އެމްބީއޭ ޗެމްޕިއަންޝިޕުގެ ފައިނަލަށް ޓީރެކްސް އާއި ކިންގްސް

އެމްބީއޭ ޗެމްޕިއަންޝިޕް ބާސްކެޓްބޯޅަ މުބާރާތުގެ ފިރިހެން ޑިވިޝަނުގެ ފައިނަލުން ކިންގްސް ބީސީ އާއި ޓީރެކްސް ބީސީ ޖާގަ ހޯދައިފި އެވެ.

ރެޑްލައިން ކްލަބަށް ކުރިން ކުޅުނު ކުޅުންތެރިންތަކެއް ހިމެނޭ ކިންގްސް އިން ފައިނަލަށް ދަތުރުކުރީ އިއްޔެ ކުޅުނު ސެމީ ފައިނަލުގެ ފުރަތަމަ މެޗުން ދަ ބައުސް ސްޕޯޓްސް ކްލަބް އަތުން 88-72 ޕޮއިންޓުން މޮޅުވެގެންނެވެ.

މި މެޗުގައި ކިންގްސް އަށް އެންމެ ގިނަ ޕޮއިންޓް އެއްކޮށްދިނީ މެޗުގެ މޮޅު ކުޅުންތެރިއާގެ މަގާމް ވެސް ހޯދި އަހުމަދު ފިރާޝެވެ. އޭނާ 23 ޕޮއިންޓް އެއްކުރި އެވެ. ދެ ވަނަ އަށް އެންމެ ގިނަ ޕޮއިންޓް ހޯދައިދިނީ، 21 ޕޮއިންޓާ އެކު މުހައްމަދު ޒިލާލެވެ. ބައުސް އަށް އެންމެ ގިނަ ޕޮއިންޓް އެއްކޮށްދިނީ 23 ޕޮއިންޓާ އެކު އަބްދުﷲ އަމްޒަރާއި 20 ޕޮއިންޓާ އެކު އިބްރާހިމް ނަސީމެވެ.

ޓީރެކްސް އެންމެ ކުރިއަށް ފައިނަލުން ފުރުސަތު ހޯދީ ސެމީ ފައިނަލުގެ ދެ ވަނަ މެޗުން ރެޕްޓޯސް ބާސްކެޓްބޯލް ކްލަބް އަތުން 84-53 ޕޮއިންޓުން މޮޅުވެގެންނެވެ. މި މެޗުގެ މޮޅު ކުޅުންތެރިއާގެ މަގާމް ހޯދީ 18 ޕޮއިންޓާ އެކު ޓީރެކްސްގެ އިބްރާހިމް ރަޝްވާން (ޗިކު) އެވެ. އެ ޓީމަށް ދެން އެންމެ ގިނައިން ޕޮއިންޓް އެއްކޮށްދިނީ 14 ޕޮއިންޓާ އެކު އިސްމާއިލް ވިލްދާނެވެ.

މުބާރާތުގެ އަންހެން ޑިވިޝަނުގެ ފުރަތަމަ ސެމީ ފައިނަލުގައި މިއަދު ހަވީރު ބައްދަލުކުރާނީ ޓައިޓަންސް ސްޕޯޓްސް ކްލަބާއި ޓީރެކްސް ސްޕޯޓްސް އެކަޑަމީ އެވެ. ދެ ވަނަ ސެމީ ފައިނަލުގައި މިރޭ ބައްދަލުކުރާނީ ސައިކްލޯން ބީސީ އާއި ދިވެހި ސިފައިންގެ ކްލަބެވެ.