ހައިޝަމްގެ ހެޓްރިކުން ދިއްދުއަށް ގުރޫޕްގެ ދެވަނަ!

ފުރަތަމަ ބުރުގެ އެންމެ ފަހު މެޗުގައި ގދ. ފަރެސްމާތޮޑާގެ މައްޗަށް 4-2 ގެ ނަތީޖާ އަކުން މޮޅުވެ، ގުރޫޕް އޭ ގެ ދެވަނަ މަގާމު ހއ. ދިއްދޫން ހޯދައިފި އެވެ.

ރޭގެ މެޗަށް ނުކުތް އިރު ވެސް ދިއްދޫ އޮތީ، ދެވަނަ ބުރުން ޖާގަ ކަށަވަރުވެފަ އެވެ. އެއީ އިއްޔެ ހަވީރު، ދ. ކުޑަހުވަދޫގެ މައްޗަށް ދ. މީދޫން ކުރި ހޯދުމުންނެވެ. އެ މެޗުގެ ކުރިން މީދުއާއި ދިއްދުއަށް ވެސް އޮތީ ހަތަރު ޕޮއިންޓް ލިބިފަ އެވެ. ކުޑަހުވަދުއަށް އޮތީ ތިން ޕޮއިންޓެވެ. އިތުރަށް އެންމެ ޕޮއިންޓެއް ހޯދާނެ ފުރުސަތުވެސް ކުޑަހުވަދުއަށް ނުދީ މީދުން ދެވަނަ ބުރަށް ދަތުރު ކުރީ ދިއްދޫ ވެސް ގޮވައިގެންނެވެ.

ރޭގެ މެޗުން ދިއްދޫ މޮޅުވުމުން، ޕޮއިންޓްގެ ގޮތުން މީދުއާ ހަމަހަމަ ކުރި އެވެ. ދެ ޓީމަށް ވެސް ހަތް ޕޮއިންޓެވެ. ދިއްދޫން ދެ ލަނޑުގެ ތަފާތުން މޮޅުވެ އެ ޓީމުން ފައިދާ ދެ ގޯލުން ކުރި ހޯދި އެވެ. މީދުއަށް ފައިދާ ގޯލެއް ވެސް އަދި ގެއްލުން ގޯލެއްވެސް ނެތެވެ.

ފަރެސްމާތޮޑާއިން މުބާރާތް ނިންމާލީ އެންމެ ޕޮއިންޓެއް ވެސް ނުލިބި އެވެ. ރޭގެ މެޗުގެ ފުރަތަމަ ހާފުގައި ދެ ލަނޑުގެ ލީޑެއް ނަގައި، އެ ޓީމުން މޮޅަކާ އެކު މުބާރާތް ނިންމާލަފާނެ ކަމަށް ބެލެވުނެނެވެ.

އެކަމަކު ދިއްދޫން އެ ފުރުސަތެއް ނުދިނެވެ. ފުރަތަމަ ފަރެސްމާތޮޑާގެ ލަނޑުތައް ޖެހީ މިސްރުގެ މިޑްފީލްޑަރު މުހައްމަދު އަބްދުލް އާތީ އާއި ޝައިސުއްﷲ އަޝަރަފެވެ. އެ ޓީމުގެ ފުރަތަމަ ލަނޑު އަބްދުލް އާތީ ޖެހި ޕެނަލްޓީއަކުންނެވެ.

ދެވަނަ ހާފަށް ނުކުމެ، ދިއްދުއަށް ނަތީޖާ ބަދަލުކޮށްލުމުގައި މުހިންމު ދައުރެއް އަދާކުރި ކުޅުންތެރިޔަކީ ހައިޝަމް ރަޝީދެވެ. އޭނާ ވަނީ ހެޓްރިކް ހަދައިފަ އެވެ.

ދިއްދޫގެ ހަތަރު ލަނޑު އެ ޓީމުން ޖެހީ ވެސް މެޗުގެ ފަހު 10 މިނެޓްތެރޭގަ އެވެ. ފުރަތަމަ ދެ ލަނޑު 83 ވަނަ މިނެޓާއި 88 ވަނަ މިނެޓްގައި ޖެހީ ހައިޝަމް އެވެ.

އޭނާ ދެ ވަނަ ލަނޑު ޖެހިތާ މިނެޓެއް ނުވަނީސް އެ ޓީމުގެ އާދަމް ނަސީމް ޖެހި ލަނޑުން ދިއްދޫން ލީޑް ނެގި އެވެ. ހައިޝަމްގެ ހެޓްރިކް ފުރިހަމަ ކުރީ މެޗުގެ އިތުރު ވަގުތުގަ އެވެ.

ކުޅުނު ހަތަރު މެޗު ވެސް ކާމިޔާބުކޮށް އެ ގުރޫޕްގެ އެއްވަނަ ހޯދީ ފުވައްމުލަކެވެ. އެ ޓީމުން 12 ޕޮއިންޓް ހޯދި އެވެ.