ސަޕޯޓަރުންގެ ފޯރިއާ އެކު އަލިފުށިން ކެންދޫ ބަލިކޮށްފި

ރ. އަލިފުށީ ސަޕޯޓަރުން ގަލޮޅު ދަނޑު ގުގުމާލައި، ބ. ކެންދުއާ ދެކޮޅަށް ޓީމު މޮޅުކޮށްދޭން އެހީ ވެއްޖެ އެވެ.

ގުރޫޕް ޑީގެ މި ދެ ޓީމުގެ ކުރިމަތިލުން އަލިފުށިން ކާމިޔާބު ކުރީ 5-1 ންނެވެ. އަލިފުށީ ޓީމު ބިނާކޮށްފައި އޮތީ ފުރަތަމަ ޑިވިޝަނުގެ ތަޖުރިބާކާރު ކުޅުންތެރިން ގިނަ އަދަދަކަށް ހިމަނައިގެންނެވެ. ކެންދޫގައި ގިނައީ ގަލޮޅު ދަނޑަށް ވެސް މުޅިން އާ ކުޅުންތެރިންނެވެ.

މެޗުގެ ވަރަށް ކުރީކޮޅު އަލިފުށީ ޓީމަށް ކުޅޭ ގައުމީ ޓީމުގެ މިޑްފީލްޑަރު ހުސައިން ނިހާން (ނިހާޓް) ގެ ލަނޑުން ލީޑް ނެގި އެވެ. މެޗުގެ ތިންވަނަ މިނެޓްގައި އޭރިއާގެ ބޭރުން ނިހާން ފޮނުވާލި ބާރު ބޯޅަ އަމާޒުވީ ގޯލްގެ މެދަށެވެ.

އަލިފުއްޓަށް އޭގެ ފަހުން ވެސް ނަތީޖާ ފުޅާ ކުރަން ރަނުގެ ފުރުސަތެއް ލިބުނެވެ. އެ ޓީމަށް ލިބުނު ޕެނަލްޓީ އަހްމަދު ހުޝާމް ފޮނުވާލުމުން ދިޔައީ ތިރިތިރިން ދަނޑި ކައިރިން ބޭރަށެވެ.

އެކަމަކު އޭގެ ފަހުން އޭނާ ވަނީ އެ ޓީމަށް ލަނޑު ޖަހައި ދީފަ އެވެ. ޓީމުގެ ތިން ވަނަ ލަނޑު ޖެހީ އޭނާ އެވެ. އެ ޓީމުގެ ދެވަނަ ލަނޑު ޖެހީ އަލިފުށީ ކައުންސިލްގެ ރައީސްކަން ވެސް ކުރަމުން އަންނަ އާދަމް އިމްރާނެވެ.

ދެވަނަ ހާފުގައި މެޗަށް ކުރިމަތިވީ އެހެން ބޮޑު މައްސަލައެކެވެ. ދަނޑުގެ ލައިޓްތައް ނިވި މެޗުގެ ކުޅުން 20 މިނެއްހާ އިރަށް މެދުކެނޑިގެން ދިޔަ އެވެ. ލައިޓްތައް ދިއްލުމަށް ފުރަތަމަ ކުރި މަސައްކަތުން ބައެއް ލައިޓްތައް ދިއްލުނެވެ. އެކަމަކު އަނެއްކާވެސް ދެވަނަ ފަހަރަށް މުޅި ދަނޑުން ލައިޓްތައް ނިވިގެން ދިޔަ އެވެ.

މެޗުގެ ކުޅުން މެދުކަނޑާލާފައި އޮތް ވަގުތު ވެސް އަލިފުށީގެ ސަޕޯޓަރުން ފުމެމުން ދިޔަ ދުންމާރި އާއި ޖަހަމުން ދިޔަ ބެރުގެ އަޑަކަށް މެދުނުކެނޑެ އެވެ. މެޗު ފެށިގެން ނިމެންދެން ސަޕޯޓަރުންގެ އަޑުތައް ދަނޑުގައި ގުގުމަގުގުމާ ހުއްޓެވެ.

މެޗުގެ 90 މިނެޓް ހަމަވުމުން އިތުރު ވަގުތުގެ ގޮތުގައި 25 މިނެޓް ކުޅުނެވެ. އިތުރު ވަގުތުގެ ހަވަނަ މިނެޓްގައި ނިހާން ވަނީ އަލިފުށީގެ ހަތަރު ވަނަ ލަނޑު ޖަހައިފަ އެވެ. އޭގެ ފަހުން އާދަމް އިމްރާން ވަނީ އޭނާގެ ރަށު ޓީމަށް ފަސްވަނަ ލަނޑު ޖަހައި ދީފަ އެވެ.

ކެންދޫ ޓީމުގެ ރަޝާދު އަބްދުލް މަތީން އެ ޓީމުގެ ލަނޑު ޖެހީ، އަލިފުށީގެ ޑިފެންޑަރުން ކައިރިން ނައްޓާލުމަށް ފަހު ކީޕަރު ބޯ މަތިން ގޯލްގެ ތެރެއަށް އޮއްސާލައިގެންނެވެ.