ރަން މެޑަލް ހޯދި އިވެންޓުން ތަޒްކީ މުގުރާލީ 10 އަހަރުވީ ރެކޯޑެއް

ތައިލެންޑްގައި ބޭއްވި އޭޝިއަން އޯޕަން ސްކޫލް އިންވިޓޭޝަން ޝޯޓްކޯސް އޭޖް ގުރޫޕް މުބާރާތުގައި އަމްނާ ތަޒްކިޔާ މިރުސޯދު (ތަޒްކީ) ރަން މެޑަލް ހޯދި އިވެންޓުން 10 އަހަރު ވީ ރެކޯޑެއް މުގުރާލައިފި އެވެ.

އޯގަސްޓް މަހު ބޭއްވި މުބާރާތުގެ ފެތުންތެރިންގެ ޓައިމިން، ވެރިފައި ކުރުމަށް ފަހު ސްވިމިން އެސޯސިއޭޝަނުން އާންމު ކުރީ އިއްޔެ އެވެ. އެ މުބާރާތުގައި ފެތުންތެރިން ވާދަކުރީ އަމިއްލަ ހައިސިއްޔަތުންނެވެ.

ނިއު ލެގޫން ސްވިމިން ކްލަބްގެ ފަރާތުން އެ މުބާރާތުގައި ވާދަކުރި ތަޒްކީ ރަން މެޑަލް ހޯދީ 100 މީޓަރު ފްރީ ސްޓައިލް އިވެންޓުންނެވެ.

އެ ރޭސް 1.03.68 (1 މިނެޓާއި 3.68 ސިކުންތުން) ނިންމައި ތަޒްކީ މުގުރާލީ ގާތްގަނޑަކަށް 10 އަހަރުވީ ރެކޯޑެކެވެ. އޭގެ ކުރިން އެ ރެކޯޑް އޮތީ އާމިނަތު ޝަޖަން އަތުގަ އެވެ. ޑިސެމްބަރު 2014 ގައި ގަތަރުގައި ބޭއްވި ވޯލްޑް ޗެމްޕިއަންޝިޕްގެ ޝޯޓްކޯސް މުބާރާތުގައި ވާދަކޮށް އެ އިވެންޓްގެ ރޭސް ޝަޖަން ނިންމީ 1 މިނެޓާއި 6.01 ސިކުންތުންނެވެ.

ތައިލެންޑްގެ މުބާރާތުގައި ތަޒްކީ ވަނީ ދެ ރިހި މެޑަލް އަދި ލޯ މެޑަލް ހޯދައިފަ އެވެ. ރިހި މެޑަލް ހޯދީ 200 މީޓަރު ފްރީ ސްޓައިލް އަދި 50 މީޓަރު ފްރީސްޓައިލު އިވެންޓްތަކުންނެވެ. ލޯ މެޑަލް ހޯދީ 50 މީޓަރު ބަޓަފްލައި އަދި 200 މީޓަރު އިންޑަވިޖުއަލް މިޑްލޭ އިވެންޓުންނެވެ.

އޭނާ ރިހި މެޑަލް ހޯދި ފްރީ ސްޓައިލް ދެ ރޭހުގައި ވެސް ގައުމީ ރެކޯޑް ހެދި އެވެ. ފްރީ ސްޓައިލް 200 މީޓަރުން އޭނާ މުގުރާލީ ހަމަ 2014 ގެ ވޯލްޑް ޗެމްޕިއަންޝިޕުގައި ޝަޖަން ހެދި ރެކޯޑެކެވެ. އޭނާ، 2 މިނެޓް 28.41 ސިކުންތުން ހެދި ރެކޯޑް، އޯގަސްޓް މަހު ތަޒްކީ މުގުރާލީ 2 މިނެޓް 20.65 ސިކުންތުންނެވެ. 50 މީޓަރު ފްރީ ސްޓައިލް އިވެންޓްގެ ގައުމީ ރެކޯޑް ތަޒްކީ ހެދީ 28.55 ސިކުންތުން ރޭސް ނިންމައިގެންނެވެ. އެ އިވެންޓްގެ ރެކޯޑް މީގެ ކުރިން އޮތީ އާއިޝަތު އުލްޔާ ޝާއިގްގެ އަތުގަ އެވެ. މިއަހަރު އޮސްޓްރޭލިއާގައި ބޭއްވި ޔޫޑަބްލިއުއޭ ވެސްޓްކޯސްޓް ކްލަބް ނައިޓް ނަންބަރު 7 މުބާރާތުގައި އުލްޔާ، އެ އިވެންޓްގެ ރޭސް ނިންމީ 28.75 ސިކުންތުންނެވެ.

ތަޒްކީ ލޯ މެޑަލް ހޯދި 200 މީޓަރު އިންޑަވިޖުއަލް މިޑްލޭ އިވެންޓުން ވެސް ރެކޯޑް ހެދި އެވެ. މެރާލް އާއިން ލަތީފު 2 މިނެޓާއި 45.14 ސިކުންތުން ރޭސް ނިންމައިގެން މި އަހަރުގެ މެދުތެރޭގައި ހެދި ރެކޯޑް ތައިލެންޑް މުބާރާތުގައި ތަޒްކީ މުގުރާލީ 2 މިނެޓާއި 42.67 ސިކުންތުންނެވެ.

ތައިލެންޑް މުބާރާތުގައި ވާދަކުރި ރާއްޖޭގެ އެހެން ފެތުންތެރިން ވެސް ވަނީ ގިނަ ރެކޯޑްތަކެއް ހަދައިފަ އެވެ. އެ މުބާރާތުން ތިން ރިހި މެޑަލް ހޯދި ރިހާން ޝިހާމް ވަނީ ހަ ރެކޯޑެއް މުގުރާލައިފަ އެވެ. މިއީ އެއް މުބާރާތެއްގައި ރިހާން އެންމެ ގިނަ އަދަދަކަށް ރެކޯޑް މުގުރާލި ފުރަތަމަ ފަހަރެވެ. މެރާލް އާއިން ލަތީފު ހަތަރު ރެކޯޑެއް ހެދި އެވެ. އަދި އިޒްޔާން ނާޒިމް ވެސް ދެ ރެކޯޑް ހެދި އެވެ.