ރައީސް ޔަގީންކަން ދެއްވީ ދެ ވަނަ ބުރަކަށް ނުގޮސް ދެ ވަނަ ފަހަރަށް ވެރިކަން ލިބޭނެ ކަމަށް

އެމްޑީޕީން ރިޔާސީ އިންތިހާބެއްގެ ދެވަނަ ބުރަކަށް ނުގޮސް ވެރިކަމަށް އަންނާނެ މިއީ ދެވަނަ ފަހަރު ކަމަށް އެ ޕާޓީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

ސޯޝަލް ސެންޓަރުގައި މިރޭ ބޭއްވި އެމްޑީޕީގެ ބޮޑު ޖަލްސާގައި ރައީސްގެ ގިނަ އަދަދެއްގެ ސަޕޯޓަރުން ބައިވެރިވި އެވެ. އެ ސެންޓަރުގެ ހޯލާއި ބޭރު ވެސް އޮތީ ފުރިފަ އެވެ.

އެ ޖަލްސާގައި ރައީސް ވިދާޅުވި ގޮތުގައި، ރިޔާސީ ކެމްޕެއިނަށް ރާއްޖޭގެ ވަރަށް ގިނަ ރަށްރަށަށް ވަޑައިގަތުމުން ފެނުނު މަންޒަރާއި އިވުނު އަޑުތަކުން ރައްޔިތުން އަނބުރާ އަނިޔާވެރިކަމެއްގެ ތެރެއަށް ދާން ބޭނުން ނުވާކަން އެނގިވަޑައިގަތެވެ. ރައީސް ވިދާޅުވި ގޮތުގައި ދިވެހިން ދެން ވެސް ބޭނުންވަނީ އެމްޑީޕީގެ ވެރިކަމެކެވެ.

ރައީސް ވަނީ މި އަހަރުގެ ރިޔާސީ ކެމްޕެއިނަށް ވަރަށް މަދު އަތޮޅެއް ފިޔަވައި ހުރިހާ އަތޮޅެއްގެ ރަށްތަކަށް ކެމްޕެއިނަށް ވަޑައިގެންފަ އެވެ.

"[ދިވެހިން] ބޭނުންވަނީ އުފާވެރި އަމާން ރާއްޖެއެއް ހޯދުމަށްޓަކައި އަޅުގަނޑުމެން ފަށާފައިވާ މި މަސައްކަތް ގެންގޮސް ނިންމާލަން،" ރައީސް ވިދާޅުވި އެވެ.

އެހެންވެ، އަންނަ މަހު ނުވައެއްގައި ބާއްވާ ރިޔާސީ އިންތިހާބު ވަރަށް ފަސޭހައިން ކާމިޔާބުވާނެ ކަމަށް ރައީސް ޔަގީންކުރައްވަ އެވެ.

"އަޅުގަނޑު ޔަގީން ކަމާ އެކުގައި މި ދަންނަވަނީ، މިއީ ދެވަނަ ބުރެއް ނެތި، އިރާދަކުރެއްވިޔާ އަނެއްކާވެސް އަޅުގަނޑުމެން ވެރިކަމަށް އަންނާނެ ދެވަނަ ފަހަރުކަން،" ރައީސް ވިދާޅުވި އެވެ.

އެމްޑީޕީން 2018 ވަނަ އަހަރުގެ ރިޔާސީ އިންތިހާބުގައި ޕީޕީއެމްއާ ވާދަކޮށް ކާމިޔާބުކުރީ ދެވަނަ ބުރަކަށް ނުގޮހެވެ.

ރައީސް ވިދާޅުވީ އެންމެފަހުން ބޭއްވި ރިޔާސީ އިންތިހާބު ބޯމަތިވި އިރު، އޭރު ތިބި ސިޔާސީ ހުރިހާ ލީޑަރުންނާއި އެމީހުންގެ އަނބިދަރިންނާއި ގާތް ތިމާގެ މީހުން އަދި ވެރިކަމަށް ކުރިމަތިލަފާނެހެން ހީވާ ކޮންމެ މީހަކު ވެސް ހުރީ ޖަލުގައި ކަމަށެވެ. އެކަމަކު، މިއަދު އެ މަންޒަރު ތަފާތު ކަމަށް ރައީސް ވިދާޅުވި އެވެ.

މި ރިޔާސީ އިންތިހާބުގައި 8 ކެންޑިޑޭޓުން ވާދަކުރައްވާތީ އެކަމަށް އިޝާރަތްކުރައްވައި ރައީސް ވިދާޅުވީ މިއީ ރާއްޖޭގެ ތާރިހުގައި ވެސް ބާއްވާ އެންމެ ވާދަވެރި އިންތިހާބަށް ވެއްޖެ ކަމަށެވެ.

"ހިޔާލު ފާޅުކުރުމާއި މިނިވަންކަމަކީ ވެރިކަމަށް އޮތް ހުރަހެއް ނޫން. އެކަން އަޅުގަނޑުމެން މި ސާފުކޮށްދިނީ،" ރައީސް ވިދާޅުވި އެވެ.