ދެ ދަރިންނާ އެކު ގެއިން ނެރެލި އަންހެނަކަށް އެހީ ހޯދަނީ

ދެ ދަރިންނާ އެކު ގެއިން ނެރެލުމުން ހާލުގައި ޖެހިފައިވާ އަންހެނަކަށް އެހީ ހޯދުމުގެ މަސައްކަތް މަންމައިންގެ ހައްގުގައި މަސައްކަތް ކުރާ "މަމްސް އެއިޑް" އިން ފަށައިފި އެވެ.

ކުރީގެ ފިރިމީހާގެ ގޭގެ ކޮޓަރިއެއްގައި ދިރިއުޅެނިކޮށް، ތަޅު ބަދަލުކޮށް އެތަނަށް ނުވަދެވޭ ގޮތްް ހެދުމުން އަންހެން މީހާ މިހާރު ދިރިއުޅެނީ ދުވަހު ކުއްޔަށް ދޭ ކޮޓަރިއެއްގަ އެވެ. އެތަނުގެ ކުލި އޭނާ ދައްކަނީ، އެތަނުގެ ތެރޭގައި ކަރަންޓް އުނދުނަކުން ރޮށި ފިހެގެން ވިއްކައިގެން ލިބޭ ފައިސާއިންނެވެ.

އަންހެންމީހާގެ ހާލަތު ބަލައި މަމްސް ޖަމިއްޔާ އިން މިއަދު ބުނި ގޮތުގައި ކުރީގެ ފިރިމީހާގެ ގޭގައި ވަރަށް ހާލުގައި އުޅުމަށް ފަހު މިހާރު އޭނާ ވަންނާނެ ތަނެއް ނެތެވެ. އެގޭގައި ދިރިއުޅުނު އިރު ވެސް އެތައް ފަހަރެއްގެ މަތިން ފެނާއި ކަރަންޓު ކަނޑާލައި އުނދަގޫތައް ކުރިމަތިކުރި ކަމަށް މަމްސް ޖަމިއްޔާ އިން ބުންޏެވެ.

އަންހެންމީހާއާ ހަވާލާދީ މަމްސް ޖަމިއްޔާއިން ބުނީ ގެއިން ނެރެލުމުން ދެ ދަރިންނާ އެކު ގޮސް ކޮޓަރިއެއްގައި އުޅެމުން ދަނީ ދުވާލަކު 500ރ. ދީގެން ކަމަށެވެ.

މި ހާލަތާ ހެދި ކުދިން ސްކޫލަށް ނުފޮނުވާތާ ވެސް މަހަކަށް ވުރެން ގިނަ ދުވަސް ވެއްޖެ ކަމަށް މަމްސް ޖަމިއްޔާ އިން ބުންޏެވެ.

އަންހެން މީހާއާ ހަވާލާދީ މަމްސް ޖަމިއްޔާ އިން ބުނެފައިވާ ގޮތުގައި ޖެންޑާ މިނިސްޓްރީއަށާއި ޕޮލިހަށް މައްސަލަ ހުށަހަޅާފައިވާތާ އެތައް ދުވަހެއް ވެއްޖެ އެވެ. ނަމަވެސް މައްސަލައަށް ކުރިއެރުމެއް ނާންނަ ކަމަށް އޭނާ ބުނެފައިވާ ކަމަށް އެ ޖަމިއްޔާއިން ބުންޏެވެ.

މަމްސް ޖަމިއްޔާ އިން އެދެނީ އަންހެން މީހާގެ ބޯހިޔާވަހިކަމާއި ޒަރޫރީ ބޭނުންތަކަށް އެހީފޯރުކޮށްދިނުމަށެވެ.