14 އަހަރުގައި އީތަން އާއި އިލާނަށް ލީގުގައި ރެކޯޑެއް

ޔުނައިޓެޑް ވިކްޓަރީ (ޔޫވީ) އާ ދެކޮޅަށް ކުޅެ 2-1 އިން ބަލިވި ނަމަވެސް ކްލަބް ވެލެންސިއާ އަށް ކުޅޭ އުމުރުން 14 އަހަރުގެ އީތަން އިބްރާހިމް ޒަކީ އާއި މުހައްމަދު އިލާން އިމްރާން ރެކޯޑެއް ހަދައިފި އެވެ.

އީތަން އާއި އިލާން އަކީ ލީގުގެ ތާރީހުގައި ވެސް ކުޅޭ އެންމެ ހަގު ދެ ކުޅުންތެރިންނެވެ. ޔޫވީ ކޮޅަށް ގޯލު ޖަހައި އީތަން، ލީގުގައި ލަނޑު ޖެހި އެންމެ ހަގު ކުޅުންތެރިޔާގެ ރެކޯޑް މުގުރާލި އިރު، ލަނޑު ޖަހަން އެހީވި އިލާން މިވަނީ ލީގު މެޗެއްގައި ލަނޑެއް ޖަހަން އެހީވި އެންމެ ހަގު ކުޅުންތެރިޔާގެ ރެކޯޑް ހަދައިފަ އެވެ.

ގަލޮޅު ދަނޑުގައި ޔޫވީއާ ދެކޮޅަށް މި ރެކޯޑް ހެދިއިރު އީތަންގެ އުމުރަކީ 14 އަހަރާއި ނުވަ މަހާއި ދެ ދުވަހެވެ. އިލާންގެ އުމުރަކީ 14 އަހަރާއި ހަ މަހާއި 22 ދުވަހެވެ.

އީތަން މުގުރާލީ، މީގެ ތިން ދުވަސް ކުރިން އެ ޓީމަށް ކުޅޭ ޔޫސުފް އަޔާން އާމިރު (އާންބެ) ކްލަބް ގްރީން ސްޓްރީޓްސް ކޮޅަށް ލަނޑު ޖަހައިގެން ހެދި ރެކޯޑެވެ. އާންބެ ގޯލު ޖެހިއިރު އުމުރަކީ 15 އަހަރާއި ހަ މަހާއި 13 ދުވަހެވެ. ސީނިއާ ލެވެލްގައި ކުޅުނު ފުރަތަމަ މެޗުގައި އާމްބެ މުގުރާލީ، ރާއްޖޭގެ ލެޖެންޑް އަލީ އަޝްފާގު (ދަގަނޑޭ) އުމުރުން 16 އަހަރާއި ނުވަ މަހާއި ދެ ދުވަހުގައި ލަނޑު ޖަހައިގެން އޭނާ އަތުގައި 20 އަހަރު ވަންދެން އޮތް ރެކޯޑެކެވެ.

ޔޫވީއާ ދެކޮޅަށް މިއަދުގެ މެޗުގައި އީތަންގެ ލަނޑުން ވެލެންސިއާ ލީޑު ނެގީ 12 ވަނަ މިނިޓުގަ އެވެ.

ފުރަތަމަ ހާފު ނިމެން ހަތަރު މިނިޓަށް ވެފައި ވަނިކޮށް އަހުމަދު ބައްސާމް މުހައްމަދު ނައީމް ހުސްކޮށްލި ބޯޅައަކުން ޔޫވީ އަށް އެއްވަރު ކޮށްދިނީ ޝަނާން ރަޝާދެވެ. އޭގެ ކުރިން ވެސް ޝަނާނަށް ވަނީ ގޯލު ޖަހާނެ ފުރުސަތުތައް ލިބިފަ އެވެ. އަދި ބައްސާމް ނަގައިދިން ބޯޅައެއް އަލީ މީސާގް އީސާ ބޮލުން ފޮނުވާލުމުން އަމާޒުވީ ގޯލުގެ ހުރަސް ދަނޑިއަށެވެ.

ޔޫވީން މެޗުގައި ލީޑު ނެގީ 57 ވަނަ މިނިޓުގައި ޝަނާން ދިން ބޯޅައެއް ހިފައިގެން އޭރިއާ ތެރެއަށް ވަދެ ގޯލަށް ފޮނުވާލައިގެން ބައްސާމް ކާމިޔާބު ކޮށްދިން ގޯލުންނެވެ.

މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް ބައްސާމް އިތުރު ގޯލެއް ޖެހި ނަމަވެސް އޭނާ އޮފްސައިޑް ވުމުން ގޯލު ބަލައެއް ނުގަނެ އެވެ.

މިއާ އެކު ޔޫވީން މިވަނީ ލީގުގައި އަށް މެޗުން ހޯދި ދެ މޮޅާ އެކު ހަ ޕޮއިންޓް ހަމަކޮށްގެން ވަގުތީގޮތުން ގްރީން ސްޓްރީޓްސް އަށް ވުރެ ކުރިއަށް ޖެހިލައިފަ އެވެ. ހަތަރު ޕޮއިންޓާ އެކު މިވަގުތު ހަތްވަނައަށް ވެއްޓިފައިވާ ގްރީން މިރޭ ނުކުންނާނީ ފަސްވަނައިގައި އޮތް ޓީސީ ސްޕޯޓްސް ކްލަބާ ދެކޮޅަށެވެ.