ފުވައްމުލަކުގެ މަގުތަކުގައި ތާރު އެޅުމުގެ ދެ ވަނަ ފިޔަވަހި ފަށައިފި

ފުވައްމުލަކު އެތެރޭގެ މަގުތައް ހެދުމުގެ މަޝްރޫއުގެ ދެ ވަނަ ފިޔަވަހީގެ މަސައްކަތް ރަސްމީކޮށް މިއަދު ފަށައިފި އެވެ.

ދެކުނުގެ ހަތަރު އަތޮޅުތަކަށް ރައީސް ޑރ. މުހައްމަދު މުއިއްޒު މިހާރު ކުރައްވަމުން ގެންދަވާ ދަތުރުފުޅުގައި ފުވައްމުލަކަށް ހަވީރު ވަޑައިގެން ވަނީ މި ރަށުގެ މަގުތައް ހެދުމުގެ މަޝްރޫއުގެ ދެ ވަނަ ފިޔަވަހީގެ މަސައްކަތް ފައްޓަވައި ދެއްވައިފަ އެވެ.

އެ މަޝްރޫއުގެ ދަށުން ފުވައްމުލަކުގެ ކުދި މަގުތަކުގައި ތާރު އަޅާ ގޮތަށް ވަނީ ހަމަޖެހިފަ އެވެ. އޭގެ ތެރޭގައި 50 މަގުގައި ތާރު އަޅާ ގޮތަށް ނިންމާފައިވާއިރު މިއީ 12.7 ކިލޯ މީޓާރު ސަރަހައްދެކެވެ.

އެ މަޝްރޫއުގެ ދެ ވަނަ ފިޔަވަހި މިދިޔަ އަހަރުގެ ޖުލައި މަހުގެ ތެރޭގައި އެމްޓީސީއާ ހަވާލުކުރީ ދެ އަހަރުގެ ތެރޭގައި ނިންމާ ގޮތަށް 255.2 މިލިއަން ރުފިޔާ އަށެވެ.

ފުވައްމުލަކު މަގުތައް ހެދުމުގެ ފުރަތަމަ ފިޔަވަހީގެ ދަށުން ވަނީ ރަށުގެ ބޮޑެތި މަގުތަކުގައި ތާރު އަޅައިފަ އެވެ.

އެމްޓީސީސީން ކުރިއަށް ގެންދާ އެ މަޝްރޫއުގެ އަމަލީ މަސައްކަތް ފެށީ 2020 ވަނަ އަހަރުގެ ފަހުކޮޅުގަ އެވެ. ފުރަތަމަ ފިޔަވަހީގެ ދަށުން ރަށުގެ 31 މަގެއްގައި ތާރު އަޅައިގެން ހަދާފައިވެ އެވެ. އެއީ 95،000 އަކަ މީޓަރަށް ވުރެ ބޮޑު ސަރަހައްދެކެވެ.

މަގުތައް ހެދުމުގެ ފުރަތަމަ ފިޔަވައްސަކީ 331 މިލިއަން ރުފިޔާގެ މަޝްރޫއެކެވެ.