ޓީޓީގެ ގައުމީ ޗެމްޕިއަންކަން ޝައްފާން ހޯދައިފި

ގައުމީ މުބާރާތުގެ ފިރިހެން ސިންގަލްސް ފައިނަލުގައި މިރޭ އެ މުބާރާތުގެ އެންމެ ކާމިޔާބު ކުޅުންތެރިޔާ މުންސިފް އަހުމަދަށް އަނިޔާވެ ކުރިއަށް ނުގެންދެވިގެން ހުއްޓާލި މެޗުން، މުހައްމަދު ޝައްފާން އިސްމާއީލް ޗެމްޕިއަންކަން ހޯދައިފި އެވެ.

މިއީ ގައުމީ މުބާރާތުގެ ޗެމްޕިއަންކަން ޝައްފާން ހޯދި ފުރަތަމަ ފަހަރެވެ. މާލޭ ޓީޓީ ހޯލްގައި މިރޭ ކުޅުނު ފައިނަލު މެޗުގައި މުންސިފް އަށް އަނިޔާވިރު ވެސް ލީޑްގައި އޮތީ ޝައްފާން އެވެ. އަދި ތިންވަނަ ސެޓްގައި މެޗު ކުރިއަށް ނުގެންދެވިގެން ހުއްޓާލި އިރު ޝައްފަން އޮތީ ބޮޑު ލީޑެއްގަ އެވެ.

ގައުމީ ފައިނަލު 12 ފަހަރު ކުޅެ 11 ފަހަރު މުބާރާތް ކާމިޔާބު ކުރި މުންސިފް ބުނީ ދެވަނަ ސެޓްގައި 9-8 އަށް ލީޑް ކުޑަ ކުރަން ޕޮއިންޓް ހޯދައި ޖަމްޕެއް ޖެހި ވަގުތު އޭނާ އަށް ފައި އެޅުނު ގޮތުން ކުޑަ ހުޅަށް ތަދެއް އެރި ކަމަށެވެ.

"މިހާރު ދުޅަވެފައި ހުރީ. ޑޮކްޓަރަށް ދައްކާލީމަ އަނިޔާގެ ތަފްސީލު އެނގޭނީ،" މި މަހު ނޭޕާލްގައި އޮތް ދެކުނު އޭޝިއާ ކޮލިފައިން މުބާރާތުގައި ވާދަކޮށް އޭޝިއާގެ މުބާރާތަށް ކޮލިފައިވި މުންސިފް ބުންޏެވެ.

ގައުމީ ސިންގަލްސް ޗެމްޕިއަންގެ އިތުރުން ޝައްފާން ވަނީ ޓީމު އިވެންޓްގައި އޭނާ، އެ އާއިލާ ނިސްބަތްވާ ސީވީޑްގެ އާއިލާއިން ނެރުނު އިހާ އެކަޑަމީގެ ޓީމަށް، މުބާރާތުގެ ޓީމު އިވެންޓްގެ ޗެމްޕިއަންކަން ހޯދައި ދިނުމުގައި ވެސް އެހީތެރިވެ ދީފަ އެވެ. މި އަހަރަކީ އޭނާގެ ކެރިއާގައި ހާއްސަ އަހަރެކެވެ. އޯގަސްޓް މަހު ތުރުކީގައި ބޭއްވި އިސްލާމިކް ސޮލިޑާރިޓީ ގޭމްސްގެ ދެވަނަ ބުރަށް ދަތުރު ކުރި އެވެ.

ޓީޓީ އެސޯސިއޭޝަނުން ތަނަވަސްކޮށް ދިން ފުރުސަތެއްގައި ޝައްފާން ވަނީ ގައުމީ މުބާރާތުގެ ކުރިން ގާތްގަނޑަކަށް އެއް މަސް ދުވަހުގެ ޓްރޭނިން ކޭމެޕެއް ކްރޭޝިއާގައި ފުރިހަމަ ކޮށްފަ އެވެ.