މެޗު އެއްވަރުވެ ދިއްދުއާއި މީދުއަށް ވެސް އިންތިޒާރު ދިގުވެއްޖެ

ގޯލްޑް ކަޕްގައި ރޭ، ހއ. ދިއްދުއާއި ދ. މީދޫ ކުޅުނު މެޗު އެއްވަރުވެ، ގުރޫޕް އޭ އިން ދެވަނަ ބުރުގެ އިތުރު ޖާގަތައް ކަށަވަރުކުރަން ދިގު އިންތިޒާރެއް ކުރަން ޖެހިއްޖެ އެވެ.

ގައުމީ ފުޓްބޯޅަ ދަނޑުގައި ކުޅުނު މެޗު އެއްވަރުވީ 2-2 ންނެވެ. ފުރަތަމަ ލީޑް ނެގީ ދިއްދޫ ޓީމުންނެވެ. އެ ޓީމުގެ ލަނޑު ހުސައިން ޝިފާހް ޖެހީ 20 ވަނަ މިނެޓްގަ އެވެ.

ލީޑް ނަގައިގެން ރަނގަޅަށް ހަމަޖެހި ނުލެވި އުޅެނިކޮށް މީދޫން ނަތީޖާ ހަމަހަމަ ކުރި އެވެ. ދިއްދޫގެ ލަނޑަށް ފަސް މިނެޓް ނުވަނީސް މީދުއަށް ލަނޑު ޖަހައި ދިނީ އާދަމް އިމްރާނެވެ. މީދޫގެ އަނެއް ލަނޑު ވެސް ޖެހީ އޭނާ އެވެ. މެޗުގެ މޮޅު ކުޅުންތެރިޔާގެ މަގާމު ވެސް އިމްރާން ހޯދި އެވެ.

ދެވަނަ ހާފުގައި ލީޑް ނެގީ މީދޫންނެވެ. އިމްރާންގެ ދެވަނަ ލަނޑު، އޭނާ ޖެހީ 57 ވަނަ މިނެޓްގަ އެވެ. ލީޑްގައި ގިނަ އިރުތަކެއް މީދޫން ހިފެހެއްޓި އެވެ.

އެކަމަކު މެޗު ނިމެންދެން ލީޑްގައި ހިފެހެއްޓޭ ގޮތެއް ނުވި އެވެ. މެޗުގެ 75 ވަނަ މިނެޓްގައި އާދަމް ނަސީމް ދިއްދުއަށް ނަތީޖާ ހަމަހަމަކޮށް ދިނެވެ.

މުބާރާތުގެ ފުރަތަމަ ބުރު ނިމުމަކާ ގާތަށް ގޮސްފައިވާ އިރު ވެސް ގުރޫޕް އޭ އިން ދެވަނަ ބުރުގެ ޖާގަ ކަށަވަރު ކުރި ފުވައްމުލަކުން އެކަންޏެވެ.

ކުޅުނު، ހުރިހާ މެޗަކުން މޮޅުވެ އެ ޓީމުން ވަނީ ގުރޫޕްގެ އެއްވަނަ ކަށަވަރުކޮށް އަނެއް ބުރުން ޖާގަ ހޯދައިފަ އެވެ.

ދިއްދުއާއި މިދޫގެ ކުރިމަތިލުމުން ކޮންމެ ޓީމެއް މޮޅުވިނަމަވެސް އެ ޓީމަކަށް ދެވަނަ ބުރުގެ ޖާގަ އެ މެޗަށް ފަހު ކަށަވަރުވީހެވެ. ނަތީޖާ ހަމަހަމަވުމުން، ދެ ޓީމަށް ވެސް ޖެހޭނީ ދެވަނަ ބުރުގެ ޖާގަ ކަށަވަރުކުރަން އިތުރު މެޗަކަށް މަޑުކުރާށެވެ.

ހޮނިހިރު ދުވަހު ކުޅޭ މެޗުތައް، ދީއްދު އާއި މީދުން އެއްވަރުކޮށް ލިޔަސް އެ ދެ ޓީމު ދެވަނަ ބުރަށް ދާނެ އެވެ. ހޮނިހިރު ދުވަހު ހަވީރު ކުޅޭ މެޗުގައި މީދޫ ނުކުންނާނީ، ކުޑަހުވަދުއާ ދެކޮޅަށެވެ. އެ ރޭ ކުޅޭ މެޗުގައި ދިއްދޫ ނުކުންނާނީ، މުބާރާތުން ކަޓާފައިވާ ގދ. ފަރެސްމާތޮޑާއާ ދެކޮޅަށެވެ.

ހަވީރު ކުޅޭ މެޗުން، ކުޑަހުވަދޫ މޮޅުވެއްޖެނަމަ އެ ޓީމަށް ދެވަނަ ބުރުގެ ޖާގަ ލިބޭނެ އެވެ. މިހާރު އެ ޓީމަށް އޮތީ ތިން ޕޮއިންޓް ލިބިފަ އެވެ. އޭރުން ޖުމުލަ ހަ ޕޮއިންޓް އެ ޓީމަށް ލިބޭނެ އެވެ.