ޖޭޕީގެ ޖަވާބެއް ބޭނުން، އަދާލަތާއި އެމްޑީއޭއާއެކު އެއްބުރުން ކާމިޔާބު ކުރެވޭނެ: ރައީސް

ކުރިޔަށް އޮތް ރިޔާސީ އިންތިހާބުގައި ގުޅިގެން ވާދަ ކުރުމަށް ޖުމްހޫރީ ޕާޓީ އަށް ދެއްވި ދައުވަތަށް ރަސްމީ ޖަވާބެއް ލިބިވަޑައިގަންނަވަންދެން މަޑުކޮށްލައިގެން ހުންނެވި ކަމަށާއި އެހެން ނަމަވެސް އަދާލަތު ޕާޓީ އާއި އެމްޑީއޭއާއެކު އިންތިހާބު އެއްބުރުން ކާމިޔާބު ކުރެވޭނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

އެމްޑީޕީއާއެކު ކޯލިޝަން ހަދަން މިހާތަނަށް އެއްބަސްވެފައިވާ އަދާލަތު ޕާޓީ އާއި އެމްޑީއޭ އިން މިއަދު ވަނީ މުލިޔާގޭގައި ރައީސްއާއެކު ބައްދަލުވުމެއް ބާއްވައިފަ އެވެ.

އެ ބައްދަލުވުމަށް ފަހު ބޭރަށް ނިކުމެވަޑައިގެން ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ އަދާލަތާއި އެމްޑީއޭއާއެކު ރިޔާސީ ކެމްޕެއިން ފެށުމާއި މެނިފެސްޓޯ އެކުލަވައިލުމުގެ މަސައްކަތް ފަށަން މަޝްވަރާ ކުރެއްވި ކަމަށެވެ.

ރިޔާސީ އިންތިހާބުގައި އެ ތިން ޕާޓީ ގުޅިގެން ރަނގަޅު މަސައްކަތްތަކެއް ކުރެވޭނެ ކަމަށާއި މިހާތަނަށް ދެކެވުނު ވާހަކަތަކުގެ އަލީގައި އާ ކޯލިޝަންގެ އަމާޒަކީ އެއްބުރުން ރިޔާސީ އިންތިހާބު ކާމިޔާބު ކުރުން ކަމަށް ރައީސް ވިދާޅުވި އެވެ.

"އަޅުގަނޑުމެންގެ އަމާޒަކީ އެއްބުރުން އިންތިހާބު ކާމިޔާބު ކުރުން. އެކަމުގެ ވަރާށް ބޮޑު އުންމީދެއް އަދި ޔަގީންކަން އެބައޮތް،" ރައީސް ވިދާޅުވި އެވެ.

ޖުމްހޫރީ ޕާޓީން ވަކިން ވާދަ ކުރަން ނިންމާފައިވާތީ އެކަމާ ގުޅޭ ގޮތުން ސުވާލު ކުރުމުން ރައީސް ވިދާޅުވީ އެ ޕާޓީ އާއި އެމްއާރްއެމް އަށް ކޯލިޝަނާ ގުޅެން ރަސްމީކޮށް ދައުވާތު ދެއްވާފައިވާ ކަމަށެވެ.

ޖުމްހޫރީ ޕާޓީ ރިޔާސީ އިންތިހާބަށް ވަކި ކެނޑިޑޭޓެއް ނެރޭނެ ކަމަށް އިއުލާން ކުރެއްވި ނަމަވެސް ރަސްމީ ޖަވާބެއް ލިބެންދެން މަޑުކޮށްލައިގެން ހުންނެވި ކަމަށް ރައީސް ވިދާޅުވި އެވެ.

"އަޅުގަނޑު މަޑުކޮށްގެން މި ހުރީ ޖުމްހޫރީ ޕާޓީން އަޅުގަނޑުމެންގެ އެ ރިކުއެސްޓަށް ކޮންމެވެސް ރަސްމީ ސިފައެއްގައި ޖަވާބެއް ލިބޭނެ ކަމަށް،" ރައީސް ވިދާޅުވި އެވެ.

ޖުމްހޫރީ ޕާޓީގެ ތާއީދު ލިބިއްޖެ ނަމަ ރިޔާސީ އިންތިހާބު ވަރަށް ފަސޭހައިން ކާމިޔާބު ކުރެވޭނެ ކަމަށް ރައީސް އަނެއްކާވެސް ވިދާޅުވި އެވެ.

އެ ވާހަކަފުޅު ތަފްސީލް ކުރައްވަމުން އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވީ ޖުމްހޫރީ ޕާޓީން ކޯލިޝަނާ ގުޅެން ނިންމައިފި ނަމަ މި އިންތިހާބު 60 ޕަސެންޓަށް ވުރެ މަތިން ކާމިޔާބު ކުރެވޭނެ ކަމަށެވެ.

އެހެން ނަމަވެސް އެ ޕާޓީ ވަކިން ވާދަކުރިޔަސް އެމްޑީޕީ، އަދާލަތު އަދި އެމްޑީއޭ އަށް ރިޔާސީ އިންތިހާބު އެއްބުރުން ކާމިޔާބު ކުރެވޭނެ ކަމަށް ފައްޔާޒް ވިދާޅުވި އެވެ.

އަޅުގަނޑުމެން ގަބޫލު ކުރަނީ ކުރިޔަށް އޮތް ތަނުގައި އެހެން ޕާޓީތައް ވެެސް [ރައީސް އުފައްދަވާ ކޯލިޝަނާ] ބައިވެރިވާނެ ކަމަށް،" ފައްޔާޒް ވިދާޅުވި އެވެ.

ކުރިޔަށް އޮތް ރިޔަސީ އިންތިހާބުގައި ކެނޑިޑޭޓަކު ނެރެން ޖުމްހޫރީ ޕާޓީން ނިންމުމަށް ފަހު އެ ޕާޓީން މިހާރު އަންނަނީ އިސްވެ ކޯލިޝަނެއް ހެދުމުގެ މަޝްވަރާތައް ކުރަމުންނެވެ. އެގޮތުން އިއްޔެ ޖުމްހޫރީ ޕާޓީން ވަނީ އެމްއާރްއެމް އާ ވެސް މަޝްވަރާ ކޮށްފަ އެވެ.

އެމްއާރްއެމް ވެސް އިން އިންތިހާބާ ގުޅޭ ގޮތުން ރައީސް އާ ބައްދަލު ކުރައްވާފައިވާ އިރު އެ ޕާޓީން މިއަދު ވަނީ އަދާލަތު ޕާޓީ އާ ވެސް މަޝްވަރާތަކެއްކޮށްފަ އެވެ.