ގައުމީ މުބާރާތް ވެސް ޓީރެކްސް އާއި ކުއީންސް އަށް

ގައުމީ ބާސްކެޓްބޯޅަ މުބާރާތުގެ ޗެމްޕިއަންކަން ވެސް ޓީރެކްސް ބީސީ އާއި ކުއީންސް ބީސީ ހޯދައިފި އެވެ.

ގައުމީ މުބާރާތުގައި ހޯމަ ދުވަހުގެ ރޭ ފުރަތަމަ ކުޅުނީ ކުއީންސް އާއި އެލީޓް ބައްދަލުކުރި އަންހެން ފައިނަލެވެ. ކުއީންސް ޗެމްޕިއަންކަން ހޯދީ 97-52 ޕޮއިންޓުން ކުރި ހޯދައިގެންނެވެ. މިއީ 2020 ވަނަ އަހަރުގެ ފަހުން ކުއީންސް މުބާރާތް ކާމިޔާބުކުރި ފުރަތަމަ ފަހަރެވެ.

ކުއީންސްގެ ފާތިމަތު ރިޝްމާ ވަނީ އެޓީމަށް 29 ޕޮއިންޓް މެޗުގައި އެއްކޮށްދީފަ އެވެ. އެލީޓް އަށް އެންމެ ގިނަ ޕޮއިންޓް އެއްކުރީ ފާތިމަތު އީހައު ޝަހީމް އާއި އައިޝަތު އިނާޝާ އެވެ. ކޮންމެ ކުޅުންތެރިއަކު ވެސް މެޗުގައި 13 ޕޮއިންޓް ސްކޯކުރި އެވެ.

ޓީރެކްސް ޗެމްޕިއަންކަން ހޯދީ ކުރީ ތިން ފަހަރު ވެސް ޗެމްޕިއަންކަން ހޯދި ކިންގްސް ބަލިކޮށްގެންނެވެ. ވާދަވެރި ފައިނަލް މެޗު ޓީރެކްސް ކާމިޔާބު ކުރީ 86-83 ޕޮއިންޓުންނެވެ.

މެޗުގެ ފުރިހަމަ ވަގުތު ހަމަވިއިރު ވެސް ދެ ޓީމު 67-67 ޕޮއިންޓުން އެއްވަރު ވުމާ ގުޅިގެން ޖެހުނީ އޯވާޓައިމްގެ ދެ ޕީރިއަޑް ކުޅުނީ އެވެ. ފުރަތަމަ ޕީރިއަޑް ނިމުނުއިރު ވެސް ދެ ޓީމު އޮތީ 75-75 ޕޮއިންޓުން އެއްވަރު ވެފަ އެވެ. ޓީރެކްސް ނަތީޖާ ނެރުނީ ފަހު ޕީރިއަޑުގައި ތިން ޕޮއިންޓުގެ ތަފާތަކުންނެވެ.

ޓީރެކްސްގެ މުހައްމަދު ހުވައިލިދު އަލީ މެޗުގައި 23 ޕޮއިންޓް ހޯދި އެވެ. އެޓީމުގެ ޒަކަރިއްޔާ އަބްދުއްލަތީފް 20 ޕޮއިންޓް ސްކޯ ކުރި އިރު، ކިންގްސް އަށް އެންމެ ގިނަ ޕޮއިންޓް ހޯދައިދިނީ 19 ޕޮއިންޓް ސްކޯ ކުރި އިބްރާހިމް ނަސީމް އެވެ.