ޕޯޗުގަލް އާއި ސްޕެއިން ނޭޝަންސް ލީގުގައި ހަމަޖެހިލައިފި

ޔުއެފާ ނޭޝަންސް ލީގުގައި ރޭ ކްރިސްޓިއާނޯ ރޮނާލްޑޯގެ ލަނޑާ އެކު ޕޯޗުގަލް އިން 3-1 އިން ޕޮލެންޑް ބަލިކުރިއިރު، ޔޫރަޕުގެ ޗެމްޕިއަން ސްޕެއިނުން ޑެންމާކް އަތުން 1-0 އިން މޮޅުވެއްޖެ އެވެ.

ޕޮލެންޑުގެ ވެރިރަށް ވޯސޯގައި ޕޯޗުގަލުން ހޯދި މި މޮޅާ އެކު އެ ޓީމު އޮތީ ނުވަ ޕޮއިންޓް ހަމަކޮށް އޭ ލީގުގެ ގްރޫޕް އެކެއްގެ އެއް ވަނައިގަ އެވެ. ދެ ވަނައިގައި ހަ ޕޮއިންޓާ އެކު އޮތީ ރޭ ސްކޮޓްލެންޑް އަތުން އަމިއްލަ ގައުމުގައި 2-1 އިން މޮޅުވި ކްރޮއޭޝިއާ އެވެ. ޕޮލެންޑް ތިން ޕޮއިންޓާ އެކު ތިން ވަނައިގައި އޮތްއިރު ސްކޮޓްލެންޑް އޮތީ ޕޮއިންޓެއް ނުލިބި ފުލުގަ އެވެ.

ޕޮލެންޑް ކޮޅަށް ރޭ ޕޯޗުގަލްގެ ފުރަތަމަ ގޯލް ވައްދާލީ ބެނާޑޯ ސިލްވާ އެވެ. ރޮނާލްޑޯ ގޯލް ޖެހީ އޭގެ ފަހުންނެވެ. ދެ ވަނަ ހާފުގެ ފަހުކޮޅު ޕޮލެންޑުގެ ޕިއެޓްރޯ ޒިއެލިންސްކީ ގޯލެއް ޖަހާފައި ޕޯޗުގަލް ހާސްކޮށްލި ނަމަވެސް، ޕޮލެންޑުގެ ޔާން ބެޑްނަރެކް އަތުން ބައިކޮޅަށް ވަން ގޯލުން ޕޯޗުގަލްގެ ލީޑު ފުޅާވީ އެވެ.

ރޭގެ މެޗުގައި ރޮނާލްޑޯ ޖެހި ގޯލަކީ އުމުރުން 39 އަހަރުގެ ކުޅުންތެރިޔާ ޖެހި ބައިނަލްއަގްވާމީ 133 ވަނަ ގޯލެވެ. ސައުދީ އަރަބިއްޔާގެ ލީގުގައި ކުޅުނަސް ރޮނާލްޑޯ އަށް އަންނަނީ ޕޯޗުގަލް ޓީމުގެ ފުރަތަމަ އެގާރައިން ގަވާއިދުން ޖާގަ ލިބެމުންނެވެ.

ގްރޫޕް ހަތަރެއްގައި ރޭ ޑެންމާކް އަތުން ސްޕެއިން އެ ގައުމުގެ މުރްސިއާގައި މޮޅުވީ 79 ވަނަ މިނެޓުގައި މާޓިން ޒުބިމެންޑީ ޖެހި ގޯލުންނެވެ. މި މޮޅާ އެކު ސްޕެއިން ވަނީ ހަތް ޕޮއިންޓް ހަމަކޮށްފަ އެވެ. އެ ޓީމު އޮތީ އެއް ވަނަ މަގާމުގަ އެވެ. ފުރަތަމަ ދެ މެޗުން މޮޅުވި ޑެންމާކް އޮތީ ހަ ޕޮއިންޓާ އެކު ދެ ވަނައިގަ އެވެ. ތިން ވަނައިގައި ހަތަރު ޕޮއިންޓާ އެކު އޮތީ ރޭ ސްވިޒަލެންޑް އަތުން 2-0 އިން މޮޅުވި ސާބިއާ އެވެ. ސްވިޒަލެންޑަށް ޕޮއިންޓެއް ނުލިބެ އެވެ.

އޭ ލީގުގެ ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމު ނޭޝަނަސް ލީގުގެ ކުއާޓާ ފައިނަލަށް ހޮވޭނެ އެވެ. ތިން ވަނަ ޓީމު ރެލިގޭޝަން ޕްލޭއޮފުގައި ވާދަކުރަން ޖެހޭއިރު ފުލަށް ދާ ޓީމު ބީ ލީގަށް ރެލިގޭޓްވާނެ އެވެ.