ދެވަނަ ބުރުގައި ނަޝީދުގެ ތާއީދަށް ރައީސް އެދިވަޑައިގެންފި

އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ތާއީދަށް، އެ މަނިކުފާނާ އެކު މިއަދު ބޭއްވެވި ބައްދަލުވުމުގައި ރައީސް އިބްރާހިމް މުހައްމަދު ސޯލިހު އެދިވަޑައިގެންފި އެވެ.

ރައީސް އާއި ނަޝީދު މިއަދު ރައީސް އޮފީހުގައި ބައްދަލުކުރެއްވުމަށް ފަހު މީޑިއާތަކާ ވާހަކަ ދެއްކެވި އެވެ.

އެ އިންޓަވިއުގައި ރައީސް ވިދާޅުވީ ނަޝީދާ އެކު މަޝްވަރާ ކުރެއްވީ ރާއްޖޭގެ ސިޔާސީ މަސްރަހުގައި މިހާރު ހިނގަމުންދާ ކަންކަމާ ގުޅޭ ގޮތުން ކަމަށެވެ.

އެމަނިކުފާނު ވިދާޅުވި ގޮތުގައި، އޭގެ ތެރެއިން އެއް ކަމަކީ ރައްޔިތުންގެ މަޖިލީހުން މިދިޔަ ހަފުތާގައި ފާސްކުރި ނިޒާމީ ވޯޓު ނެގުމާ ގުޅޭ ގަރާރެވެ. އަދި އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގެ ވޯޓާ ގުޅޭ ގޮތުން ވެސް ދެބޭފުޅުން މަޝްވަރާކުރެއްވި ކަމަށް ވިދާޅުވި އެވެ.

އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވީ ދެވަނަ ބުރުގައި ނަޝީދާއި އެމަނިކުފާނުގެ ޕާޓީ، ޑިމޮކްރެޓްސް އިން ވަކި ޕާޓީއަކަށް ތާއިދުނުކުރަން ނިންމާފައި އޮތް އޮތުމާ ގުޅޭ ގޮތުން ވެސް ދެބޭފުޅުން މަޝްވަރާ ކުރެއްވި ކަމަށެވެ. ޑިމޮކްރެޓްސް އިން އެގޮތަށް ނިންމާފައި އޮތަސް، ދެވަނަ ބުރުގައި ނަޝީދުގެ ތާއީދު ހޯއްދެވުމަށް މަޝްވަރާކުރެއްވި ކަމަށް އެމަނިކުފާނު ވިދާޅުވި އެވެ.

އެ މަޝްވަރާގެ ތަފުސީލް ފަހުން އާންމުކުރައްވާނެ ކަަމަށް ރައީސް ވިދާޅުވި އެވެ.

"އަޅުގަނޑުމެން އެކަމާ [ނަޝީދުގެ ތާއީދު ހޯދުމާ] ބެހޭގޮތުން ވާހަކަ ދެކެވުނު. ތަފުސީލު އަޅުގަނޑުމެން ފަހުން ހާމަކުރާނަން،" ރައީސް ވިދާޅުވި އެވެ.

ރިޔާސީ އިންތިހާބުގެ ދެވަނަ ބުރަށް ވަގުތު ކުޑަތަންވެފައި ވާއިރު، މިއީ ނަޝީދާއި ރައީސްގެ ގުޅުން ވަރަށް ބޮޑަށް ގޯސްވެފައި އޮތުމަށް ފަހު ފަހުގެ ތާރީހެއްގައި ބައްދަލުކުރެއްވި ފުރަތަމަ ފަހަރެވެ. އެމްޑީޕީގެ ރިޔާސީ ޕްރައިމަރީން ބަލިވުމުން، ނަޝީދު ވަނީ އެ ޕާޓީ ދޫކުރައްވައި، ޑިމޮކްރެޓްސް އުފެއްދެވުމަށް ފަހު، އެމްޑީޕީ އާއި ރައީސް އިބްރާހިމް މުހައްމަދު ސޯލިހަށް އެކި ފަހަރު މަތިން ވަރަށް ބޮޑަށް ފާޑުވިދާޅުވެފަ އެވެ.

ނަތީޖާ ކޮންމެ ގޮތަކަށް އަޔަސް ނިޒާމީ ވޯޓު ބާއްވާނެ

ނިޒާމީ ވޯޓާ ގުޅޭ ގޮތުން ކުރެއްވި މަޝްވަރާ އަކީ ދެވަނަ ބުރުގެ ވޯޓަށް ފަހު އެ މަސައްކަތް ފަށައި، ސީދާ ރައީސް ވެސް އިލެކްޝަންސް ކޮމިޝަނުގައި އެކަމަށް އެދިވަޑައިގެން މަސައްކަތް ކުރިއަށް ގެންދިއުމަށް ކަމަށް އެމަނިކުފާނު ވިދާޅުވި އެވެ.

"[ނިޒާމީ ވޯޓުގެ ވާހަކަ] މިހާރު އިހަށް ނުދައްކާ، ދެވަނަ ބުރުގެ ވޯޓު ނިމުމުގެ ކުރިން އެ ވާހަކަ ނުދެއްކުމަށް [މަޝްވަރާކުރެއްވީ]. އަދި ދެވަނަ ބުރުގެ ވޯޓު ކޮންމެ ގޮތަކަށް ނިމުނު ކަމުގައި ވިޔަސް، އެ މަސައްކަތް ފަށަން،" ރައީސް ވިދާޅުވި އެވެ.

ރިޔާސީ އިންތިހާބުގެ ފުރަތަމަ ބުރުގައި ތިންވަނައަށް އެންމެ ގިނަ ވޯޓު ހޯދި ނަޝީދުގެ ޑިމޮކްރެޓްސް ޕާޓީން ނިންމާފައި ވަނީ ދެވަނަ ބުރުގައި އެއްވެސް ކެންޑިޑޭޓަކަށް ތާއީދުނުކުރުމަށެވެ.

އޭގެ ފަހުން އެ ޕާޓީން މަޖިލީހަށް ހުށަހެޅީ ދެވަނަ ބުރުގެ ވޯޓަށް ފަހު، ވެރިކަމުގެ ނިޒާމު ބަދަލުކުރުމާ ގުޅޭ ވޯޓެއް ނަގަން އިލެކްޝަންސް ކޮމިޝަނަށް އެންގުމަށެވެ. ޑިމޮކްރެޓްސް އިން ހުށަހެޅި އެ ގަރާރު މިދިޔަ ހަފުތާގައި މަޖިލީހުން ވަނީ ފާސްކޮށްފަ އެވެ. އެ ގަރާރު ފާސްކުރީ އަންނަ މަހު 30 ގެ ކުރިން ނިޒާމީ ވޯޓު ނަގަން ޖެހޭ ގޮތަށެވެ.