ހިޖުރަ ގްރޫޕުން ހާލުގައި ޖެއްސި މީހުން ސަރުކާރުގެ ހަރަދުގައި ގެންނަނީ

އަލް-ހިޖްރަ ޓްރެވެލްސް އެންޑް ޓުއާސް އިން އުމްރާއަށް ގެންގޮސް އަނބުރާ ރާއްޖެ ނާދެވި، ހާލުގައި ޖެހުނު މީހުން ހައްޖު ކޯޕަރޭޝަންގެ ހަވާލުގައި ރާއްޖެ ގެނައުމުގެ މަސައްކަތް އިސްލާމިކް މިނިސްޓްރީން ފަށައިފި އެވެ.

އުމްރާގެ އަޅުކަމަށް މީހުން ގެންދިއުމުގެ ހުއްދަ ވެސް އޮންނަ އެ ކުންފުނީގެ ހަވާލުގައި ދިޔަ މީހާއާ އެކު ޖުމްލަ 24 އުމްރާވެރިން ހިމެނެ އެވެ.

ސްކޫލު ބަންދާ ދިމާކޮށް 28،500ރ. ދައްކައިގެން އުމްރާއަށް ދިޔައީ ދެކޮޅު ޓިކެޓާއި ވިސާގެ ހުރިހާ އިންތިޒާމުތަކެއް ވެސް އަލް-ހިޖްރަ ކުންފުނިން ހަމަޖައްސާ ގޮތަށެވެ. އެ މީހުން ދިޔައީ އުމްރާގެ އަޅުކަން ނިންމައި މިދިޔަ އާދިއްތަ ދުވަހު އަންނަ ގޮތަށެވެ. އެކަމަކު މިހާތަނަށް ވެސް ޓިކެޓު ހަމަނުޖެހި އެ މީހުން ތިބީ އަނބުރާ ނާދެވިފަ އެވެ.

އެނގިފައިވާ ގޮތުގައި، މީގެ ތެރެއިން ގިނަ މީހުން ނިސްބަތްވަނީ ޅ. ނައިފަރަށެވެ.

މި ގްރޫޕްގެ ދެ ޝެއާހޯލްޑަރުންނަކީ މުސްތަފާ މުހައްމަދުފުޅާއި ފިރާގު މުހައްމަދުފުޅެވެ. ކުންފުނީގެ މެނޭޖިން ޑިރެކްޓަރަކީ ފިރާގެވެ.

މި މައްސަލަ އިއްޔެ ސޯޝަލް މީޑިއާގައި ފެންމަތިވުމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ހާލުގައި ޖެހުނު މީހުންނަށް ގުޅުއްވައި ހާލަތު އޮޅުންފިލުއްވައިފަ އެވެ.

މިނިސްޓަރު ވިދާޅުވީ ހާލުގައި ޖެހުނު އުމްރާވެރިންނަށް، މައްކާގައި މިވަގުތު ތިބި ހައްޖު ކޯޕަރޭޝަންގެ ބޭފުޅުން މެދުވެރިކޮށް އެހީވުމުގެ މަސައްކަތް ކުރަމުން އަންނަ ކަމަށެވެ.

"ހާލުގައި ޖެހުނު އުމްރާވެރިން މި މަހު 10ގައި މާލެ ގެނެވޭތޯ މަސައްކުރަމުން ދަނީ. އެ މީހުން ތިބި ހޮޓަލުން ނުކުންނަން ޖެހޭތީވެ އެ މީހުން ފުރަންވަންދެން ހައްޖު ކޯޕަރޭޝަނުގެ އެހީތެރިކަމުގައި ތިބޭނެ،" މިނިސްޓަރު ވިދާޅުވި އެވެ.

އުމްރާވެރިން ހާލުގައި ޖެއްސި ކުންފުންޏަށް މިއަދު ފިޔަވަޅު އަޅުއްވާނެ ކަމަށް ވެސް މިނިސްޓަރު ވިދާޅުވި އެވެ.

އެ ގްރޫޕުގެ ހަވާލުގައި ދިޔަ މީހުންގެ ތެރޭގައި 18 އަހަރުން ދަށުގެ ފަސް ކުދިން ހިމެނެ އެވެ.

ރެއިން ފެށިގެން ހައްޖު ކޯޕަރޭޝަނުން ވަނީ އެ މީހުންނަށް ކެއިން ބުއިމުގެ އިންތިޒާމުތައް ވެސް ހަމަޖައްސައިފަ އެވެ.

"މިއަދު މެންދުރު އަޅުގަނޑުމެން ހައްޖު ކޯޕަރޭޝަންގެ ބޭފުޅުން ތިބި ހޮޓަލަށް ބަދަލުކުރާނެ ކަމަށް ވެސް އެެ ބޭފުޅުން ވިދާޅުވި،" ހިޖްރާ ގްރޫޕުގެ ހަވާލުގައި ގޮސް ހުރި އުމްރާވެރިއަކު ބުންޏެވެ.

އެ މައްސަލަ ފެންމަތިވުމުން ކުންފުނިން ބުނީ އުމްރާގެ އަޅުކަން އަދާކޮށް ނިމުނު ފަހުން އެމީހުން އަނބުރާ ރާއްޖެ ނުގެނެވި ވަނީ ކުންފުންޏަށް ދިމާވި މާލީ ދަތިތަކެއްގެ ސަބަބުން ކަމަށެވެ.

"މި ކުންފުނިން މިވަގުތު ވެސް ދަނީ އުމްރާވެރިން ރާއްޖެ ގެނައުމަށްޓަކައި މަސައްކަތް ކުރަމުން. ނަމަވެސް އަދި މިއަދާ ހަމައަށް ވަނީ މިކަމުގައި ކުރިމަގެއް ނުފެނިފައި،" އަލްހިޖްރަ ކުންފުނިން ބުންޏެވެ.

އެނގިފައިވާ ގޮތުގައި، އަލްހިޖްރަ ކުންފުނީގެ ހަވާލުގައި އުމްރާ އަށް މީހުން ފުރިއިރު ވެސް ޓިކެޓާއި ވިސާގެ މައްސަލަ ޖެހުނެވެ. އެ މީހުން ފުރުވާލަން ވެސް ޖެހުނީ އެކި ފްލެޓްތަކުން އެކި ދުވަސްތަކުގަ އެވެ.