އުމްރާގެ އަޅުކަމަށް ދާ މީހުންނަށް ތިން މަހުގެ ވިސާ ދޭން ސައޫދީން ނިންމައިފި

އުމްރާގެ އަޅުކަން އަދާކުރަން ސައުދީ އަރަބިއްޔާ އަށް ދާ އެންމެންނަށް ތިން މަހުގެ ވިސާ ދޭން އެ ގައުމުގެ ސަރުކާރުން އިއްޔެ ނިންމައިފި އެވެ.

ސައުދީ ގެޒެޓްގައި ބުނެފައިވާ ގޮތުގައި ސަރުކާރުން އެކަން އިއުލާންކުރީ ހައްޖާއި އުމުރާގެ އަޅުކަމާ ބެހޭ ވަޒީރު ޑރ. ތައުފީގު އަލްރާބިއާ އުޒްބެކިސްތާނަށް ކުރައްވަމުން ގެންދަވާ ރަސްމީ ދަތުރުފުޅުގަ އެވެ.

މީގެ ކުރިން، އުމްރާގެ އަޅުކަމަށް ދާ މީހުންނަށް ސައޫދީން ދެނީ އެއް މަހުގެ ވިސާ އެވެ. މި ގެނައި ބަދަލާ އެކު ކޮންމެ ގައުމެއްގެ މުސްލިމަކަށް ވެސް ތިން މަހުގެ ވިސާ ލިބޭނެ ކަމަށް ބުންޏެވެ.

ނަމަވެސް، އެ އުސޫލުން ވިސާ ދޫކުރަން ފަށާނެ ތާރީހެއް އަދި އިއުލާނެއް ނުކުރެ އެވެ.

ކޮވިޑް-19 ފެތުރުމުން އެޅި ފިޔަވަޅުތަކަށް ފަހު ސައުދީން މި އަހަރު ވަނީ ހައްޖާއި އުމްރާގެ އަޅުކަން އަދާކުރަން ދިއުމަށް ވަރަށް ބޮޑެތި ލުއިތައް ދީފަ އެވެ.