑް ކަޕްގައި އަތޮޅު ޓީމެއް ވާދަކުރާތީ އަލިފުއްޓަށް މުބާރާތުގައި ކާމިޔާބުވާން އެދޭތީ ފުޓްސަލް މުބާރާތުގައި މިފަހަރު ވާދަ ނުކުރުމުގައި އިއުތިރާޒެއް ނެތް ކަމަށް ކަމަށް ބުނި."

އަޒްމީން ބުނީ އަތޮޅުގެ އެހެން ރަށްރަށުން، އަލިފުށީގެ އެ ސަބަބު ގަބޫލު ކުރުމުން އެ ޓީމަށް ވަރަށް ބޮޑު ހިތްވަރެއް ލިބުނު ކަމަށެވެ.

"އެކަންވި އަޅުގަނޑުމެންނަށް ލިބުނު ވަރަށް ބޮޑު ހިތްވަރަކަށް،" އޭނާ ބުންޏެވެ.

އެހާހިސާބުން އަލިފުށި ޓީމުގެ ކޮނޑުގައި ބޮޑު ޒިންމާއެއް އޮތްކަން މުޅި ޓީމުން ގަބޫލު ކުރި ކަމަށް އަޒްމީން ބުންޏެވެ. އެއީ މުޅި ރ. އަތޮޅު ތަމްސީލުކުރުމެވެ. ގޯލްޑް ކަޕްގައި އަލިފުށިން ހޯދާ ކޮންމެ ކާމިޔާބެއް ވާނީ ރ. އަތޮޅަށް ލިބޭ ކާމިޔާބަކަށް ކަމަށް އެ ޓީމުން ދެކެ އެވެ.

އެ އަތޮޅު ކައުންސިލްގެ ރައީސް ހުސައިން ނާސިފް ވިދާޅުވީ، ގޯލްޑް ކަޕްގައި އަލިފުށީގެ ނަމުގައި އެ ޓީމު ވާދަކުރިޔަސް އެއީ މުޅި ރ. އަތޮޅުގެ ޓީމު ކަމަށް އޭނާ ގަބޫލު ކުރާ ކަމަށެވެ. އަތޮޅު ކައުންސިލުގެ އެހެން މެންބަރުން ވެސް ދެކެނީ އެގޮތަށް ކަމަށް ނާސިފް ވިދާޅުވި އެވެ.

"އަލިފުށީގެ ނަމުގައި އެ ޓީމު ވާދަކުރިޔަސް އަޅުގަނޑުމެން އަތޮޅު ކައުންސިލުން ނުދެކެން. އެ ޓީމުން އެ ތަމްސީލު ކުރަނީ ހަމައެކަނި އަލިފުށި ކަމެއް. އަޅުގަނޑުމެން ދެކެނީ މުޅި ރ. އަތޮޅު ޓީމޭ މީ. އަތޮޅު ކައުންސިލުގެ މެންބަރުން ވެސް ދެކެނީ އެގޮތަށް،" އޭނާ ވިދާޅުވި އެވެ.

އަތޮޅުގެ އެހެން ރަށްރަށުގެ ޓީމުތަކެއް ވެސް އިންޓަ ސްކޫލް ވޮލީބޯޅަ މުބާރާތުގައި ވާދަކުރާތީ، އެ ޓީމުތަކަށް ހިތްވަރު ދެއްވުމަށް ނާސިފް މި ވަގުތު ހުންނެވީ މާލޭގަ އެވެ. އެ މުބާރާތުގައި އަލިފުށީ، ސްކޫލްގެ ޓީމަކާއި، ކިނޮޅަހު ސްކޫލުގެ ދެ އުމުރުފުރާއިން ދެ ޓީމު އަދި ރަސްމާދޫ ސްކޫލްގެ ޓީމެއް ވޮލީ މުބާރާތުގައި ވާދަކުރެ އެވެ.

އޭނާގެ އަތޮޅުގެ ޓީމުތައް ކުޅުނު ވޮލީ މުބާރާތުގެ މެޗުތައް ބައްލަވަން ވެސް ނާސިފް ވަޑައިގެންފި އެވެ. އަލިފުށީގެ ފުޓްބޯޅަ ޓީމު ކުޅޭ މެޗު ބައްލަވާލައްވަން އޭނާ މިރޭ ވަޑައިގަންނަވާނީ ގަލޮޅު ދަނޑަށެވެ. މާލޭގައި އަލިފުށީގެ ޓީމާ ބައްދަލު ކުރައްވައި އޭނާ ވަނީ އެ ޓީމަށް ހިތްވަރު ދެއްވާފަ އެވެ.

ނާސިފް ވިދާޅުވީ، މުބާރާތުގެ ރަނގަޅު ހިސާބަކަށް އަލިފުށި ދަތުރުކުރުމުން، އަތޮޅު ކައުންސިލުން އެހެން ކަންތައްތަކެއް ކޮށްދިނުމާ ބެހޭގޮތުން މިހާރު މަޝްވަރާ ކުރަމުންދާ ކަމަށެވެ.

މިރޭގެ މެޗު ބަލާލަން، ގިނަ ބަޔަކު ދަނޑަށް ވަންނާނެ ކަމަށް އަލިފުށީގެ މެނޭޖަރު އަޒްމީން ބުންޏެވެ. އޭނާ ބުނީ ކެންދުއާ ދެކޮޅަށް ކުޅުނު މެޗުގައި، އަލިފުށީގެ ސަޕޯޓަރުންނަށް ހާއްސަ ކުރި ސަރަހައްދުގައި 240 ވުރެ ގިނަ މީހުން ތިބި ކަމަށެވެ.

"ނައިންޓީ ޕްލަސްއިން އަޅުގަނޑުމެންނާ ހިއްސާ ކުރި މައުލޫމާތު އެއީ. މިރޭ ވީކެންޑާ ދިމާވާތީ މިއަދަދު މައްޗަށް ދާނެ،" އޭނާ ބުންޏެވެ.

ހޯމަ ދުވަހުގެ ރޭ ކުޅުނު މެޗު ބަލަން ހާއްސަކޮށް، އަލިފުށީގެ ބަނދަރުމަތީގައި ބެހެއްޓި ބޮޑް ސްކްރީން ދޮށަށް އެ ރަށުގެ ގިނަ ބަޔަކު ހާޒިރުވެ މެޗު ބެލި އެވެ. އަޒްމީން ބުނީ އަތޮޅުގެ އެހެން ރަށްރަށުގައި ވެސް އެ މެޗު ބޮޑު ސްކްރީނުގައި އަޅުވައިގެން ބެލި ކަމަށެވެ.

"އެ މެޗަށް ފަހު އަޅުގަނޑުމެންނަށް އެހެން ރަށްރަށުން އައިސްފަ ހުރި މެސެޖްތަކުގައި ވެސް ފާހަގަ ކޮށްފަ ހުރި އެކަން. އަދި މިރޭ އިތުރު ރަށްރަށުގައި ވެސް ބޮޑް ސްކްރީން ބަހައްޓާނެކަމަށް ބުނެފައި އެބައޮތް،" އަޒްމީން ބުންޏެވެ.

މިރޭގެ މެޗުން މޮޅުވާ ޓީމެއް ދެ ވަނަ ބުރަށް ދަތުރުކުރާނެ އެވެ. ނައިފަރު ކުޅުނު ފުރަތަމަ މެޗުގައި އެ ޓީމުން ވަނީ، ކ. މާފުށި ބަލިކޮށްފަ އެވެ. އެ ގުރޫޕުން ގަދަ ތިން ޓީމު ދެވަނަ ބުރަށް ދަތުރު ކުރާނެ އެވެ.