ރޮނާލްޑޯގެ ގޯލުން ޖަރުމަން ބަލިކޮށް ޕޯޗުގަލް ފައިނަލަށް

މިއުނިޗް (ޖޫން 5) - ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ކާމިޔާބު ކޮށްދިން ގޯލާ އެކު 2-1 އިން ޖަރުމަން ބަލިކޮށް، ޔޫއެފާ ނޭޝަންސް ލީގުގެ ފައިނަލުން ޕޯޗުގަލް ޖާގަ ހޯދައިފި އެވެ.

ޖަރުމަނުން ފުރަތަމަ ހާފު ޑޮމިނޭޓް ކޮށްގެން ގިނަ ހަމަލާތަކެއް އުފެއްދި އިރު ޕޯޗުގަލްގެ ގޯލްކީޕަރު ޑިއޯގޯ ކޮސްޓާ ވަނީ މޮޅު ސޭވްތަކެއް ކޮށްފަ އެވެ. ނަމަވެސް ދެވަނަ ހާފު ފެށިގެން ތިންވަނަ މިނިޓުގައި ފްލޯރިއަން ވާޓްޒް ވަނީ ހުސްކޮށް ހުރެ ޖަރުމަނަށް ގޯލެއް ޖަހައިދީ ލީޑު ހޯދައިދީފަ އެވެ.

ޕޯޗުގަލް ނަތީޖާ އެއްވަރު ކުރީ ބަދަކު ކުޅުންތެރިއެއް ގޮތުގައި ކުޅެން އެރި ފްރަންސެސްކޯ ކޮންސެސާއޯ، މެޗުގެ 63 ވަނަ މިނިޓުގައި ޖަހައިދިން ގޯލުންނެވެ. އޭގެ ފަސް މިނިޓު ފަހުން ރޮނާލްޑޯ ޕޯޗުގަލް އަށް ލީޑު ނަގައިދިނީ ނޫނޯ މެންޑޭޒް ދިން ޕާހަކުންނެވެ.

މިއީ އުމުރުން 40 އަހަރުގެ ފޯވާޑް، ގައުމީ ޓީމަށް ޖަހައިދިން 137 ވަނަ ގޯލެވެ. އަދި މިއީ 2000 ވަނަ އަހަރުގެ ފަހުން ޕޯޗިގަލް އިން ޖަރުމަންގެ މައްޗަށް ކުރި ހޯދި ފުރަތަމަ ފަހަރެވެ.

ކޮންސެއާއޯ އަށް ވެސް މި މޮޅު ހާއްސަ އެވެ. އެއީ، 2000 ވަނަ އަހަރު ޔޫރޯ މުބާރާތުގައި ޕޯޗުގަލް އިން ޖަރުމަން ބަލި ކުރި މެޗުގައި އޭނާގެ ބައްޕަ، ސާޖިއޯ ވަނީ ހެޓްރިކް ހަދައިފަ އެވެ.

ޕޯޗުގަލް ވަނީ 2019 ވަނަ އަހަރު ބޭއްވި ފުރަތަމަ ނޭޝަންސް ލީގު ފައިނަލް ކާމިޔާބު ކޮށްފަ އެވެ. ދެވަނަ ފަހަރަށް މުބާރާތުގެ ފައިނަލަށް އެ ޓީމު ދަތުރު ކޮށްފައި ވާއިރު، މިއަހަރުގެ ފައިނަލްގައި ނުކުންނާނީ މިރޭ ސްޕެއިން އާއި ފްރާންސް ބައްދަލުކުރާ މެޗުން މޮޅުވާ ޓީމަކާ ދެކޮޅަށެވެ.

މިހާތަނަށް ނޭޝަންސް ލީގު ކާމިޔާބު ކޮށްފައި ވަނީ ޕޯޗުގަލްގެ އިތުރުން ފްރާންސް އާއި ސްޕެއިން އެވެ.