ގާޑިއަން އިން އީލޮން މަސްކުގެ "އެކްސް" ބޮއިކޮޓްކޮށްފި

އިނގިރޭސިވިލާތުގެ މަޝްހޫރު "ދި ގާޑިއަން" ނޫހުން އީލޮން މަސްކްގެ ސޯޝަލް މީޑީއާ ނެޓްވޯކް، "އެކްސް" ބޮއިކޮޓް ކޮށްފި އެވެ.

އިނގިރޭސިވިލާތުގައި ހިންގާ އެންމެ ދުވަސްވީ އެއް މީޑިއާ ކުންފުނި ދި ގާޑިއަންއިން ބުނީ އެ ކުންފުނީގެ އެއްވެސް އޮފިޝަލް އެކައުންޓަކުން އެކްސްގައި ޕޯސްޓް ނުކުރަން ނިންމާފައިވާ ކަމަށާއި މިއީ އެކްސް އަކީ ވަކި އަތަކަށް ބުރަވެފައިވާ ޕްލެޓްފޯމަކަށް ވާތީ ނިންމި ގޮތެއް ކަމަށެވެ.

އެ ނޫހުން ބުނީ ކަނާއަތު ފިޔައިގެ ހަރުކަށި ސިޔާސީ ހިޔާލުތަކާއި ނަސްލީ އިމްތިޔާޒަށް ހިތްވަރު ލިބޭ ކޮންޓެންޓް ފެތުރުމަށް އެކްސްއިން މަސައްކަތް ކޮށްފައިވާ ކަމަށެވެ. އެމެރިކާގެ އިންތިހާބު ކަވަރޭޖްގައި ވަކި ކޮޅަކަށް ބުރަވެފައިވާ ކޮންޓެންޓް ބޮޑަށް ފެތުރުމަށް ވެސް އެކްސްއިން އިސްކަން ދީފައިވާ ކަމަށް ދި ގާޑިއަން އަށް ފާހަގަ ކުރެވިފައިވާ ކަމަށް އެ ނޫހުން ބުނެ އެވެ.

އެމެރިކާގެ އިންތިހާބުގައި މަސްކް ތާއީދު ކުރެއްވީ، އިންތިހާބު ކާމިޔާބު ކުރެއްވި ކުރީގެ ރައީސް ޑޮނަލްޑް ޓްރަމްޕަށެވެ. ކަނާއަތު ފިޔައިގެ ހަރުކަށި ސިޔާސީ ވިސްނުމެއް ގެންގުޅޭކަމުގެ ތުހުމަތުތައް ޓްރަމްޕަށް އޮންނަނީ އަމާޒުވެފަ އެވެ.

"ދި ގާޑިއަންގެ އެއްވެސް އެޑިޓޯރިއަލް އެކައުންޓަކުން މީގެ ފަހުން ސޯޝަލް މީޑިއާ ސައިޓް، 'އެކްސް" ގައި ޕޯސްޓް ނުކުރާނެކަން ދި ގާޑިއަންގެ ކިޔުންތެރިންގެ ސަމާލުކަމަށްޓަކައި ދަންނަވަން،" ދި ގާޑިއަން މީޑިއާ ކުންފުނިން ނެރެފައިވާ ބަޔާނުގައިވެ އެވެ.

"އެމެރިކާގެ ރިޔާސީ އިންތިޚާބުގެ ކެމްޕޭނުގެ ކަވަރޭޖުން ފެށިގެން މި ކުންފުންޏަށް އެކަން ފާހަގަކުރެވުނު. އެކްސް އަކީ ވިހަ މީޑިއާ ޕްލެޓްފޯމެއް. އޭގެ ވެރިފަރާތް ކަމަށްވާ އީލޮން މަސްކް އޭގެ ނުފޫޒު ބޭނުންކޮށްގެން ސިޔާސީ ކަންކަން ވަކިގޮތަކަށް ބައްޓަން ކުރަން މަސައްކަތް ކޮށްފައިވޭ."

ދި ގާޑިއަންގެ 80 އަށް ވުރެ ގިނަ ރަސްމީ އެކައުންޓް އެކްސްގައި ބޭނުން ކުރެ އެވެ. އެކްސްގައި އެ މީޑިއާ ފޮލޯ ކުރާ މީހުންގެ އަދަދު 27 މިލިއަނަށް ވުރެ މައްޗެވެ.

ދުނިޔޭގައި ބާއްވާ އެންމެ ބޮޑު އެއް ފިލްމް ފެއާ، ބާލިން ފިލްމް ފެސްޓިވަލުން ވެސް މިދިޔަ މަހު ވަނީ އެ ކުންފުނިން ވެސް އެކްސް ބޭނުން ކުރުން މިހާރު ހުއްޓާލާފައިވާ ކަމަށް ބުނެފަ އެވެ.

ދުނިޔޭގެ އެންމެ މުއްސަދި މީހާގެ ގޮތުގައި ފޯބްސްއިން ލިސްޓްކޮށްފައިވާ މަސްކް 2022 ގައި އެކްސް ގަތީ 44 ބިލިއަން ޑޮލަރަށެވެ. އޭރު ޓްވިޓާގެ ނަމުގައި ހިންގި ޕްލެޓްފޯމް އޭނާ ބަދަލު ކުރީ އޭނާގެ އެހެން ވިޔާފާރިތައް ވެސް އެ ނަމަކާ ގުޅިފައިވާ އެކްސްގެ ނަމަށެވެ.