ސްޕެއިން ނޭޝަންސް ލީގުގެ ކުއާޓާ އަށް

ސާބިއާ އަތުން 3-0 އިން މޮޅުވެ، ޔޫރަޕުގެ ޗެމްޕިއަން ސްޕެއިނުން ޔުއެފާ ނޭޝަންސް ލީގުގެ ގްރޫޕް ހަތަރަކުން ކުއާޓާ ފައިނަލުން ރޭ ޖާގަ ހޯދައިފި އެވެ.

ސްޕެއިން އެ ފުރުސަތު ހޯދީ ހަތަރު މެޗުން 10 ޕޮއިންޓް ހަމަކޮށްގެންނެވެ. ބާކީ އޮތް ދެ މެޗުން ބަލިވިޔަސް އެ ޓީމަށް ގަދަ ދެ ޓީމުގެ ތެރެއިން ޖާގަ ގެއްލޭނެ ގޮތެއް ނެތެވެ. ގްރޫޕުގެ ދެ ވަނައިގައި ހަތް ޕޮއިންޓާ އެކު އޮތީ ޑެންމާކެވެ. އެ ޓީމު ވަނީ ސްވިޒަލެންޑާ 2-2 އިން އެއްވަރުވެފަ އެވެ. ހަތަރު ޕޮއިންޓާ އެކު ތިން ވަނައިގައި ސާބިއާ އޮތްއިރު އެއް ޕޮއިންޓާ އެކު ފުލުގައި އޮތީ ސްވިޒަލެންޑެވެ.

އޭ ލީގުގެ ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމު ކުއާޓާ ފައިނަލަށް ހޮވޭނެ އެވެ. ތިން ވަނަ ޓީމު ރެލިގޭޝަން ޕްލޭއޮފުގައި ވާދަކުރަން ޖެހޭއިރު ފުލަށް ދާ ޓީމު ބީ ލީގަށް ރެލިގޭޓްވާނެ އެވެ.

ކޯޑޮބާގައި ރޭ ސާބިއާ އަތުން ސްޕެއިން މޮޅުވި މެޗުގައި އެ ޓީމަށް ކުރި ހޯދައިދިނީ ފަސް ވަނަ މިނެޓުގައި އައިމެރިކް ލަޕޯޓް އެވެ. ދެ ވަނަ ގޯލު 65 ވަނަ މިނެޓުގައި ޖެހީ ކެޕްޓަން އަލްވާރޯ މޮރާޓާ އެވެ. އޭގެ ކުރިން އޭނާ އަތުން ޕެނަލްޓީއެއް ބޭކާރުވި އެވެ. ސާބިއާގެ ޑިފެންޑަރު ސްޓްރަނިހާ ޕަވްލޮވިޗަށް ރަތްކާޑެއް ދައްކާފައި ވަނިކޮށް ސްޕެއިނުގެ ތިން ވަނަ ގޯލު 77 ވަނަ މިނެޓުގައި ޖެހީ އެލެކްސް ބޭނާ އެވެ.

ނޭޝަންސް ލީގުގައި ރޭ ގްރޫޕް އެކެއްގައި ކްރިސްޓިއާނޯ ރޮނާލްޑޯގެ ޕޯޗުގަލް ވަނީ ސްކޮޓްލެންޑާ 0-0 އިން އެއްވަރުވެފަ އެވެ. ގްލާސްގޯގެ ހެމްޑެން ޕާކުގައި ކުޅުނު މި މެޗުން ލިބުނު ޕޮއިންޓާ އެކު ޕޯޗުގަލް އޮތީ 10 ޕޮއިންޓް ހަމަކޮށް އެއް ވަނައިގަ އެވެ. އެ ޓީމަށް ކުއާޓާގެ ޖާގައެއް އަދި ކަށަވަރުނުވިޔަސް މިހާރު ވަނީ ފުލަށް ގޮސް ރެލިގޭޓްނުވާނެކަން ކަށަވަރުވެފަ އެވެ. މި ގްރޫޕުގެ ދެ ވަނައިގައި ހަތް ޕޮއިންޓާ އެކު އޮތީ ރޭ ޕޮލެންޑާ 3-3 އިން އެއްވަރުވި ކްރޮއޭޝިއާ އެވެ. ޕޮލެންޑް ހަތަރު ޕޮއިންޓާ އެކު ތިން ވަނައިގައި އޮތްއިރު، އެންމެ ޕޮއިންޓާކާ އެކު ފުލުގައި އޮތީ ސްކޮޓްލެންޑެވެ.