ރިހާން، ތަޒުކީ އަދި އަޔާނާ އަށް ހުއްޓުމެއް ނެތް

އިންޓަ ސްކޫލު ސުވިމިން މުބާރާތުގައި މުހައްމަދު ރިހާން ޝިހާމާއި އަމްނާ ތަޒްކިޔާ މިރުޝާދު އަދި އަޔާނާ އަރީފް ވިދާލައިފި އެވެ.

އެ ފެތުންތެރިން ވަނީ ވާދަކުރި އުމުރުފުރާއިން އެއްވަނަ ހޯދައިފި އެވެ.

ބުރާސްފަތި ދުވަހުގެ ރޭ ބޭއްވި ސްޕޯޓްސް އެވޯޑްގައި ރާއްޖޭގެ އެންމެ މޮޅު ފެތުންތެރިޔާގެ އެވޯޑް ހޯދި ރިހާން ވަނީ 18 އަހަރުންދަށުގެ އުމުރުފުރާއިން އެންމެ މޮޅު ފިރިހެން ފެތުންތެރިޔާގެ މަގާމު ހޯދައިފަ އެވެ. ސްކޫލް މުބާރާތާ ރިހާން ކުރިމަތިލީ، ގައުމީ ދިގުފެތުމުގެ މުބާރާތުގެ އޯޕަން ކެޓަގަރީން ވެސް ޗެމްޕިއަންކަން ހޯދައިގެންނެވެ.

ގައުމީ ދިގު ފެތުމުގެ މުބާރާތުގެ އަންހެން އޯޕަން ބައިން އެއްވަނަ ހޯދި އަޔާނާ ވަނީ ސްކޫލް މުބާރާތުގައި 16 އަހަރުންދަށުގެ އެންމެ މޮޅު އަންހެން ފެތުންތެރިޔާގެ މަގާމު ހޯދައިފަ އެވެ.

މިދިޔަ އަހަރުގެ ދިގު ފެތުމުގެ މުބާރާތުގައި ޖޫނިއާ ބައިން އެއްވަނަ ހޯދީ އަޔާނާ ވަނީ ސްކޫލް މުބާރާތުގައި 10 އިވެންޓަކުން އެއްވަނަ ހޯދައިފަ އެވެ. އަދި އެއް އިވެންޓުން ދެވަނަ ހޯދި އެވެ. ފިރިހެން، 16 އަހަރުންދަށުގެ އެންމެ މޮޅު ފިރިހެން ފެތުންތެރިޔާގެ މަގާމު ހޯދީ އިޒްޔާން ނާޒިމެވެ.

މި އަހަރު އެންމެ ބޮޑަށް ވިދާލި އުއްމީދީ އަންހެން ފެތުންތެރިޔާ ތަޒްކީ ވަނީ 14 އަހަރުންދަށުގެބައިން އެންމެ މޮޅު ފެތުންތެރިޔާގެ މަގާމު ހޯދައިފަ އެވެ. ފިންލެންޑް އިންޓަނޭޝަނަލް ސްކޫލުން ވާދަކުރި ތަޒްކީ ވަނީ ގިނަ އިވެންޓްތަކުން ކާމިޔާބު ހޯދައިފަ އެވެ. އެ އުމުރުފުރާގެ އެންމެ މޮޅު ފިރިހެން ފެތުންތެރިޔާގެ މަގާމު ހޯދީ ޒުކައިން ޢަބްދުﷲ ހަނީފެވެ.

މިފަހަރުގެ އިންޓަ ސްކޫލް މުބާރާތުގައި 480 އަށް ވުރެ ގިނަ ފެތުންތެރިން ވާދަކުރި ކަމަށް ސްވިމިން އެސޯސިއޭޝަނުން ބުންޏެވެ.

ޖޫނިއާ އުމުރުފުރާގައި 12 އަހަރުންދަށުންގެ އެންމެ މޮޅު ފިރިހެން ފެތުންތެރިޔާގެ އެވޯޑް ހޯދީ، ގާޒީ ސްކޫލްގެ މުހައްމަދު ޔުއާން ޝަމީމެވެ. އެ އުމުރުފުރާގެ އެންމެ މޮޅު އަންހެން ފެތުންތެރިޔާގެ މަގާމު ހޯދީ މަރިޔަމް އައިރާ ޝިރުނީލެވެ.